劉浩龍到訪澳門見大三巴零遊客，開心自拍：好鍾意冇人嘅澳門

娛樂新聞

By Jennifer on 13 Apr 2022

Digital Editor

疫情下多地實施防疫政策，入境需接受隔離，旅遊業大受打擊。劉浩龍（師兄）日前為工作前往澳門，隔離完後四出打卡，平時嘅熱門旅遊景點大三巴喺疫情下變得「空蕩蕩」，劉浩龍即興奮自拍：「好鍾意冇人嘅澳門」

Photo from 劉浩龍 IG

劉浩龍因工作前往澳門接受隔離

新冠疫情持續，入境澳門需「接受14天醫學觀察及7天嚴格自我健康管理」，劉浩龍早前因工作前往澳門，佢每日堅持喺酒店房跑足5K。

Photo from 劉浩龍 IG

原來呢次係佢第五次隔離，到出關當日佢亦興奮到跳起！隔離完佢就開始四出歎澳門美食，又行勻多地，心情似乎唔錯。

Photo from 劉浩龍 IG

大三巴零遊客，劉浩龍歡呼：好鍾意冇人嘅澳門

劉浩龍更到訪澳門旅遊勝地「大三巴」，大三巴作為澳門地標，以往有大批遊客前往打卡，連大三巴前嘅階級都坐滿人。不過依家疫情期間，多地旅遊業大受打擊，遊客人數大跌，大三巴亦不如以往熱鬧。

Photo from 劉浩龍 IG

但劉浩龍卻表現興奮，大讚：「好鍾意冇人嘅澳門」，又晒出打卡照：「自拍都無人阻住」，有人認為劉浩龍見澳門旅遊業不景氣仍出此言論十分不恰當：「攞景定贈慶？！」亦有網民指佢只係講出心底話，其實好多人都有同樣想法，只係因為劉浩龍係公眾人物先會被放大。

Photo from 劉浩龍 IG

曾於Facebook稱「污糟手」影響食慾惹不滿

早喺2015年劉浩龍就曾經因為喺Facebook發文惹網友不滿，當時佢上載一張黑色雙手嘅照片，稱自己食麵時看到呢一對「污糟嘅手」影響自己食慾，又附上佢嘅新歌MV link，疑似宣傳。

Photo from 劉浩龍 Facebook

網民直斥佢為宣傳新歌唔尊重靠勞力賺錢嘅人，事件更引嚟唔少品牌出post「抽水」，之後劉浩龍刪走有關圖片並正式道歉：「就今天下午的post，我一番表達得不清楚的言論令大家有另一個詮釋的空間，請容許我在這裡向大家致歉。希望大家明白，我是非常尊重所有基層的工作人員。明白到他們每一滴汗水都是為着推動香港，香港得以繁榮安定，他們絕對功不可沒。」佢表示自己有潔癖，又話日後會慎言。