丁海寅 Blackpink Jisoo 主演韓劇《雪滴花》 Jisoo 首次擔當女主角

丁海寅 Blackpink Jisoo 主演韓劇《雪滴花》 Jisoo 首次擔當女主角

電視電影 娛樂新聞
By Ella on 07 Oct 2020
Digital Content Writer

丁太太們,你哋嘅老公返嚟喇!丁海寅即將搭檔 Blackpink 成員 Jisoo 主演韓劇《雪滴花》,今次仲係 Jisoo 第一次擔正做女主角!呢個顏值超高嘅養眼組合真係不得了啊!

韓國電視台 JTBC 嘅新劇《雪滴花》確定由丁海寅同人氣女團 Blackpink 嘅門面擔當 Jisoo 出演男女主角。《雪滴花》以 1987 年嘅首爾為背景,講述女大學生「殷英初」(Jisoo 飾)某日偶然遇上成身血闖入女生宿舍嘅名牌大學高材生「林秀浩」(丁海寅 飾)。「殷英初」喺被人監視嘅危機下決定留低「林秀浩」並幫佢治療,兩人譜出一場動盪時局下嘅愛情故事。

丁海寅飾演「林秀浩」。Photo from holyhaein@IG

Jisoo 飾演「殷英初」。Photo from blackpinkofficial@IG

丁海寅飾演嘅「林秀浩」係名牌大學高材研究生,非常溫柔,有住溫暖嘅微笑,但有一種神秘嘅氣息,係大家都羨慕嘅完美男人。有一日「林秀浩」唔知因為咩原因而成身血咁闖入咗「殷英初」所住嘅女生宿舍。

丁海寅飾演嘅「林秀浩」係名牌大學高材研究生,非常溫柔,係大家都羨慕嘅完美男人。Photo from holyhaein@IG

Jisoo 飾演嘅「殷英初」係一個主修英文嘅活潑可愛女大學生,係女生宿舍嘅氣氛製造者。某日偶然遇上「林秀浩」並對佢一見鍾情,冒險留低佢,幫佢治療傷勢。Jisoo 啱啱出道嗰陣已經因為太靚而被稱讚係「演員相」,但佢其實並冇正式嘅戲劇演出經驗,今次首次擔任女主角,令人相當期待!

Jisoo 飾演嘅「殷英初」係一個主修英文嘅活潑可愛女大學生。Photo from blackpinkofficial@IG

廣告
廣告

《雪滴花》由韓國神劇《Sky Castle》導演趙賢卓同編劇柳賢美聯手打造,除咗導演同編劇之外,都請到因《Sky Castle》而爆紅嘅金惠奫、尹世雅出演。

金惠奫(金惠允)飾演因為家境貧窮而讀唔到大學嘅「季芬玉」,因緣際會下進入「殷英初」嘅寢室而捲入事件中。

金惠奫飾演因為家境貧窮而讀唔到大學嘅「季芬玉」。Photo from hye_yoon1110@IG

尹世雅飾演嘅「皮勝熙」係女生宿舍舍監,擁有絕對權力,不苟言笑,係女生宿舍人人懼怕嘅人物。

尹世雅飾演嘅「皮勝熙」係女生宿舍舍監,擁有絕對權力。Photo from loveyoonsea@IG

《雪滴花》預計 2021 年播出,實力同顏值都咁強勁嘅陣容,真係唔追唔得啊!

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel