《陀槍師姐2021》口碑兩極化！內地觀眾嫌老土！ 播放平台評分插水僅5.9分

《陀槍師姐2021》喺香港、大陸同步播出，不過播出一星期後口碑麻麻，喺大陸平台評分僅5.9分，與前作相差超遠！普遍評論認為套戲懶幽默，「陳三元」僅出現幾集就打正旗號用《陀槍師姐》做噱頭。

Photo from 《陀槍師姐》

《陀槍師姐》系列向來係TVB經典劇集，1998年至2004年前後共推出四集，主演個個都深入民心。

Photo from 《陀槍師姐2021》

《陀槍師姐2021》係相隔16年後嘅續集，主要角色都唔同晒，由宣萱、陳豪、羅子溢、洪永城等人主演。劇集海報中，各角色擺出唔同嘅搞怪pose，似乎係走喜劇路線。

而成套劇同《陀槍師姐》最有關係嘅就係由滕麗明飾演嘅「陳三元」，作為《陀槍師姐》嘅靈魂人物，有佢出場先算係《陀槍師姐》。可惜陳三元嘅戲份唔多，女主角係宣萱飾演嘅「戴安娜」。

Photo from 《陀槍師姐2021》

劇集首播時，宣萱發夢結婚嗰段劇情被指老套又無謂。《陀槍師姐2021》被批似一套以警察為背景嘅愛情劇，劇情尷尬，就算有實力派演員宣萱、陳豪做主角都吸引唔到人睇。

Photo from 《陀槍師姐2021》

Photo from 《陀槍師姐2021》

《陀槍師姐2021》同時喺大陸平台同步播出，不過就連大陸觀眾都覺得唔好睇，指「毀經典」，認為套劇掛名《陀槍師姐》只係賣情懷，破案過程毫無邏輯。

《陀槍師姐》系列前4集喺大陸平台評分全部達7.5分以上，但作為續集，《陀槍師姐2021》僅得5.9分。

不過亦有人認為套劇唔差，如果唔係用《陀槍師姐》做噱頭可能會得到更高嘅評價。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）