冬天 5 個防靜電方法　不再與他人「過電」！

冬天一到皮膚就好乾燥，甚至會出現靜電，經常與人「過電」，雖然被「電」親未至於好痛，不過個感覺都唔舒服。今次為大家整理 5 個冬天防靜電嘅方法，等大家唔使再「觸電」。

靜電係電荷喺物質系統中嘅不平衡分佈產生嘅現象。當兩種唔同嘅物質互相摩擦時，電子就會喺物體之間轉移，從而起電。物體帶電後，電荷會保持喺物體上，除非被其他物體移走，稱為「靜電」。唔想被「電」親，就要知道以下 5 個防靜電小知識啦～

#增加空氣濕度

房間或者屋企太乾燥嘅話，好容易會產生靜電，所以使用加濕器、噴噴霧或者放一盆水喺屋企，都可以增加空氣濕度，減少靜電產生。

Photo from 無印良品

#多使用潤膚產品

皮膚乾燥容易累積靜電，唔想成日用手掂物件時就「觸電」嘅話就要多搽潤手霜，保持皮膚濕潤，咁樣就可以帶走靜電。

Photo from The Body Shop

#盡量穿著棉質衣服

毛衣大多由羊毛或人造纖維製成，摩擦時容易產生靜電，而且靜電仲會停留喺衣物上，好易「觸電」。而棉質衣物就比較容易放走靜電。

Photo from AIR SPACE

#觸碰牆壁

喺掂鐵門、門鎖及門柄前，可以先將手掂一掂旁邊嘅牆壁，將體內嘅靜電通過牆壁釋放出嚟。

Photo from Pinterest

#多進食含有維他命及酸性食物

體內有靜電積聚時，血液嘅酸鹼度會偏鹼，而多食含有維他命 A、C、E 及酸性食物，可以中和血液嘅酸鹼度，保持人體內電解質平衡，有效預防靜電產生。強酸性嘅食物有乳酪、比目魚及蛋黃等；中酸性嘅食物有雞肉、牛肉、麵包及鰻魚等；弱酸性嘅食物有朱古力、花生及白米等。

Photo from Pinterest

Photo from Pinterest

經常「觸電」嘅朋友要留意啦～

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）