冼靖峰以沙士疫情開玩笑，被指口出狂言用字極難聽！網友：好黑心
TVB節目《聲夢傳奇》捧出一班學員成為旗下歌手，早前幾位學員就喺網上開live，其中冼靖峰（Archie）突然以2003年「SARS」疫情開玩笑，一句失言惹網民狠批心地差：「你對唔住全香港嘅人！」
聲夢4位學員網上開live唱歌
《聲夢傳奇》播出後成功令炎明熹（Gigi）、姚焯菲（Chantel）、鍾柔美（Yumi）等人得到觀眾關注，佢哋亦陸續於樂壇出道。除咗知名度較高嘅Gigi、Chantel外，其他參賽者都簽約TVB成旗下歌手。
日前其中4位聲夢學員冼靖峰（Archie）、詹天文（Windy）、林智樂（Felix）、蔡愷穎（Lolita）就喺網上開live唱歌，吸引唔少fans收睇。
現場4人有「代溝」，林智樂、蔡愷穎都係2003年出世
期間佢哋都有傾偈，林智樂就指現場4人有3個generation，冼靖峰即表示：「兩個咋嘛！」並指佢同林智樂、蔡愷穎係同一個世代，詹天文係另一個世代。
事實上在場4人以冼靖峰年紀最大，1998年出生，現年23歲；林智樂同蔡愷穎同年，都係2003年出生，今年19歲；年紀最細嘅係詹天文，2006年出世，今年16歲。
冼靖峰一句拎沙士疫情開玩笑，全場愕然
林智樂反問冼靖峰：「你係咪00後？」，之後表示佢同蔡愷穎都係03年出世，此時冼靖峰突然爆出一句：「03年即係咩？即係沙士死剩種呀？」
其他人都好似反應唔切，一臉愕然。而冼靖峰似乎都意識到失言，即時笑住講：「哈哈！講笑啫講笑啫！其實都唔係差好多年」，之後就再次唱歌。
網友狠批佢口出狂言唔識尊重人
但呢個小插曲都被網友發現，仲狠批佢唔應該攞呢啲嘢嚟開玩笑：「03年係令所有香港人惶恐地過，同時好多家庭天人相隔」，直指經歷過沙士嘅人無可能會拎嚟講笑：「無辦法原諒有如此心地差嘅人。」
有網友指冼靖峰嘅細佬都係2003年出生，認為佢只係一時口快快，但亦有人指佢口出狂言：「覺得自己好幽默？」，好唔尊重人。
冼靖峰於聲夢另一直播公開道歉，承認自己唔夠成熟
近日聲夢學員再喺同一平台開第二場live，今次冼靖峰、詹天文都照樣有參加，另外仲有Yumi、Chantel、何晉樂（Rock），喺live尾聲嘅時候，年紀最大嘅Rock就話：「Archie你係咪有啲嘢想講？」
冼靖峰表示：「想講聲對唔住，因為上一個live講咗啲唔應該講嘅說話。」佢指同學員之間私底下成日講嘢都會「有啲over」，但有啲嘢唔應該講就唔應該講，佢又稱明白到自己唔夠成熟，日後會改善談吐舉止。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
更多相關文章
張寶兒被指打扮無品味！參與《聲夢》演唱會/佛祖Kirsten造型設計！盤點12大騎呢穿著
20 Aug 2021
張寶兒最近再為《聲夢傳奇》演唱會嘅15位學員設計舞台造型，同上次商場演出相比，演唱會舞台look係更大挑戰，張寶兒喺IG公開大合照表示：「為15個不同氣質身型的人在一個月內設計高達50個造型更是不容易，感謝Production和經理人願意相信我，給我機會」，老公袁偉豪都留言為佢打氣：「唔係容易，加油寶寶❤️」
不過佢為聲夢一班學員配搭嘅服飾亦唔係個個觀眾都受落，有唔少fans指Chantel同Gigi嘅造型唔太好睇。
張寶兒多次提及自己喺時裝方面無咩相關經驗，佢曾指自己兩年前咩都唔識，著衫又無品味可言，但憑住興趣同兩年嘅勤奮練習，終於有所改變。
其實佢咁耐以嚟有唔少衣著打扮都被指「騎呢」、「唔識欣賞」，即睇以下12個「奇特」造型！
1. 開杈褲腳X青綠色涼鞋
綠色系上衣配牛仔褲，都唔及一雙青草色涼鞋搶眼！
2. 黑色漆皮X白色珍珠
呢身「黑白配」造型嘅亮點係Chanel漆皮袋，為配合Chanel袋，張寶兒唔止著上皮褸，長boot亦係漆皮加珍珠。
3. 蕾絲背心X百慕達西褲
蕾絲背心有落隱若現嘅性感，但配百慕達西褲有種格格不入嘅感覺，外套方面張寶兒試過著奶油西裝外套同絲質裇衫。
4. 古銅色連衣褲X豹紋鬆糕鞋
諗起少林寺18銅人......
5. 性感白背心X桃紅色綁帶高踭鞋
呢身造型最搶眼莫過於「姣pink」高踭鞋，張寶兒更將高踭鞋綁喺褲腳度，好獨特！
6. Oversize牛仔褸X牛仔闊腳褲
呢個牛仔造型十分寛鬆。
7. 雪紡長裙X破洞牛仔褲X皮革手套
斯文嘅雪紡長裙配野性嘅牛仔褲未算突破，加上一雙皮手套，好似啱啱喺屋企洗完碗出門咁。
8. 白色西裝外套X黑T裇X黑長褲X白長boot
西裝外套加T裇帶幾分隨性，黑褲加白boot造成強烈視覺效果。
9. 連身短褲X啡色絲襪X金色長boot
為配合聖誕氣氛，張寶兒致力將自己打扮得金光閃閃。
10. 透明膠質外套X黑色長裇衫X拼色牛仔褲
亮點絕對係件透明外套，十分破格，相信落雨可作雨衣之用。
11. 牛仔外套X黑T裇X杏色長褲
呢個係普通遊客look，整個打扮同pose都好似影緊紀念照咁。
12. 粉紅裇衫X牛仔闊腳褲
呢個造型係比較早期，張寶兒話自己當時咩都唔識，著衫又無咩品味可言，但呢身oversize打扮畀人一種隨意感覺。
張寶兒開始向造型師方向進發，網民對佢經手嘅造型有讚有彈，大家又點睇？
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
