肥媽20歲大孫女樣貌曝光!二人笑容及眼神超相似,獲網民大讚靚女!

肥媽20歲大孫女樣貌曝光!二人笑容及眼神超相似,獲網民大讚靚女!

娛樂新聞
By Stephanie on 08 Aug 2022
Digital Content Writer

68歲肥媽(Maria Cordero)近年開設YouTube頻道,不時上載煮食教學及日常生活影片。最近佢透露20歲嘅大孫女從英國返港,並同對方一齊拍片;不過孫女嘅外貌同肥媽非常相似,無論係笑容定眼神都有幾分相似,獲網民大讚靚女!

肥媽拍片表示大孫女從英國回港探望佢,而孫女嘅樣貌同佢簡直係餅印!Photo from 肥媽IG

肥媽經歷2段婚姻

肥媽(Maria Cordero)過往曾經歷2段婚姻:喺1972年與大佢22年嘅菲律賓酒廊鋼琴師結婚,不過男方婚後1年就失業,賺錢養家嘅重任落喺肥媽身上。而肥媽曾透露第一任丈夫要求佢一出糧就俾晒啲錢佢,後來對方仲偷食女傭;最終肥媽喺1989年離婚,獨立撫養6名子女!

肥媽18歲嘅時候與大佢22年嘅菲律賓丈夫結婚,不過二人喺1989年離婚。Photo from 肥媽IG

其後肥媽努力工作,撫養6名子女Photo from 肥媽IG

第二任丈夫不幸患上癌症

其後肥媽喺1999年再婚,據悉對方係細佬嘅同學Rick任職工程師,但對佢嘅家人愛護有加,成功打動肥媽~二人感情恩愛,曾3度舉辦婚禮。喺2017年Rick確診患上末期肺腺癌,需要長期進出醫院;肥媽曾透露醫藥費高達逾600萬,不過佢一直在旁支持丈夫,直到2020年丈夫不敵病魔離世。

肥媽喺1999年與Rick再婚,二人結婚多年都依然超恩愛~Photo from 娛樂新聞台

不過2017年,丈夫不幸患癌;直到2020年不敵病魔去世,令佢好傷心Photo from 肥媽IG

與大孫女久別重逢!

雖然經歷丈夫離開嘅傷痛,不過肥媽依然有6名子女及13個乖孫陪伴佢~日前,肥媽透露佢大孫女從英國返香港探佢,二人已經幾年冇見久別重逢,而佢就帶孫女去飲茶聚舊,場面溫馨。肥媽透露大孫女兒時花名叫「攣毛」,因為天生就擁有一頭曲髮,同自己一模一樣。唔少網民都大讚孫女五官標緻,非常靚女!

肥媽表示大孫女同佢一樣天生曲髮,所以細個嘅時候叫「攣毛」Photo from 肥媽YouTube

好多望你都大讚孫女靚女,笑容甜美~Photo from 肥媽YouTube

大孫女與肥媽超似樣?!

而肥媽表示大孫女係「老五嗰大女」,今個月2號過完20歲嘅生日;而在旁嘅友人都忍唔住大讚二人嘅笑容同雙眼十分相似!雖然大孫女睇落完全係一位外國人,不過佢能夠講得一口流利嘅廣東話,十分厲害。而孫女性格乖巧,平時會喺爸爸經營嘅餐廳幫手洗碗,亦鍾意打hockey,難怪肥媽咁疼愛佢啦~

而幫手拍片嘅友人表示孫女同肥媽嘅雙眼同笑容超似!Photo from 肥媽YouTube

孫女平時去爸爸開嘅餐館幫手洗碗,令肥媽超心疼!Photo from 肥媽YouTube

早前表示確診,透露隔離期間出現幻覺?

今年6月中,肥媽喺社交媒體透露自己確診嘅消息,仲拍片同大家分享隔離嘅生活。從影片中所見,佢不停咳嗽面色蒼白,似乎有啲辛苦,但佢就報平安「唔停咁飆汗,一日要換四次衫,不過第3日已經好返好多」最終佢隔離9日後痊癒!其後佢受訪時透露隔離期間相當難熬,第4日開始忍唔住喊、出現幻覺,並憶起亡夫忍唔住同佢隔空對話。

今年6月中肥媽確診,並拍攝影片分享自己生病經過Photo from 肥媽YouTube

其後佢透露因為成日困喺房,所以第4開始「頂唔順」,仲開始亡夫對話?!Photo from 肥媽YouTube

痊癒後歌聲依然響亮!

廣告
廣告

好彩肥媽「出關」後,身體及精神上都完全恢復。喺上個月16日,佢出現《明愛暖萬心》獻唱《上海灘》,歌聲依然中氣十足,並冇因此受影響!相信宜家有埋孫女嘅陪伴一定「滿血復活」喇~

不過肥媽狀態已經恢復返晒,上個月喺慈善活動獻唱時,歌聲中氣十足!Photo from TVB

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

肥媽自爆退休一個人搬返大陸住,力撐契仔陸浩明有才華唔怕冇job!網民:咁鍾意食淡水魚生,啱晒佢喇!

2 Mar , 2021

早前正式以 TVB 高層身份回歸嘅曾志偉一回巢就即時全面整頓余詠珊及何哲圖嘅職務,而當年跟隨余詠珊過檔嘅藝人陸浩明、黃翠如、洪永城等亦有機會受到影響,近日就有傳陸浩明(6 號)有份主持嘅《後生仔傾吓偈》將會係繼《聲夢傳奇》後,另一個被嗌停嘅節目,個個人心惶惶。但 6 號除咗主持依個節目外,佢仲有同肥媽合作飲食節目《食平D》系列,仲因此上埋契成為「母子」。肥媽日前出席活動時就力撐契仔,更指自己唔擔心自己會受到影響。

有傳陸浩明(6 號)有份主持嘅《後生仔傾吓偈》將會係繼《聲夢傳奇》後,另一個被嗌停嘅節目。

喺活動中肥媽透露自己喺大陸已有 5 個物業揸手,並計劃退休後一個人自住,部份就送畀子孫。而喺 5 個單位中,其中一個 1000 呎嘅頂樓連天台單位肥媽就係留畀自己住嘅,將來退休後就可以喺天台種菜,但肥媽就講明唔會同子女一齊住︰「我不會和仔女住,相見好同住難。從前計劃退休後和老公去住,現在老公離開了,我會一個人去住」。

肥媽計劃退休後一個人回大陸住

而被問到自曾志偉回巢後,即不斷改革綜藝及音樂節目,怕唔怕影響到自己時,佢更坦言自己只係煮飯,並不擔心變動會影響自己:「「我煮飯咋嘛 ﹗他回巢是好事。」佢仲大讚志偉回巢係好事嚟,指佢令無綫同四大唱片行破冰,令音樂節目上嘅歌單會更豐富,TVB 將來嘅發展會更好。

曾志偉回巢肥媽坦言自己只係煮飯,並不擔心變動會影響自己Photo from 鄭裕玲/IG

而提到契仔 6 號時被歸類為余詠珊黨,肥媽即力撐 6 號並指佢係自己嘅「黨羽」先啱:「佢點會係余詠珊嗰黨?應該冇分嘅,唔使擔心佢,有才華做嘢交到功課就得,志偉都係唯才是用,又唔係余詠珊出糧,係TVB出糧嘅。而家都好多亞視嘅人過去,煒哥(陳煒)都係亞視人 ,唔通又有『亞視黨』咩,TVB都係睇工作表現。」

肥媽即力撐 6 號並指佢係自己嘅「黨羽」先啱

之後佢又指志偉本身係演藝人協會嘅委員,經常會提拔新人,幫很多年輕藝人,讓更多人有出路,所以唔擔心 6 號嘅前途。

志偉本身係演藝人協會嘅委員,經常會提拔新人

而有網友就指肥媽咁鍾意食淡水魚生應該快啲搬上去住,不過亦有網友認為佢咁講其實係暗示佢有「永不退休」之意。

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel