韓國網紅整容成「朴寶劍」被網民鬧爆　自爆朴寶劍本尊回應

韓國網紅金敏瑞（민서공이）因為將自己整容整成韓國人氣男星朴寶劍而成為網絡紅人，飽受爭議，最近佢喺自己嘅 YouTube 頻道拍片畀朴寶劍以示感謝，仲自爆朴寶劍本尊對呢件事嘅回應。

韓國網紅金敏瑞（민서공이）曾經因為社交網上嘅自拍照神似韓國人氣男星朴寶劍而登上韓國綜藝節目《隨便問甚麼》，不過當真身出現時就被網民指「貨不對版」，連節目主持人都話真人並唔似，金敏瑞直言自己亦冇話過自己似朴寶劍，係其他人話佢似，令佢覺得好苦惱。節目播出後網民隨即喺佢社交平台留言批評佢。

Photo from 《무엇이든 물어보살》

Photo from kms02.02@IG

Photo from Blossom Entertainment

然而，金敏瑞之後竟然整容，做咗鼻及眼嘅手術後更加神似朴寶劍，佢亦曾經透露過自己嘅身高體重，竟然同朴寶劍一模一樣，更有網民指佢連說話嘅語氣都好似模仿緊朴寶劍咁，令網民更加懷疑佢根本就係想繼續扮朴寶劍。

Photo from kms02.02@IG

Photo from kms02.02@IG

最近金敏瑞突然喺自己嘅 YouTube 頻道拍片畀朴寶劍多謝佢，表示想將感謝嘅心意傳遞畀朴寶劍，不過自己冇能力做到，所以唯有拍片多謝佢。金敏瑞喺影片中提及同自己感情好好嘅一個姐姐嘅男性朋友依家同朴寶劍喺同一隊軍隊中服兵役，呢位男性朋友曾經問過朴寶劍覺得金敏瑞點樣，朴寶劍表示好多謝佢（咁鍾意自己）。金敏瑞知道後覺得好感動，於是就決定拍片多謝朴寶劍，仲表示希望朴寶劍好好完成兵役，回歸幕前。

Photo from kms02.02@IG

Photo from kms02.02@IG

其後金敏瑞仲話自己已經睇晒朴寶劍主演嘅《青春紀錄》，而且開始模仿朴寶劍嘅衣著，依家身上呢套都係朴寶劍出演《孝利家民宿》時著過嘅衫。

Photo from 민서공이@YouTube

影片一公開後，網民旋即留言批評，「打起精神生活啦」、「好恐怖」、「可唔可以放過朴寶劍」，有網民認為朴寶劍咁樣回應只係出於禮貌，同時都有網民希望佢唔好再利用朴寶劍去製造話題。

一開初話自己唔似朴寶劍，但依家又話自己開始模仿朴寶劍，都難怪啲網民咁嬲。

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）