謝霆鋒晒狗意外曝光豪宅！愛犬品種名貴 曾養各種無毛寵物！陸龜/蜥蝪是愛寵

40歲嘅謝霆鋒近年集中返內地工作，日前佢回港即急不及待大晒新寵「Mustard」，仲拍埋片意外曝光佢所住嘅豪宅，空間闊落！而佢嘅愛犬亦相當名貴，喺香港頗為罕有，其實謝霆峰非常中意動物，曾經養過陸龜、蜥蝪添呀！

謝霆鋒嘅感情生活向來備受關注，不過佢一於低調處理，甚少公開回應。佢近年中港兩邊走，喺內地不時出演下綜藝節目，同時兼顧「鋒味」呢個飲食品牌。

喺內地工作多時嘅謝霆鋒近日就返香港，回港後嘅佢第一時間同佢嘅新寵交流，佢喺Facebook晒出照顧狗狗「Mustard」嘅影片，片中佢悉心照料愛犬，幫手沖涼、摸摸，片段更意外曝光佢嘅豪宅內部！

謝霆鋒家中飯廳空間感極大，熱愛下廚嘅佢飯廳擺放咗一張圓枱，坐得落12人，而且採光好好。

飯廳位於閣樓非常光猛，飯枱隔離仲擺咗一set架子鼓，完全feel到佢嘅搖滾之魂！

室外花園勁大，仲設有小水池專畀謝霆鋒為愛犬洗白白，同時又有足夠空間狗仔活動～

室內以木地板同白色家具為主，有好大地方畀愛寵走動。一向對烹飪好有研究嘅霆鋒，廚房有好多專業廚具，而且廚房重地都畀Mustard自由出入，可見Mustard喺佢心目中地位何等重要。

其實Mustard品種為Goldendoodle（黃金貴賓犬），係金毛尋回犬同貴婦狗嘅混種，雖然紅遍北美但喺香港相當罕見，唔易買到，而且價格不菲，售價大約要幾萬元。

謝霆鋒不嬲都中意小動物，佢因為身體原因多年嚟都飼養唔少無毛寵物，包括無毛貓同爬蟲類寵物，最高峰仲養過超過30隻陸龜、5隻蜥蝪！

謝霆鋒更曾同嚟自非洲嘅亞達伯拉象龜「囡囡」為唱片影封面照，又帶「囡囡」上台為音樂會演出，不過之後佢借出「囡囡」作展覽被偷走，謝霆鋒傷心欲絕仲懸紅港幣$10萬尋龜。

不過近年佢都有養返有毛嘅寵物，愛貓Dashi、Miso都經常喺霆鋒嘅Facebook出現。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）