【荃灣打卡新景點！】免費入場！獅頭牆、港式大花牌... 不一樣的打卡位～ 三棟屋香港非遺中心換新look！

三棟屋博物館？細細個就聽過呢個名啦！不過，你去過未呀？如果你覺得呢個有二百幾年歷史嘅客家圍屋只係個介紹客家文化嘅古蹟，小編建議你花少少時間去遊覽一下喇！呢度最近完成更新後全面開放，加入更多藝術同多媒體元素，加埋新展覽系列「循聲覓道——香港非物質文化遺產」，屋外屋內都有唔少打卡位，等小編即刻帶大家去睇下先！

#用聲音去演繹本地傳統節祭文化

大家或者唔知道，三棟屋而家係香港非物質文化遺產中心，上年年底展開大型展覽更新工程，最近各展區終於全面對外開放！全新展覽系列「循聲覓道——香港非物質文化遺產」請嚟咗本地建築師兼藝術家蕭國健擔任客席策展人，以嶄新、創意嘅方式重新演繹本地傳統文化，更特別邀請約30位非遺傳承人參與製作，展品包括獅頭、花牌、丁燈，長衫等等。最獨特嘅地方係大家除咗可以用眼去欣賞展品，更可以用耳仔去感受！即係你睇緊木雕時，會聽到雕刻工具使用時嘅聲音，真係夠晒別出心裁！

Photo from HolidaySmart

Photo from HolidaySmart

#超震撼！現代感獅頭牆

展覽分為3個部分，系列一「香港節慶與民間工藝」位於展覽廳，展品主要同節日、慶典場合有關，包括獅頭同丁燈嘅紮作，仲有神像雕刻。當中最精彩係由25個獅頭砌成嘅獅頭牆，原來每個獅頭，都要經過紥、撲、寫、裝四大工序，分別由上至下展示出嚟，首先係用竹篾紮成獅頭嘅框架，然後撲上白紙，之後兩層係上咗色嘅獅頭，最低一層就係裝飾好晒嘅獅頭。而點解有5隻色？原來係代表《三國演義》入面5個主要人物嘅形象，獅頭牆由左至右分別係黃忠獅、張飛獅、劉備獅、關羽獅，同埋趙雲獅，小編都係第一次咁近距離見到咁多獅頭，梗係要打下卡呃like啦！

Photo from HolidaySmart

Photo from HolidaySmart

Photo from HolidaySmart

Photo from HolidaySmart

 #大開眼界！麻雀、白鐵信箱、花牌製作過程

展覽第2個部分位於三棟屋兩邊橫屋，系列二名為「日常．非常」，當中「日常」係介紹同日常生活息息相關嘅非遺項目製作過程，例如麻雀牌、白鐵器具、點心、蒸籠等等；而「非常」就係關於特定時節嘅活動、表演同技藝，其中最搶眼嘅係慶賀神誕、開張等場合必備嘅大型花牌，平時見到都係掛喺好高嘅地方，今次特別安排放喺視線水平嘅地方，方便大家近距離欣賞師傅嘅工藝之餘，更可以企入去打卡添！

Photo from HolidaySmart

Photo from HolidaySmart

Photo from HolidaySmart

Photo from HolidaySmart

#文青風！傳統建築打卡

展覽第3個部分——系列三「三棟屋與傳統鄉村文化」，利用位於三棟屋中軸線附近嘅4間房舍，展示香港傳統鄉村嘅禮儀同飲食文化、三棟屋嘅歷史以及建築特色——純白色嘅牆、樸素嘅瓦片屋簷、古老嘅小巷、窄長嘅走廊、整齊嘅石磚地，每個角落都好適合打卡㗎，影出嚟嘅相充滿文青嘅氣息，放上IG一定呃到like呀！

Photo from HolidaySmart

Text: HolidaySmart

Photo source: HolidaySmart、非物質文化遺產辦事處

Featured for: 非物質文化遺產辦事處

*本文章的圖片均經其本人或其公司授權，其他媒體不得轉載