新娘婚禮用學歷分枱被轟歧視，稱避免不熟的人同桌，網民意見兩極

結婚擺酒有好多細節都要一對新人討論，而婚宴座位安排更係要諗好耐嘅問題，有位新娘就忽發奇想，諗到將賓客嘅座位根據學歷劃分，博士同學一枱、碩士同學一枱、大學同學一枱，但大陸網友係見到之後高呼新娘有「學歷歧視」！

Photo from 《我要做model》劇照

根據內地傳媒報導，山西有一對新人係今個月3號舉行婚宴，不過現場照一曝光就引起內地網友熱議！因為新娘為免同枱嘅人唔熟會尷尬，將唔同求學階段認識嘅同學安排係同一枱，加上用紅色卡片寫上咁醒目嘅字眼，想令人睇唔到都難！有網友見到後就認為來賓分桌有名單就好，新娘呢個做法同係枱上擺名牌一樣，完全係學歷歧視，更話：「熟悉的也就自己聯繫坐一起了，新娘這操作大可不必，太過用心了」，並表示「如果我是她國中同學，絕對不入座馬上離開」，網民似乎不滿新娘多此一舉！

Photo from 微博圖片

不過亦有網友表示呢個分法非常貼心，認為係婚宴上同唔熟甚至唔識嘅人同枱，除咗尷尬仲係尷尬！咁樣分枱會令場面更加熱鬧，仲話「說不準還有人這樣找到伴侶」。有人就笑言如果新娘係學歷前加上頂尖學府嘅名，例如「新娘哈佛博士同學桌」、「新娘北大碩士同學桌」，可能就唔會引發爭議！仲有人表示「小學同學又不代表沒有博士」，而且牌上寫明只係「同學」，而唔係學歷！有網民更加為新娘反擊「沒學歷才會覺得人家學歷歧視吧」，表示完全唔明有啲咩好爭議。

Photo from 微博圖片

因為事件發酵得太厲害，新娘嘅朋友亦出黎為新娘護航，佢表示，新娘嘅初衷係希望大家可以藉呢個機會多啲傾偈聚下舊，而且係擺酒前已經通知過所有人座位安排，所以整場婚宴都相當完美，在場嘅人並無人覺得被學歷歧視！

Photo from 微博圖片

中式婚宴多數以尊右原則、男左女右安排入座位置，亦會依賓客嘅性質、背景黎分座位，而越靠近新人嘅枱代表同新人關係愈熟識，所以由近至遠多數以至親、好友、朋友、同學、同事排列。呢位新娘嘅座位安排的確比可以避免一班唔識但都係新娘同學嘅賓客坐埋一齊呀，亦比只寫上「同學」更容易令賓客搵到座位！

Photo from 《羅雀高飛》劇照