《驅魔麵館》趙炳圭反差大私下生活哩啡　鬚根旺盛脫毛痛到喊

By Ella on 15 Dec 2020

Digital Content Writer

最近 Netflix 大熱韓劇《驅魔麵館》人氣非常高，播咗 6 集已經超越神劇《Voice》嘅收視，創下韓國 OCN 電視台最高收視紀錄！飾演「蘇炆」嘅趙炳圭憑劇集爆紅，佢喺戲內係一個善良、超有毅力嘅男孩，但原來趙炳圭戲裡戲外竟有反差？！

趙炳圭曾出演韓國人氣綜藝節目《我獨自生活》，呢個節目係一個真人秀節目，節目組會跟拍藝人一日，將藝人私下日常生活面貌展現畀觀眾，節目邀請過眾多人氣偶像及演員，如太陽、EXO 嘅 Kai 等，深受歡迎。而趙炳圭出演節目時都將自己私下一面展露於鏡頭下，意外發現佢戲裡戲外有反差，「蘇炆」善良可愛，但趙炳圭喺現實生活中就有啲哩啡。

Photo from ocn_original@IG

Photo from 《我獨自生活》

趙炳圭自己一個住，屋企並唔細，但採光好差，佢喺節目度表示原來正正就係因為採光差所以先租呢間屋，因為佢之前住嘅屋塔房採光太好，令佢瞓唔到覺，所以佢好滿意依家間屋唔透光。另外趙炳圭表示自己將所有錢交晒畀父母，每個月淨係靠父母畀嘅零用錢生活，所以生活比較樸素。

Photo from 《我獨自生活》

趙炳圭間屋冇咩佈置，而且仲有啲亂。除咗亂之外，趙炳圭生活都有少少哩啡，剪完指甲後直接用吸塵機吸飯枱，睇到一班主持好驚訝。另外，成桶衫要洗，但唔區分深淺色衫之餘仲用快速洗衣，淨係洗 19 分鐘，主持人仲話咁樣皮膚會過敏，但趙炳圭竟然話因為經常咁樣做，免疫力高就唔會過敏。而晾衫嘅時候因為太多衫，冇地方晾，連電視機、門柄都要用嚟晾衫。