【東京殘奧】陳浩源勇奪輪椅羽毛球銅牌！ 強忍手傷繼續比賽 落淚感謝媽媽

東京殘奧會日前舉行閉幕典禮，所有賽事均順利完成圓滿落幕！而今屆香港隊亦獲得十分唔錯嘅成績，共獲得2銀3銅。其中喺羽毛球WH2級別榮獲銅牌嘅陳浩源，賽後訪問時忍唔住流下男兒淚，表示好感謝媽媽嘅陪伴，場面令人動容！

Photo from 陳浩源IG

#輪椅羽毛球選手陳浩源奪得銅牌

東京殘奧會正式完結，並舉行閉幕典禮畫上完美句號～除咗精彩嘅賽事之外，運動員堅持不懈嘅精神亦成為咗大家嘅焦點！而代表港隊嘅羽毛球選手陳浩源就喺羽毛球WH2級別榮獲銅牌，比賽期間佢強忍右手抽筋嘅痛楚，以直落2:0擊敗韓國選手金京勳，出色表現同強大嘅意志力受網民大讚。

Photo from TVB

Photo from 有線電視

#訪問提及媽媽時落下男兒淚

陳浩源接受賽後訪問時，表示感謝香港人嘅支持「8點鐘爬起身睇我比賽」。當被問到有冇想特別感謝嘅人時，本身表現冷靜嘅佢就忍唔住落淚，並答謝媽媽一直以來嘅照顧「我不是神奇小子，但我有個神奇媽媽」。佢仲話媽媽一直都希望子女可以出人頭地，佢希望獲獎嘅呢刻可以令媽媽感到驕傲。而媽媽喺疫情期間亦有重病，但媽媽依然鼓勵佢。

Photo from 有線電視

Photo from 有線電視

#13年前嘅意外 令佢人生變得不同！

現年36歲嘅陳浩源於2008年嘅年三十晚於內地工作完打算趕返香港過節之際，不幸遇上車禍，從此失去左腿，命運亦因此被改寫！佢表示媽媽就係佢復原嘅動力，喺意外發生嘅時候，媽媽任職廚師，但放工後依然堅持為佢親手煮飯，風雨不改，就算8號風球都堅持送飯！

Photo from 陳浩源IG

#世界排名第2

發生意外前，陳浩源已經有踢足球同打羽毛球嘅習慣。意外後，佢就下定決心要成為一個輪椅羽毛球選手。2009年，佢就正式加入港隊，並多次於世錦賽獲獎，仲喺2018年亞殘運獲得銀牌。可惜嘅係，由於羽毛球以前並非殘奧嘅項目之一，所以佢一直都未有機會參與奧運呢個世界盛事！

Photo from 陳浩源IG

#愛情長跑 羨煞旁人

除咗媽媽之外，陳浩源亦表示十分感謝妻子嘅陪伴，由佢13年前突然出意外到而家都一直不離不棄喺佢身邊支持佢，「成日受我嘅脾氣，做我嘅出氣袋同樹窿，好開心可以同佢一齊走落去」，甜蜜感情令人羨慕！

Photo from 陳浩源IG

Photo from 陳浩源IG

#3年後再戰巴黎奧運！

而陳浩源透露將會出戰3年後嘅巴黎殘奧，並希望同隊友王鎮炎一齊再次為香港增光。現階段佢認為自己要先好好沉澱心情，「自己應該以咩角色走落去，希望下屆區旗可以因為自己喺最高嘅位置升起」！

Photo from 陳浩源IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

更多相關文章

【東京殘奧】意大利輪椅劍擊天后衛冕成功！ 史上首位四肢截肢劍手 憑超強意志力創下非凡佳績！

31 Aug , 2021

東京殘奧開幕至今已經一個星期，唔少比賽都進行得如火如荼！其中來自意大利嘅輪椅劍擊選手Beatrice Vio（維奧）就因為小時候生病，而需要截肢保命；不過身體上嘅障礙並冇減退佢對劍擊嘅愛，仲喺東京殘奧表現出色，堅毅不屈嘅精神令人十分敬佩！

Photo from Beatrice Vio IG

#11歲時因病截肢

年僅24歲嘅Beatrice Vio（維奧），花名係「Bebe」來自意大利，5歲嘅時候就已經開始學習劍擊。不過，佢喺11歲嘅時候不幸患上嚴重嘅腦膜炎，身體好多部位都受到細菌感染。為咗保住性命，父母同維奧決定截肢，喺3個半月內進行多次手術，並且花整整1年幾嘅時間重新學習行路同埋用義肢，非常努力！

Photo from Beatrice Vio IG

Photo from Beatrice Vio IG

#依然熱愛劍擊

經歷手術後，BeBe繼續練習劍擊，希望延續佢一直以來嘅夢想！失去四肢嘅佢比其他人更難學習劍擊：失去手掌手指令佢需要重新掌握刺激嘅技巧、失去手臂令佢坐上輪椅後難亦平衡等。由於花劍嘅得分部位都係上半身嘅位置，所以非常講求劍擊手如何用手去控制劍尖，而Bebe卻只能夠用義肢握劍，難度更加高。

Photo from Beatrice Vio IG

#靠努力克服身體不足

雖然Bebe學習劍擊嘅路困難重重，但係佢自己就不停諗盡辦法佢彌補身體上嘅不足，例如：加強腹部訓練，等佢可以保持平衡度，並且令佢更加容易控制上半身嘅動作！

Photo from Beatrice Vio IG

Photo from Beatrice Vio IG

#史上首位四肢截肢劍手

經過每日刻苦嘅訓練，Bebe於2015年首度參加輪椅劍擊賽季，並於比賽中脫穎而出，再於2016年里約殘奧拿下女子B級個人花劍金牌！而佢亦係劍擊史上首位四肢截肢嘅劍手，身體嘅缺憾並冇成為佢嘅阻力，反而給予佢動力繼續努力向前行！

Photo from Beatrice Vio IG

#今年有份出戰團體賽！

Bebe越戰越勇，於今年東京殘奧中出戰B級個人花劍以及團體賽。根據輪椅劍擊團體賽嘅規則，每隊都必須排出兩名A級及一名B級選手參賽（A級代表殘疾程度最輕 ），故此當B級劍擊手大多都佔下風。然而，Bebe卻係為團隊奪分嘅B級選手，於分組賽時以5:2擊敗香港「七金劍后」余翠怡，表現出色令人嘆為觀止！

Photo from Beatrice Vio IG

#成功衛冕個人花劍金牌！

最終，Bebe帶領意大利隊伍成功打入團體決賽，可惜不敵中國隊，奪得銀牌；而佢就成功於B級個人花劍衛冕金牌，為自己扳回一城！佢樂觀面對逆境嘅精神，實在好值得大家一齊學習～

Photo from Beatrice Vio IG

Photo from Beatrice Vio IG

相關文章：【東京殘奧】埃及48歲無臂乒乓球手哈馬度創奇蹟 因一事奮力學打球 證明無嘢係不可能！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）