【打卡好去處】藝術 X 科學新概念!維港兩岸打卡新熱點帶大家重新體驗藝術!

【打卡好去處】藝術 X 科學新概念!維港兩岸打卡新熱點帶大家重新體驗藝術!

香港好去處 香港展覽
By karen.ko on 25 Jun 2022
Digital Editor

藝術無疆界,當藝術遇上科學,又會擦出點樣嘅新火花呢?喺「香港賽馬會呈獻系列:藝術有理」一定搵到答案!小編早前經過添馬公園同中西區海濱長廊嘅中環段,發現呢個由康文署主辦、由香港賽馬會獨家贊助嘅展覽!佢係「藝術@維港」嘅項目之一,有13個藝術裝置,重點就係重新詮釋藝術、科學同科技之間嘅微妙關係,真係好吸引!小編就揀咗最特別嘅5組作品介紹俾大家~立即一齊睇睇啦!
 

#《愛回家》 — 齊齊關愛地球

《愛回家》Photo from 康文署

小編一直都想同海龜暢泳,見到《愛回家》呢個龜形嘅藝術裝置當然份外雀躍!龜除咗寓意「長壽」外,亦因為成年海龜會返去自己出世嘅海灘孵蛋,而令人聯想起愛回家嘅感覺。呢個巨形裝置嘅靈感來自龜殼嘅六邊形數學結構,而主體就使用結構工程軟件,以計算出來嘅參數(Parameters)用不鏽鋼製成框架,並髹上香港紫荊花嘅顏色,上面覆蓋利用彩色有機玻璃製成嘅世界地圖,寓意「關愛地球」。呢隻巨龜嘅腳蹼化身成環保木製成嘅長凳,表面仲要符合人體工程學,梗係要坐喺度Selfie啦!大家記得喺現場Scan QR Code Download專屬嘅App,就可以隨意改變燈光嘅顏色,夜晚嚟真係超驚喜!
 

#《山水風光》 — 香港山嶺嘅縮影

康文署Photo from 《山水風光》

大自然靈感處處,一草一木都可以為藝術同科學帶來創意!呢件作品就用科學演繹自然景觀,利用熱能同溫度創造出多種顏色嘅氧化金屬花朵,高低起伏嘅花海就好似香港嘅山脈一樣!喺唔同位置同角度欣賞,花朵顏色會產生變化,象徵大自然係無盡幻變!入黑之後,鵝卵石就會發光,令你好似置身喺夜間嘅大自然,有種神秘感!
 

#《不可見的連繫》 — 用AR體驗精彩多元子結構世界

《不可見的連繫》Photo from 康文署

大家有冇諗過睇科學 X 藝術嘅展品都可以用埋AR技術?小編一開始就話咗藝術無疆界啦!今次仲帶大家返去公元前360年,希臘哲學家柏拉圖喺佢嘅語錄《蒂邁歐篇》(Timaeus)中曾假設某啲細微嘅物質有佢獨特嘅幾何結構。隨著科學嘅發展,化學家同物理學家發現物質可以一直分割,直至變成分子;分子可以由一個或多個原子所構成,原子之間依靠引力維繫,正正豐富咗柏拉圖當時嘅想像!大家可以透過AR嚟體驗色彩繽紛嘅多元分子結構世界,同時感受物質結構內嘅引力變化!
 

#《風度》 — 捕捉風嘅美態

《風度》Photo from 康文署

小編去到呢個裝置嘅時候,真係忍唔住駐足欣賞!最吸引嘅係佢會對應空氣流動嘅方向同速度而產生變化,創造出一個迷人且多變嘅景象,來捕捉風嘅美態,全靠佢上面裝嵌嘅一組組捕風儀器嘞!睇完呢件作品,除咗滿足大家對科學知識嘅好奇心之外,仲會好治癒𠻹!
 

#《夢想實驗號》 — 記住香港精神

《夢想實驗號》Photo from 康文署

呢個由兩對機翼同單車組成嘅藝術裝置,靈感顯而易見,就係啟發自飛機嘅機械原理!大家只要騎上架單車不斷踩,就會帶動機翼慢慢咁上下拍動,機翼嘅紅色線條好似有種神奇力量,驅使你堅持腳步不停踩,要咬緊牙關振翅飛翔!千里之行,始於足下,不禁令人諗起香港精神!
 
除咗添馬公園嘅由香港賽馬會獨家贊助嘅「香港賽馬會呈獻系列:藝術有理」之外,K11、嘉里集團及信和集團亦有參與「藝術@維港」,喺尖沙咀及紅磡海濱一帶展出唔同嘅藝術作品。K11喺K11 MUSEA海濱、星光大道及梳士巴利花園展示以「未來交響樂」為主題的藝術裝置及數碼作品;嘉里集團就喺九龍香格里拉及香港嘉里酒店外牆展示名為「綻放香港」嘅數碼藝術;信和集團喺尖沙咀中心、帝國中心及中港城設置大屏幕數碼影像「心連心」。事不宜遲,快啲約埋好友、另一半或家人一齊去感受一下呢股藝術 X 科學嘅新力量啦!

 

「藝術@維港」
日期:即日至12月18日
網站:artatharbour.hk

 

康文署呈獻「香港賽馬會呈獻系列:藝術有理」
場地:添馬公園及中西區海濱長廊(中環段)(獨家贊助機構:香港賽馬會)
網站:http://www.scienceinart.hk
 
K11呈獻「未來交響樂」
場地:K11 MUSEA海濱、星光大道及梳士巴利花園
 
嘉里集團呈獻「綻放香港」
場地:九龍香格里拉及香港嘉里酒店外牆
 
信和集團呈獻「心連心」
場地:尖沙咀中心、帝國中心及中港城設置

 

Text: HolidaySmart editorial
Photo Source: 康文署
Featured for: 康文署

 

*本文章的圖片均經其本人或其公司授權,其他媒體不得轉載

註:所有作品內容均由主辦單位/創作團隊獨立製作,並不代表香港賽馬會呈獻系列及贊助機構之立場或意見。

 

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel