炎明熹確診或缺席叱咤音樂會放學就換衫出活動校園生活曝光!

By Moon Lam on 05 Sep 2022

Digital Content Writer

炎明熹（Gigi）近日因確診新冠肺炎而缺席3號舉行嘅《香港管弦樂團「廖國敏XJohnny Yim時光漫遊」音樂會》，所有工作都要暫停，有指佢病情好轉，但仍需要隔離，相信都會缺席叱咤生力軍音樂會！

Photo from Facebook @Hong Kong Philharmonic Orchestra

聲沙失準有病徵

炎明熹（Gigi）日前現身香港文化中心，出席《香港管弦樂團「廖國敏XJohnny Yim時光漫遊」音樂會》嘅綵排，當日正值開學日，Gigi係放學後趕黎工作﹐當時已經直言：「有啲攰」，綵排時亦都有啲聲沙，不過佢當時就表示係因為可能係休息得唔好。後來2號音樂會就有現場觀眾表示Gigi當晚演出有失準，聲線沙啞，唱唔到高音，更會咳嗽。

Photo from Facebook @Hong Kong Philharmonic Orchestra

音樂會演出急煞停

後來《香港管弦樂團「廖國敏XJohnny Yim時光漫遊」音樂會》官方指歌手炎明熹身體抱恙，將會缺席音樂會3號嘅演出，不過音樂會就會如期舉行，令粉絲非常擔心，希望Gigi多休息。不過後來官方就宣佈炎明熹對新冠病毒測試呈陽性反應，即時暫停一切工作，有一齊出席綵排嘅詹天文（Windy）和冼靖峰（Archie）就未受影響。

Photo from Facebook @Hong Kong Philharmonic Orchestra

需補拍《聲夢》MV

Gigi係確診後已經暫停所有工作，亦無返學。4號原定《聲夢傳奇》嘅學員會齊集拍攝《Hat Trick》嘅MV，除咗Gigi之外其他成員都有出席，Gigi係MV嘅部分要再搵時間補拍，姚焯菲（Chantel）和鍾柔美（Yumi）就係訪問中指有以短訊問候Gigi，對方亦有回覆，不過就無乜透露病況。據指Gigi嘅病徵已經開始減退，Gigi現時係自己房中進行隔離，起居飲食由同住嘅姑丈照顧，而姑丈一家未有受感染。

Photo from IG@yiminghay

大機會缺席叱咤音樂會

將會係星期五（9號）舉行嘅《叱咤樂壇Brand New Live生力軍音樂會》，原定Gigi都會出席，但計返隔離期似乎9號嘅音樂會都要缺席。有份演出嘅生力軍ERROR成員193（郭嘉駿）係拍攝宣傳片時表示，如果有「平行宇宙」最想同Gigi、Chantel合作，睇黎兩人似乎緣慳一面。而係今月底舉行嘅《2022年香港小姐競選》總決賽有意邀請Gigi任表演嘉賓，似乎都要等Gigi康復後先可以排練。

Photo from Youtube @商業電台 Hong Kong Toolbar

兼顧學業工作

年僅17歲嘅炎明熹係開學日被影到素顏返學嘅相，而佢下年就要參加香港中學文憑試（DSE），早前曾經傳出佢因參加內地節目《聲生不息》而停學，不過佢已經澄清自己以網課形式上堂，同時兼顧學業同事業！就連佢學校嘅校長都大讚炎明熹係好榜樣，兼顧歌手、學生嘅本分，所以同學都好支持佢！

Photo from IG@yiminghay

12歲學唱歌獲獎無數

原來Gigi因為自細鍾意唱歌，12歲就係家人安排下，係星格流行音樂學院接受唱歌同舞台演出嘅專業訓練，又參加過唔少大大小小嘅歌唱比賽，得獎無數，有網民更以「恭喜聖安當女書院5D班王佳恩同學」為題，揭炎明熹原名王佳恩，原來係中二已經嬴過唔少唱歌方面嘅獎項，可見係音樂方面嘅天份，更被唔少網民同前輩大讚「天生就係食呢行飯」。

Photo from LIHKG討論區截圖

Photo from 校網截圖

期望考入大學

現時就讀中五嘅炎明熹除咗唱歌之外鍾意設計同畫畫，選修服裝成衣與紡織及視覺藝術科，佢曾經為學校拍攝宣傳片，表示鍾意藝術，而學校亦提供好多發揮空間，「仲好注重我哋嘅品格培養，好似要待人有禮、做事要認真堅毅、遇到困難時間要點樣面對」，更表示對自己嘅成長同工作都有幫助。片段中更展示佢嘅畫作、衣服成品同係學校生活嘅點滴。而Gigi亦曾表態想順利升讀大學，修讀音樂或者時裝設計。