盤點 5 位韓娛圈富二代　佢據傳係中國十大富豪嘅孫？

有一句俗語叫「含住金鎖匙出世」，用依家嘅說法姐係形容富二代。韓國同樣都有「湯匙階級論」，用「金湯匙」、「銀湯匙」、「銅湯匙」及「土湯匙」形容家境。韓國娛樂圈有好多富二代，今次就為大家盤點 5 位「金湯匙」藝人。

崔始源
崔始源係韓國人氣天團 Super Junior 嘅成員，佢係富二代呢件事相信好多人都知道，因為始源一上綜藝節目就會畀人問家境，就連 Super Junior 成員都經常喺節目上大爆始源嘅家境。始源父親係韓國企業家，成員銀赫曾經喺節目度提及「就算我哋賺得再多，都比不上始源原有嘅財產」，更有成員爆料始源屋企嘅財力足夠收購一間電視台，可想而知始源家世之雄厚！

Photo from siwonchoi@IG

朴炯植
曾經係韓國男團 ZE:A 成員嘅朴炯植，近年轉型成為演員，成績亮麗。但原來朴炯植都係富二代，更曾被指係韓國偶像界富二代第一名！因為佢爸爸係韓國 BMW 嘅理事長！而朴炯植都曾經喺節目度直接承認，但都直言父親唔希望自己被談論。

Photo from phs1116@IG

辰樂
韓國男團 NCT 中國籍成員辰樂一出道就刷新咗娛樂圈富二代排行榜，更有個外號叫「辰會長」，據傳佢爺爺係中國十大富豪之一！辰樂家境富裕程度難以想像，細細個就學騎馬、射擊，仲可以喺屋企打高爾夫球，佢喺中國上海嘅屋企值 40 億韓幣，而且 13 歲時就舉辦過個人演唱會，而辰樂更曾經提過父母為咗佢喺韓國買咗層樓！

Photo from nct_dream@IG

陸星材
韓國男團 BTOB 成員陸星材憑韓劇《鬼怪》爆紅，喺劇集中佢飾演一個富三代，而喺現實中佢的確係一個富二代，簡直就係本色出演！陸星材爸爸係韓國企業家，公司年銷售額達 150 億韓幣，不過即使屋企有錢，陸星材都非常低調。

Photo from yook_can_do_it@IG

P.O
韓國男團 Block B 成員 P.O 憑綜藝節目《新西遊記》爆紅，仲係 WINNER 成員宋旻浩嘅好兄弟，兩人由中學開始就係好朋友。而平時搞笑可愛嘅 P.O 都係富二代，P.O 爸爸創立咗韓國第一間免稅店，喺 P.O 中學畢業嘅時候仲送咗一架名車畀佢。

Photo from pyojihoon_official@IG

呢幾位富二代嘅家境富裕程度真係難以想像，全部都係人生勝利組！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）