老公叫其他女人做「老婆」堅稱無偷食只當對方係妹妹！人妻：係咪我諗多咗？
情侶間會有特別嘅稱呼，但有啲係唔可以亂咁叫！喺討論區有網友指與老公結婚兩年，最近發現佢WhatsApp同人傾得好投契，更互稱「老公老婆」，被發現後丈夫仲堅持只係朋友開玩笑，令網友不禁反省係咪自己諗多咗。
人妻揭老公偷偷與一女性密密WhatsApp
有網友喺連登討論區發文指老公平時放工會同班朋友去練舞跳舞，有時放假都約埋出去，因為大家互相認識，人妻表示一直對好放心。但最近佢發現老公會對住手機笑，雖然內心有懷疑，但老公就指係同上司對話，而且更避開佢同人WhatsApp，令人妻再起疑心！
人妻終發現親密對話紀錄，老公與阿婷稱呼對方做「老公老婆」
除咗WhatsApp外，丈夫跳舞次數多咗，回家時間亦越嚟越夜，終於被人妻發現老公嘅WhatsApp對話紀錄，對象係跳舞活動識嘅女仔，樓主指佢都見過嗰位女性，但唔太熟，聽其他人叫佢做阿婷，但真名就唔知。
樓主指老公同名婷嘅對話用詞非常親密，互稱「老公老婆」，起身、瞓覺、食飯、沖涼等都會互相報備，更會用大量「心心」、「親親」嘅stickers！
老公堅稱只當阿婷係妹妹，未有發展超出友誼關係
人妻睇到嬲爆即刻追問老公，對方竟表示阿婷家庭有問題，又要照顧小朋友，平時大家出來跳舞放鬆，佢只係當阿婷係妹妹，諗住陪下佢，其他朋友都有關心阿婷，反指係樓主諗多咗。
樓主根本唔信：「妹妹需要叫老公老婆？限聚令下孤男寡女可以玩到就黎天光先返屋企？」但老公完全唔覺得自己有錯，堅稱嗌「老公老婆」就好似online game嗰啲稱呼，仲話樓主小題大做。
老公堅持無做錯，人妻不禁反省
樓主又補充佢同老公未有小朋友，雖然大家有討論過但佢想遲啲先生。樓主指老公都有好親密咁稱呼佢，WhatsApp會叫佢做「老婆」、「BB」，但對話嘅模式就有啲唔同。樓主老公指淨係陪阿婷，兩人從未發生關係：「佢話同玩遊戲朋友開玩笑互嗌一樣，稱呼唔代表啲咩喎」
最終擾攘一個月，老公應承唔再同阿婷聯絡樓主先原諒佢，但喺老公多次堅持自己根本無做錯嘅情況下，樓主都忍唔住諗：「係唔係真係我諗多咗？」
網友籲樓主盡快離婚
呢個帖文引起網友熱議，大部分網友睇到對話紀錄已表示對樓主老公嘅解釋感到難以置信：「你咁都信呀？」、「好明顯啦仲問」，更呼籲樓主盡快離婚：「咁都可以原諒佢? 離婚喇」
因為樓主同老公喺疫情爆發前結婚，有網友感嘆：「結咗婚無耐就出去玩真係少少癲」，亦有網友反諷：「唔算啦，我叫樓下個看更都叫老公」
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
老公稱呼女同事做BB 惹老婆不滿「班女要氹」人妻：你都無咁叫過我！
17 Jun 2021
唔少情侶都會用各種肉麻暱稱稱呼對方，但叫錯對象可以好大鑊！最近，有港女網民喺網上討論區大吐苦水，指丈夫為指示女同事做嘢，叫女同事做BB，更聲稱「班女唔氹唔得」。面對老婆對質，男方竟以辭職作威脅，令女事主擔心要承擔債務。女方又指，丈夫從未叫過自己做BB，遂問網民能否理解丈夫做法。
近日，一名女網民於香港討論區發文，直斥丈夫返工時以「BB」稱呼女同事。男方解釋係想氹佢哋完成工作，仲講到「班女唔氹唔得㗎」。女事主反駁，其他人做經理都唔洗咁做，又反問丈夫：「咁你使唔使以身相許啊？」
男方無正面回應不特止，仲威脅妻子：「咁我返去辭職囉！」女方大感震驚，又害怕要承擔債務，直言：「辭職？D債我揹啊？！」
女方繼續批評丈夫對女同事嘅做法，又坦言BB係情侶間先會稱呼，直指男方都無叫過自己做BB。男方解釋，佢要求同事做嘢時才會叫人BB，平時唔會咁做。女方對此感到費解，遂詢問網友：「點解要叫同事做BB？係咪唔叫就做唔到嘢？」
有網民認為事主丈夫與女同事關係非比尋常:「咁仲要問，實有路啦」，甚至直言：「叫多幾次就會有越線行為」。
亦有人質疑男方嘅工作能力，認為要叫人做BB先能夠令人接受指令嘅話，可能代表佢領導能力不足。有其他人則認為男方「肉麻當有趣」。
有另一派網民則認為女事主大驚小怪，仲建議「驚就跟埋丈夫返工」。睇嚟，呢啲網民嘅辦公室好興叫同事做BB。
亦有網民話，本來就有好多職場新人都會被同事叫做BB。
有其他網民則表示想了解男方嘅辦公室文化，認為如果全部人都稱呼對方為BB就可以接受，相反嘅則有問題。
有人則幽默地估計，男方上司都係叫佢做BB.
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
