人間嘅美食天堂～超正深水埗第一郡！蟹膏蕃茄湯檬真係好好味啊！

深水埗真係一個搵好西食嘅好地方！最重要嘅係，大部份野食都唔係好貴，而且好好味！！！真係人間嘅美食天堂～
Photo from PressLogic

大熱天下，小編就搵到一間叫做第一郡嘅好野食！真係毫不誇張，呢度嘅野食真係物超所值！十分好味，而且價錢都好平民！呢間小店由2014年開業至今，係家庭式經營！大家真係要好好支持吓～

首先小編要介紹嘅，一定係蟹膏蕃茄湯檬，呢個係店家嘅招牌菜。份量都算多，夠大碗！一上台就可以見到有成半個蕃茄，幾個豆卜，扎肉等等材料！不過最吸睛嘅，就一定係中間一大堆蟹膏！！真係一支大匙更咁大舊，材料認真豐富啊！
Photo from PressLogic

湯底無想像中咁濃，問過員工： 蟹膏本身有加雞蛋，所以先咁大舊！只要同個湯輕輕攪一下，再夾起檬粉一齊吃，口感豐富十足！小編覺得食落口好香～好滿足！而且十分之抵食，真係要再嚟一次啊！
蟹膏蕃茄湯檬 (HK$45)
Photo from PressLogic

除咗個蟹膏蕃茄湯檬，小編亦叫多個越式法包。 麵包好貼心地被切成兩半，內裡塞滿好多材料，包括五花腩、扎肉、肉鬆、蔥絲、紅蘿蔔絲等等⋯⋯真係睇到都覺得抵抗唔到！好肚餓啊！
越式麵包 (HK$40)
Photo from PressLogic

最後，蝦卷都係必試之一。個醬係精萃，好濃郁嘅花生味，好香！不過食個吓就比較狼狽，斯文嘅女仔呢次為咗美食都要mak大個口啦～～～
蝦卷（HK$16）
Photo from PressLogic

呢一間餐廳小編真心推薦！下次記得帶你地嘅吃貨朋友嚟試吓啦～～～
Photo from PressLogic

地址：深水埗荔枝角道315號地舖（港鐵深水埗站 A2 出口, 步行約8分鐘）

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）