YouTuber arhoTV備受爭議,被爆向觀眾賣淘寶貨?推出NFT不受年齡限制,被批誤導中小學生?!

YouTuber arhoTV備受爭議,被爆向觀眾賣淘寶貨?推出NFT不受年齡限制,被批誤導中小學生?!

時事熱話 生活熱話
By Stephanie on 27 Jun 2022
Digital Content Writer

Youtube頻道「arho TV」嘅情侶KOL Sunny及Creamy近來是非不斷,早前已經因為未有限制NFT購買人嘅年齡而被網民批評。最近,佢又再被網民大爆居然出售淘寶貨,形象受到打擊;現時佢哋似乎暫時「潛水」,對上一次更新影片嘅已經係2星期前!

YouTuber Sunny同女友Creamy最近備受網民熱議,早前繼NFT事件後,近日再被網民爆出喺淘寶訂製自家產品?!Photo from Sunny IG

YouTuber Sunny+Creamy陷入爭議?!

Youtube頻道「arho TV」係KOL Sunny所創立嘅頻道,訂閱人數高達約51萬,係YouTube界都算小有名氣!而佢拍攝嘅影片類型都係以日常生活為主,例如:試食、挑戰影片等,並且經常同女友Creamy一齊拍片,大晒恩愛。

「arhoTV 」YouTube頻道現時大約擁有51萬訂閱者,算係大家廣為熟悉嘅Youtuber之一!Photo from arhoTV @YouTube

頻道大多以拍攝日常影片為主,仲會有「巨大化」系列嘅挑戰影片!Photo from arhoTV @YouTube

網民大爆用淘寶訂造自家產品!

最近,有網民就大爆Sunny疑似喺淘寶訂製咕𠱸,並公開與淘寶店主嘅對話紀錄。只見該網民嘗試用Sunny自家設計嘅公仔詢問淘寶店員,而店員就透露「這個圖我記得」;不過隨後店家表示由於設計圖片太模糊要求清晰版本,而網民就疑似將Sunny嘅淘寶帳號講出,之後店家回覆「有圖,要幾個」,似乎暗示緊佢哋可能真係透過淘寶訂製自家設計嘅物品?!

有網民喺討論區大爆Sunny疑似於淘寶訂造自家製cushion?!Photo from 連登討論區

網民仲公開同淘寶店舖職員嘅對話紀錄!Photo from 連登討論區

 而網民就講出疑似係Sunny嘅淘寶帳戶,而店家亦成功搵到相關產品嘅圖片?!Photo from 連登討論區

過往曾揚言絕對不用淘寶貨!

唔少網民見到之後都批評自家產品嘅設計,指「食水真係好深」、「香港人真係好識搵錢㗎」等;部份網民批評佢哋呃觀眾,因為過往佢哋曾公開表示「唔會買淘寶」!

網民見到對話內容後都忍唔住批評Sunny過往嘅設計!Photo from 連登討論區

過往佢曾拍片表示唔會購買淘寶貨,所以先令網民今次咁嬲!Photo from arhoTV @YouTube

部分網民認為問題不大!

同時,部份支持Sunny嘅網民認為以上對話內容有機會係網民P圖後嘅對話;亦有網民覺得現時唔少產品都係內地製作,只要佢哋唔係抄其他人嘅設計就冇問題!

部份網民認為Sunny並冇做錯,只係選擇咗用淘寶訂造自家產品Photo from 連登討論區

二人暫時「潛水」?!

喺事件曝光後,二人暫時都唯有喺IG出post,而本身會定期更新嘅YouTube頻道都已經2個星期未有更新。不過有網民就疑似公開二人喺粉絲Discord群組中嘅對話,佢哋都坦承今次事件對佢哋嘅打擊非常大,導致自信心大受打擊,似乎需要啲時間先能夠再出現係觀眾面前喇!

有網民張貼疑似係Sunny喺Discord群組中講嘅嘢,指現時心情大受打擊!Photo from 連登討論區

早前推出NFT已經備受爭議!

其實早前Sunny同Creamy因為推出NFT而引起爭議,每一個嘅售價大約係0.088ETH,不過網民最感到不滿嘅係佢哋強調購買NFT係唔受年齡限制,亦即係未成年嘅觀眾都能夠喺購買NFT!

arho TV早前仲推出NFT!Photo from arhoTV @YouTube

不過佢哋表示購買NFT將不會受年齡限制,瞬間引起爭議!Photo from arhoTV @YouTube

強調沒有年齡限制而惹怒網民!

由於佢哋本身嘅觀眾都有唔少係年紀比較輕嘅中小學生,觀眾就擔心會因此而誤導年紀少嘅觀眾「啲小朋友根本都唔清楚咩係NFT」、「咁都講得出,對你哋好失望」等,認為佢哋為咗賺錢居然連年紀輕嘅觀眾都「唔放過」!

網民批評Sunny強調NFT不受年齡限制,好容易令年紀較少嘅觀眾有所誤會!Photo from arhoTV @YouTube

事後拍片道歉,並更改購買NFT人士年齡必須夠18歲!

不過,Sunny同Creamy後來就拍片解釋重申希望大家係支持佢哋嘅藝術品而購買,並揚言唔鼓勵大家炒賣NFT!而佢哋亦新增限制將購買者嘅年齡提升到必須年滿18歲,並再三向觀眾道歉。

Sunny同Creamy事後拍片加以解釋,並向觀眾道歉!Photo from arhoTV @YouTube

佢哋表示已經將NFT購買者嘅年齡限制提升至18歲!Photo from arhoTV @YouTube

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

盤點過往8位YouTuber 黑歷史!人紅是非多?!有一半已經停更頻道

1 Feb , 2022

YouTuber呢個職業已經變得越來越普遍,而近日雪姨就因為「盆菜」事件而引發公關災難激嬲一眾網民!其實過往亦有唔少YouTuber都因為言論或者行為而搞到形象插水,等我哋一齊重溫一下啦!

其實過往有唔少YouTuber都曾經惹怒網民,而家即刻睇下有邊幾位啦~Photo from Pumpkin Jenn IG

1.雪姨

有「富貴KOL」之稱嘅雪姨早前因為將2間酒店同茶餐廳嘅盆菜作出比較,令唔少網民認為測試並唔公平,因此而惹起網民一面倒嘅負評。雖然兩度喺社交平台上道歉,但都未能平息大家嘅怒火!

雪姨日前上載嘅盆菜試食影片,獲得網民一面倒負評!Photo from 雪姨YouTube

雖然雪姨道歉並且將影片下架,但都未能平息網民嘅怒火!Photo from 雪姨IG

就連佢有份籌備嘅新年「大乾爹」市集都因此而掀起退租潮,而雪姨最終亦決定:所有檔主都獲退還全額租金及有權選擇是否繼續參與市集;仲會將所有收益捐俾有需要嘅團體!

廣告
廣告

雪姨有份籌備嘅大乾爹市集亦受影響,後來佢就宣佈所有收益都會捐俾有需要嘅人!Photo from 雪姨IG

2.Pumpkin Jenn

Pumpkin Jenn 以分享美妝以及穿搭為主,豪爽以及陽光嘅形象成功吸引一班粉絲~但係就曾經被網民指責佢嘅藝術畫作疑似抄襲外國創作者,令唔少網民因此而感到反感!

Pumpkin Jenn以分享穿搭以及美妝為主。Photo from Pumpkin Jenn IG

有網民就指佢過往嘅藝術畫作同外國嘅藝術家非常相似,疑似有抄襲成分?!Photo from Pumpkin Jenn IG

事後佢一度停止經營自己嘅YouTube頻道,不過現時已經再度活躍於Youtube,仲同朋友一齊投資過百萬嘅自家護膚品牌。而佢2020年就已經獲男友歐喬鋒(Tyrese)@天堂鳥求婚,據悉二人正為籌備婚禮而努力賺錢中。

佢現時係歐喬鋒(Tyrese)@天堂鳥嘅未婚妻!Photo from Pumpkin Jenn IG

3.Ming仔

Ming 仔因為上載《今日freestyle:每天自戀多一些》而獲得網民們嘅關注,訂閱人數曾經高達50萬人!其後,佢亦獲邀涉足影視界,包括客串電視劇《溝女不離三兄弟》、《三不如三》以及主持旅遊節目《一個人去旅行》。

Ming仔憑著拍攝《今日freestyle》系列影片而為人熟悉!Photo from Ming仔IG

最高峰時期嘅佢一度擁有50萬粉絲訂閱頻道!Photo from Ming仔IG

2019年,Ming仔因為喺直播中多次失言,惹怒一班一直支持佢嘅粉絲,頓時痛失10萬粉絲。直到,現時佢依然會定時喺頻道上載影片,但熱度已經不如以前!

2019年,Ming仔喺直播中多次失言,令佢失去至少10萬粉絲!Photo from Ming仔IG

4.Alicehaha

Alicehaha 係一位美妝YouTuber,仲經常同網民分享好用嘅彩妝或者日用品等。後來,佢曾經嘗試經營網店,並且售賣疑似係高仿嘅外國品牌餐具俾客人,被網民批評「食水超深」!

Alicehaha 經常都會同大家分享日常生活,吸引唔少網民觀看!Photo from aliceha IG

後來,佢被網民發現疑似出售高仿外國品牌餐具,引起熱議!Photo from aliceha IG

另外,已經結婚成為人母嘅Alice仲被網民指責佢育兒方式,包括:餵人奶期間食減肥藥、將兒子放入漆黑房間「鎮定情緒」等都引起網民爭議。現時佢已經有接近1年時間冇更新過自己嘅頻道以及社交平台!

成為人母後嘅Alice就有向大家分享育兒心得,但佢嘅湊B方法都受到網民質疑?!Photo from aliceha IG

5.屎萊姆

屎萊姆初時因為上載自己打機嘅影片而為人熟悉,後來就拍攝各種唔同嘅影片,例如:試食、旅遊、日常Vlog等。不過自從被遊戲實況主慕容大爆壟斷香港YouTube界利益,仲嘗試控制網絡輿論,引起網民熱議!

屎萊姆被慕容直指壟斷香港YouTube界嘅利益,並且幕後擁有好強大嘅後台!Photo from 屎萊姆IG

而影片中提及屎萊姆幕後有好強大嘅後台,包括:電競公司CGA、英皇、政府等,以及同佢合作嘅一班網紅簡稱「屎家軍」!其後,屎萊姆就拍攝影片一一否認事實,但就由於態度囂張,令網民對佢更加反感。自從該事件後,佢就再冇喺YouTube上載影片,但依然有更新IG!

 屎萊姆拍片為自己作出澄清,但有網民就認為佢態度唔好!Photo from 屎萊姆的3次元 @YouTube

現時屎萊姆暫停更新YouTube,但就有關繼續於IG po相,分享同妻子以及仔仔嘅生活!Photo from 屎萊姆IG

6.「大佬B」呂倩萍

被稱為「大佬B」嘅呂倩萍係元老級嘅美妝YouTuber,過往因為模仿明星嘅妝容而出名,曾擁有逾20萬粉絲。後來,佢就開始創建自己嘅美容生活品牌,但就被網民指佢嘅其中一款隱形眼鏡同日本品牌非常相似,不過佢堅稱只係包裝相似,唔願意道歉,引起爭議!

「大佬B」呂倩萍可以話係最元老級嘅美妝YouTuber!Photo from brenlui @IG

大佬B所出售嘅隱形眼鏡同某日本品牌非常相似,但佢就堅稱只係包裝似,引起網民反感!Photo from brenlui @IG

除此之外,佢仲因為喺香港《多啦A夢》配音員林保全逝世嘅時候,拍攝化妝影片扮「叮噹」,令唔少網民都認為佢嘅行為係唔尊重逝者!

而「大佬B」呂倩萍曾經喺多啦A夢配音員林保全逝世時,上載多啦A夢化妝影片,令大家都覺得佢利用話題增加自己點擊率!Photo from 連登討論區

7.Yaki Wong

Yaki Wong表示自己曾經整容逾30次,亦多次喺影片中講述有關嘅資訊,大膽豪爽嘅作風成功吸引唔少網民觀看影片。

Yaki Wong 坦承自己16歲嘅時候開始整容,至今已經整容多達30次!Photo from Yaki Wong IG

佢直率大膽嘅作風成功吸引一班網民收睇佢嘅影片!Photo from Yaki Wong IG

不過有網民就認為佢過度鼓吹瘦身,仲經常喺影片中買廣告等,曾經一度成為網民熱議嘅對象。事到如今,佢已經接近1年冇更新過頻道,並且努力經營自己嘅醫美生意!

但有網民就認為佢過度推崇瘦身以及醫美,令佢一度成為討論區熱話。Photo from Yaki Wong IG

8. Spoon

Spoon以分享美妝以及服裝為主,憑著多樣化嘅風格成功吸引唔少女粉絲,亦獲邀出席唔少品牌活動。後來,佢喺IG出售自己嘅二手衫,但就被網民發現佢刻意抬高售價,引起網民不滿!

Spoon主要以分享美妝以及穿搭影片,仲經常獲邀出席品牌活動。Photo from khengchan_ @IG

佢曾經喺IG向網民出售二手衫,被發現抬高價錢售賣,令網民不滿!Photo from khengchan_ @IG

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel