台中著名景點彩虹眷村遭破壞，完整還原事件始末！今年初當事人同「彩虹爺爺」曾經有爭吵？

By Stephanie on 02 Aug 2022

Digital Content Writer

台中著名旅遊景點「彩虹眷村」近日驚傳被破壞，當中多面牆身被油漆覆蓋，令唔少網民知道後都非常憤怒。而98歲嘅「彩虹爺爺」黃永阜得知後感到痛心，怒斥彩虹文創執行長魏丕仁嘅行為，亦令成件事嘅起末曝光於大眾面前！

Photo from 《綜藝玩很大》

台灣旅遊熱點「彩虹眷村」被破壞

根據台灣媒體報導，由於「彩虹眷村」已經有50年屋齡，牆身都開始出現龜裂問題，所以台中市政府計畫喺8月開始為彩虹眷村進行加固修葺，並要求「彩虹文創」於7月底前遷出。然而喺修復工程開始前，卻被發現至少6面牆身被人用紅色、藍色等油漆覆蓋，令本身獨特嘅畫作全部消失！

Photo from 台視新聞

「彩虹文創」負責人發起塗漆行動？！

經過深入調查後，發現破壞者居然係「彩虹文創」嘅負責人魏丕仁！佢喺30號當日帶同兒子及14名員工一齊到達現場，將「彩虹爺爺」嘅畫作一一覆蓋。據悉佢哋係不滿市政府要求佢哋遷出，唔顧及佢哋嘅生計問題，所以就用塗漆嘅方式表達不滿，並且堅稱「塗鴉的都不是爺爺畫的！」

Photo from 台視新聞

Photo from TVBS新聞

揚言只係想藉此表達不滿

負責人魏丕仁表示「彩虹文創」自2013年進駐彩虹眷村，期間有份支付高達400萬台幣（約港幣100萬）嘅維修費用，仲揚言「彩虹爺爺」一早就已經將畫作著作權交咗俾佢。而佢解釋喺7月24日先得知要封村嘅消息，表示非常錯愕，嘗試與文化局溝通，最終只能下作出「塗鴉」嘅行動以喚起大眾關注「是非對錯交給大眾自己去評斷。」

Photo from 彩虹眷村FB

98歲彩虹爺爺超傷心！

而最傷心嘅莫過於一手一腳親自畫畫嘅98歲嘅「彩虹爺爺」黃永阜，佢受訪時難過表示一輩子嘅心血一夜盡毀，直斥魏丕仁父子嘅行為惡劣！而網民都對於「彩虹文創」如此行動感到憤怒，認為想表達不滿都唔應該影響到爺爺原創嘅畫作「文創公司一點也不文化」、「得不到就要毀掉它？！」等。

Photo from TVBS新聞

Photo from 彩虹眷村FB

過往「彩虹爺爺」夫婦與「彩虹文創」有紛爭？

其實近年彩虹眷村屢受爭議，「彩虹文創」嘅魏丕仁與「彩虹爺爺」黃永阜夫婦曾經發生爭執。今年初，彩虹爺爺嘅妻子廖漢秀批評對方本身承諾每個月都會俾15％利潤以及3萬台幣作為生活費，但一直以來都指沒有獲得利潤，而且只係俾2萬台幣佢哋，與當初嘅承諾有落差！

Photo from TVBS新聞台

「彩虹眷村」靠爺爺畫作救返！

位於台中市南屯區春安里嘅「彩虹眷村」喺2008年嘅時候面臨拆卸危機，當時居住喺該村嘅黃永阜喺等待拆卸期間用畫筆喺牆上畫畫。色彩繽紛嘅畫作成功吸引到訪市民嘅目光，喺2010年嶺東及弘光科技大學嘅師生發起「搶救彩虹村」活動，引起網民熱議！雖然彩虹村未能成為文化資產，但就被命名為「彩虹藝術公園」，成功得以保留。