李施嬅自爆曾想拒演《金宵2》愛情事業得意卻患病更被陳山聰誤會整容？

By Cheryl on 06 Apr 2022

Digital Editor

藝人李施嬅（Selena）主演劇集《金宵大廈2》於近日首播，戲路甚廣嘅佢除了拍過多套本地電視劇外，又參演多套外地影視作品，在2017年憑美國微電影《Once More》獲封雙料影后。不過佢最近發現患上免疫系統疾病，影響工作之餘，更令拍檔陳山聰誤會佢整容？！

Photo from 李施嬅 FB

李施嬅揚威海外再回巢拍《金宵2》

41歲李施嬅（Selena）兒時曾隨家到加拿大生活，並於2003年回港參加《香港小姐競選》，雖不入五甲但奪得「最上鏡小姐」獎，賽後正式加入無綫。佢拍過多套TVB劇集並多次獲得獎項提名，同時把握機會外闖拍劇，到2013年已赴新加坡參演喜劇《Spouse for House》，2017年更憑微電影《Once More》勇奪兩個外國電影節嘅影后殊榮。

Photo from Illusion Film Productions YouTube

榮升雙料影后嘅Selena機會接踵而來，到2019年佢宣佈離巢大台，並簽約美國經理人公司，同門師姐更包括《Marvel隊長》（Captain Marvel）女主角Brie Larson，之後佢參演於去年播映嘅加拿大電視劇《血與水》（Blood and Water）第二季，當中飾演型格女殺手。

Photo from 《Blood and Water》劇照

坦言曾考慮拒演《金宵2》

唔少觀眾都高興揚威海外嘅Selena回巢拍攝《金宵大廈2》，原來佢本人透露過曾打算婉拒參與續集，原因係覺得《金宵1》受到很多喜愛，所以擔心拍續集會達不到觀眾期望，但最終佢有感自己太愛劇集角色，而且與幕後班底合作愉快，故決定接拍續集。而《金宵》監製葉鎮輝都曾表示過Selena工作繁多，不排除佢無法參演，幸好最後夾到時間成功開拍。

Photo from 埋堆堆微博

李施嬅未婚夫係星級健身教練

愛情方面，Selena早年曾與同劇拍檔鄧健泓交往，最終於2010年頭宣布分手。到了去年，佢宣布將同拍拖3年嘅星級健身教練車崇健（Anson Cha）結婚，Anson嘅客戶群真係星光熠熠，包括周潤發、郭富城、楊千嬅、吳鎮宇、關智斌等。兩人經朋友介紹相識，因為同樣愛行山做運動而相當合拍。據悉，Anson財力雄厚，除了擁逾千萬物業，亦在觀塘開設健身室，每小時收費要2千元起跳。

Photo from 車崇健 Anson Cha IG

陳山聰曾以為患病施嬅整容？！

事業愛情兩得意嘅Selena生活幸福，但健康卻不幸出現問題，佢表示去年眼睛感到不適，更出現「大細眼」，接受過手術惟幫助不大。到最近佢透露患上免疫系統疾病，與韋史密夫（Will Smith）太太珍達（Jada Pinkett）嘅病類似，佢自去年末已需停工留家休養。

Photo from 李施嬅 FB

受病魔困擾嘅Selena更要全數缺席《金宵大廈2》嘅宣傳活動，只能以視像形式現身，同劇拍檔陳山聰在活動表示Selena正接受治療，並大讚佢勇敢公開病情。除此，佢話去年已在飯局上發現Selena「大細眼」，當時唔知情嘅佢仲以為對方整容！唔少粉絲聽到情況都為Selena感擔憂，並希望佢早日康復回復精神。