限時登場！Switch《Monster Hunter Rise》體驗版全新系統/魔物一覽　武器開放支援四人連線

萬眾期待嘅 Switch 遊戲《Monster Hunter Rise（魔物獵人 崛起）》將於 3 月 26 日喺 Switch 平台正式推出，而遊戲啱啱推出嘅體驗版，將由即日開始直至  2 月 1 日限時開放，玩家可以喺入面體驗到熟悉操作嘅「基礎訓練任務」之外，仲可以玩到打鐮鼬龍王嘅「新手的任務」同埋打泡狐龍嘅「高手的任務」，更加唔少得畀大家練習新系統操龍嘅「操龍訓練任務」！

喺體驗版入面，全種類嘅武器都會開放，隨從艾路貓同加爾克都會有得試玩！而舞台揀咗喺「大社遺跡」，玩家可以係依個地方體驗捕到捉翔蟲同埋環境生物去強化狀態㗎。

Photo from 《Monster Hunter 一月特備節目》截圖

有唔少人都鍾意同朋友一齊打「芒亨」，喺遊戲入面一齊屠龍，所以體驗版都有顧及到依個功能，允許玩家除咗單機模式之外，都支援最多四個人同時一齊玩！但要留意，如果獵人想同朋友用網絡連機，就要 Join 返 Nintendo Switch Online 先有得連線啦！

如果有心想玩之後推出嘅正式版嘅話，玩咗依個體驗版都會喺之後正式版入面有道具可以拎返㗎！不過大家要留意，體驗版有遊玩次數限制，「新手的任務」同埋「高手的任務」加埋只可以玩 30 次，一旦超過咗就唔可以再玩依隻體驗版嘅全部任務㗎啦！

Photo from 《Monster Hunter 一月特備節》截圖

推出咗咁多新資訊，大家可能唔多唔少都有少少混淆。就等小編同大家介紹下到底有咩新內容啦！

Photo from 《Monster Hunter 一月特備節目》截圖

「操龍」係好新穎嘅系統！係指獵人可以用鐵蟲絲去拘束並且操控魔物。喺咁嘅情況下，本身係一種威脅嘅魔物就可以被獵人利用，動作可以變得非常豪邁，真係型到癲呀！只要透過特定嘅攻擊，更甚係令魔物互相爭鬥，獵人就可以乘機進行「操龍」㗎啦！

佢哋亦都介紹咗一個叫「寒冷群島」嘅新地方。氣候極寒嘅「寒冷群島」以前係巨龍嘅巢穴，聽聞有好多強者以前都嚟過挑戰隻巨龍，但就不幸喪命。群島中央嘅巨大龍骨同埋已經腐朽哂嘅擊龍船依家已經暴露喺風雪底下，證明咗以往嘅戰況係幾咁激烈。

Photo from 《Monster Hunter 一月特備節目》截圖

喺「寒冷群島」依個地方，大家會遇到成日喺雪原徘徊搵獵物嘅雪鬼獸，以及自《魔物獵人 XX》後再度出現嘅白兔獸，個樣同個名好匹配嘅奇怪獸，身上披住淺藍色皮膚嘅眠狗龍王，仲有可以喺冰面上面自如穿梭嘅冰牙龍！

至於以前嘅主題魔物都同樣會登場！除咗啱先「高手的任務」就同大家提過嘅泡狐龍之外，仲有留有原始外貌嘅轟龍，同埋象徵住「芒亨」嘅火龍，佢哋一隻都走唔甩，全部都會喺新作入面再度登場，同獵人嚟返場激戰！

Photo from 《Monster Hunter Rise》Official Website

當然，新作主題魔物都有披露到新消息啦！今次嘅主題魔物係怨虎龍，本身個樣已經充滿住怒氣，加上周身都披住好似盔甲咁樣充滿威嚴嘅甲殼，就好似一個帶住怨念嘅亡靈武者一樣。更甚嘅係，當佢獵食咗其他魔物之後，身體會冒出紫色嘅氣體，依啲被稱之為「鬼火」嘅嘢會令本身已經有壓倒性破壞力嘅怨虎龍更加強大！

Photo from 《Monster Hunter 一月特備節目》截圖

打完龍咁辛苦，當然唔少得畀一眾獵人休息嘅神火村啦！村入面有個叫「集會所」嘅地方，除咗有茶館同雜貨舖之外，都可以喺度接唔同嘅任務，仲可以見到接待員水藝！

Photo from 《Monster Hunter 一月特備節目》截圖

火神村入面大家仲可以遇到長老風登大人，狩獵教官倪泰，負責隨從雇用窗口嘅小庵，艾路貓嘅老大秋風，同埋經營交易窗口嘅隆蒂尼⋯⋯有好多唔同嘅角色！

如果獵人想喺遊戲入面確認武器嘅動作，佢哋都可以去修練場，嗰度有好多唔同嘅物件畀大家任意攻擊，務求要大家唔啱揀到啱，唔熟練到熟為止㗎！

Photo from 《Monster Hunter 一月特備節目》截圖

《Monster Hunter Rise（魔物獵人 崛起）》正式版將會喺 2021 年 3 月 26 日於 Switch 平台推出，香港任天堂 eShop 售價分別為 HKD 543（豪華版）以及HKD 468！有興趣嘅獵人可以預購定先，再玩埋個試玩版等佢出啦！