豹哥單立文上傳「侯賽因」舊照慶祝《賭俠》30週年　被讚 30 年不變超凍齡！

由周星馳、劉德華、吳孟達、張敏、向華強及單立文等主演嘅經典電影《賭俠》上映 30 週年，為咗慶祝《賭俠》30 週年，豹哥單立文就喺社交平台上傳咗「侯賽因」嘅舊照，引起一眾網民熱議。

《賭俠》喺 1990 年上映，票房超過 4000 萬，僅次於《賭聖》，係當年年度票房第二名。《賭俠》相信都成為咗好多香港人嘅回憶，亦係一個經典，除咗周星馳、劉德華及吳孟達嘅角色深入民心外，由豹哥單立文飾演嘅反派「侯賽因」同樣深深地印喺觀眾嘅腦海中。

Photo from 《賭俠》

Photo from 《賭俠》

Photo from palsinn@IG

豹哥最近喺社交平台上傳咗「侯賽因」嘅舊照慶祝《賭俠》上映 30 週年，並留言：「想偷我雞？我滔 pair，你開嚟見我⋯⋯慶祝賭俠上映30週年㊗️?‍???❤️♠️♦️♣️ #其實侯賽因真係幾靚仔㗎 #唔經唔覺30年 #人不allback枉少年」。

Photo from palsinn@IG

Photo from palsinn@IG

帖文一出，旋即引起網民留言，唔少網民大讚豹哥 30 年不變，依然咁型，亦都有好多網民留言電影中嘅經典對白，「電腦分析，65% 係 7，35% 係 J，唔係 7 就係 J」、「開個六俾拒（佢），等拒（佢）贏莊 100 蚊」、「10 蚊就想贏我二千五百萬」及「想偷我雞」等，非常搞笑～

Photo from palsinn@IG

Photo from palsinn@IG

Photo from palsinn@IG

Photo from palsinn@IG

除咗一眾網民留言外，豹嫂胡蓓蔚都留言「哇，原來 90 年代已有Little Fresh Meat ?」大讚豹哥係小鮮肉，而豹哥一班圈中好友如洪永城就話「對你又愛又恨 30 年」，陳展鵬都留言戲中經典對白「各位觀眾五條煙」，袁偉豪就搞笑話「出左（咗）公海未呀」。

Photo from palsinn@IG

豹哥呢張相真係勾起好多香港人嘅回憶，淨係見到咁多網民都仲記得啲對白就知道呢套電影幾咁深入民心！啲對白有聲㗎！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）