UNO 50週年黑色特別版 加入全新卡牌、玩法 假期派對聚會必備

UNO 50週年黑色特別版 加入全新卡牌、玩法 假期派對聚會必備

時事熱話 生活熱話
ByIvy on 14 Jan 2021 Digital Content Writer

UNO 面世 50 週年啦!喺一個咁重要嘅時刻,官方就推出咗 50 週年特別版,各位 UNO 迷一定唔可以錯過呀!一齊嚟睇吓依副 UNO 有咩咁特別,同埋回顧吓以前有咩特色 UNO 啦!

UNO 可以話係大家由細玩到大嘅遊戲,唔理係讀緊書嘅學生抑或做緊嘢嘅大人,喺開 Party 嘅時候必備一副 UNO 與眾同樂。踏入 2021 年,原來 1971 年推出 UNO 已經面世 50 週年啦!有見及此,官方刻意準備咗一副 50 週年特別版,安排喺 Walmart 獨家發售,定價美金 $14.88(約港幣 $115)。唔知有冇 UNO 迷會買番一副嚟收藏呢?

Walmart 獨家發售,定價美金 $14.88(約港幣 $115)
Photo from UNO Official Twitter

依副 UNO 一棄傳統,以型格嘅黑色作為主色調,背面亦都印上咗特別設計嘅 50 週年字樣,可以話係型人必備,玩 UNO 都有型過人呀!

黑色配上傳統四色,一個字「型」!
Photo from UNO Official Twitter

50 週年特別版加入咗全新內容:會多咗種「50/50」嘅卡同一個印有 UNO 字樣嘅金幣。當張「50/50」嘅卡生效時,玩家就要擲金幣去決定邊個要抽卡啦!

抽到「50/50」時,就係金幣出場嘅時候
Photo from Walmart

雖然官方之前澄清玩家喺最後一張卡嘅時候係唔洗嗌 UNO,但可能見大家都嗌咗咁多年,索性就將依個規則加埋落去依副 UNO 度,所以大家玩依副 50 週年特別版時切記要嗌呀!

除咗佢,仲有其他特色 UNO!
Photo from Walmart

咁多年嚟,雖然傳統版 UNO 係深入民心,但其實佢哋都曾經推出過唔少別具特色嘅版本,全部都令人好深刻㗎。

例如佢哋先前就推出過特大版!一張卡有成傳統大細嘅三倍咁大!雖然睇落就好似好好笑,但會唔會玩都玩到手攰,唔小心畀隔離位睇到自己有咩卡㗎?

廣告
廣告

超巨大 UNO!
Photo from MATTEL Shop

可能預咗大家游水時都好想玩 UNO!佢哋推出過有防水功能嘅版本,張卡偏向透明設計的確係幾靚,而且仲好細心可以畀大家用個扣扣住啲牌,咁就算有大浪都唔擔心唔見咗張好卡,Draw 唔到下家啦。

防水㗎,喺泳池都玩得
Photo from Walmart

而喺 45 週年時,佢哋都推出過一副加入咗新內容嘅 UNO。玩家可以有三張白色嘅卡,自己鍾意加咩規則入去都冇問題,亦有一張「Wild Card」,當有人抽到嘅時候就要同下家交換全部手牌!隨時逆轉結果呀!

空白嘅牌鍾意寫咩都得
Photo from GAMEOLOGY

「UNO Premium 50th Anniversary Edition Matching Card Game for 7 Year Olds & Up」

價錢:美金 $14.88(約港幣 $115)

 

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mailholiday@presslogic.com,直接將資料傳比小編)

Share to Facebook