朱千雪入行8年無人追！為老公拒拍性感/接吻戲 湯洛雯爆好友零追求者原因

朱千雪、湯洛雯、岑杏賢、蔣家旻近日齊上節目《Master's Talk》（《師父有請》），大談另一半。久未露面嘅千雪BB指自己未有退出娛樂圈想法，不過要平衡家庭同事業兩方面。又自爆入行8年從未被人追過，靚湯篤爆好友無追求者嘅真相。

Photo from 朱千雪IG

朱千雪、湯洛雯、岑杏賢、蔣家旻同張嘉兒喺圈中獲稱「2Line黨」，不過靚湯就指佢哋群組名係「幸福公主」。

Photo from 朱千雪IG

出席節目嘅4位成員有3位都有另一半，上到節目亦大方談及感情事。朱千雪與青梅竹馬嘅醫生男友結婚，被問到覺唔覺得老公靚仔，千雪BB一時反應唔切，停咗3秒先答：「我覺得靚仔咪得！」

Photo from 朱千雪IG

佢又自爆自己入行8年嚟未曾被人追過，不過好姊妹湯洛雯即刻加把口篤爆背後原因：「我知點解，如果有人主動問佢攞電話，佢會答『你Send e-mail畀我啦』。」

Photo from 湯洛雯IG

比起「無人追」，似係朱千雪自己將追求者拒於門外，佢指自己唔係好中意識好多朋友，所以同自細認識嘅老公相處感覺最舒服，又安全，唔驚對方會呃佢。

Photo from 朱千雪IG

千雪BB又表示曾經同人合照完後，對方想問佢攞電話方便WhatsApp返張相畀佢，但朱千雪一句：「唔洗喇！張相你keep啦。」就拒絕咗對方。佢直言拍戲都無男拍檔嘅電話號碼，因為覺得無需要，要聯絡可以透過PA（助理編導）。

Photo from 朱千雪IG

朱千雪拍拖後，更會盡量拒絕拍性感戲、接吻戲：「如果可以唔需要就最好唔好。」佢表示對自己身材無自信，試過有場戲要扯爛件衫露膊頭，但佢認為自己又唔係瘦，露嚟都嘥氣，於是直接將入面件衫同外面背心縫埋一齊，只會見到少少膊頭：「怕被人cap圖話我手臂肥。」指如果自己有腹肌同40吋長腿就可能唔同講法。

Photo from 朱千雪IG

朱千雪又話好驚生BB，因為佢怕肥，睇嚟千雪BB真係好care佢身材！

靚湯都有被問到同馬國明嘅感情事，表示對於外界屢傳佢哋婚訊感到「有少少厭」，直言：「我女仔嚟㗎嘛！人哋都未求婚，咁我點答你啫？」又指如果訂婚一定會公開，所以大家唔洗再問。

Photo from 湯洛雯IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）