HKTVmall人手短缺或Cut單!網民湧入FB負評「不如搞自行取貨啦」

HKTVmall人手短缺或Cut單!網民湧入FB負評「不如搞自行取貨啦」

時事熱話 生活熱話
By Cheryl on 03 Mar 2022
Digital Editor

第五波疫情嚴峻,好多商鋪都宣布縮減營業時間,甚至停業。而網上超市HKTVmall則在今日(3/3)上載公告,指確診數飄升下人手極為短缺,導致已付款訂單有機會被取消,網民見此即湧入其官方Facebook,怒斥HKTVmall各種送貨及退款問題,怨聲四起。

網上超市品牌HKTVmall今日(3/3)宣布因人手極為短缺,畀咗錢嘅訂單都有機會被取消。Photo from HKTVmall

HKTVmall人手超短缺,顧客或被cut單!

消息盛傳港府會因應全民檢測而實施禁足令,大批市民聽罷即湧到各區超市搶貨,所以近期有不少「貨架空空如也」嘅照片在網上流傳。實體店無貨下,唔少人即轉向網購,唔使同人爭之餘,仲可享送貨服務。不過,知名網上超市HKTVmall今日都終於頂唔住,貼出公告表示,由於疫情嚴重下訂單量同時急升,而確診及隔離個案都上升,即使全體員工已盡力維持運作,前線人手仍極之短缺,而供應商、物流夥伴嘅服務都有延誤或暫停,各種因素加上或將公佈嘅「全民強制檢測」下,已付款嘅訂單有可能被取消。

除咗到實體超市掃貨,好多人亦會到網上超市訂貨。Photo from HKTVmall

HKTVmall發出公告,向客人表示訂單有機會被cut嘅消息和原因。Photo from HKTVmall

官方仍上載不少優惠帖文

早在2月27日時,HKTVmall曾在Facebook上載招聘廣告,聘請職位包括司機、倉務、派貨等等,以臨時解決嚴重嘅人手短缺問題,可惜仍無法追上訂單需求。而官方到今日仍貼出多項優惠,包括「30分鐘送上門」優惠,以及防疫產品優惠等。

HKTVmall早前上載招聘公告,希望減輕人手壓力。Photo from HKTVmall

官方在今天(3/3)仍貼出送貨優惠吸引客人。Photo from HKTVmall

顧客湧入官方專頁表達不滿

但好多受影響嘅客人則非常不滿,紛紛留言控訴官方各種送貨問題,例如「訂單遲遲唔送貨,到呢家仲有機會被cut單」,有顧客稱:「真係送到貨?送咗我嗰個先啦!2月15日落單,今日都送唔到!」,亦有人呻2月24日落單,原定3月5日送貨,豈料被官方取消整張訂單,「係有貨我先落到單,太過分了,我急住用啲日用品!」

顧客到HKTVmall FB page留言投訴訂單情況。Photo from HKTVmall FB

有人仲有兩日就送貨,豈料突然被官方cut單。Photo from HKTVmall FB

廣告
廣告

HKTVmall除了網上商店,仲有開設實體店。Photo from HKTVmall

另有顧客叫HKTVmall:「冇咁大個頭,唔好戴咁大頂帽啦!都瘋狂cut單cut貨,你仲推廣呢啲(優惠)嚟做乜?」、「冇意思,做好呢家堆嘢先啦。」而官方專頁嘅小編回應該客人時,都再次解釋人手短缺原因,又向佢表達歉意,並呼籲客人密切留意帳戶中嘅最新訂單狀態。

有網民叫官方唔好不自量力,搞好訂單先再宣傳。Photo from HKTVmall FB

近日,全港超市都出現搶購情況。Photo from HKTVmall

除此,亦有客人投訴不能自行選擇取消訂單,只可被動等無了期嘅送貨,或被cut單,搞到呢家錢又無、貨又無,就算成功送貨都有機會出錯,向官方申訴也只得到罐頭式回覆,令佢哋大感無奈。

網民不滿投訴都只獲公式回應。Photo from HKTVmall FB

大家能成功搶貨嗎?Photo from HKTVmall

有網民建議讓客人自行到倉取貨

另外,有網民在官方置頂嘅「招聘告示」帖文留言,建議官方讓客人自行到倉庫取貨,「不如你哋睇下可唔可以訂完貨,可以去warehouse取貨啦,香港人有部分都有車,應該會有人願意去取貨,咁樣可以分流送貨同事,同舒緩門市嘅壓力,加油。」呢個建議聽落唔錯,但相信仍會面對疫情風險,能否實行就要再睇官方安排~

有網民提出讓客人自行到倉庫取貨嘅建議。Photo from HKTVmall FB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel