開心無敵獎門人|蔡思貝超投入玩「爆衫」獲曾志偉大讚夠爽快!黃宗澤被重提K歌之王事件,一臉尷尬回應!

開心無敵獎門人|蔡思貝超投入玩「爆衫」獲曾志偉大讚夠爽快!黃宗澤被重提K歌之王事件,一臉尷尬回應!

電視電影 娛樂新聞
By Stephanie on 19 Sep 2022
Digital Content Writer

最新一集嘅《開心無敵獎門人》邀請咗草蜢、黃宗澤蔡思貝、陳煒等人上節目做嘉賓,當中玩嘅絕大部分都係大家耳熟能詳嘅遊戲,非常搞笑~一向性格豪爽嘅蔡思貝喺玩遊戲時超投入,喺最後嘅贏取獎金環節中竟然激動到「爆衫」?!

最新一集《開心無敵獎門人》邀請咗草蜢、黃宗澤、蔡思貝等人做嘉賓~Photo from 《開心無敵獎門人》

獎門人曾志偉再度cosplay扮「阿Boo」,網民嚇親!

大台經典綜藝《開心無敵獎門人》最新一集就繼續向大家發放笑彈,繼早前曾志偉扮演日本人氣動漫《SPY x FAMILY》嘅「安妮亞」之後,佢今集就疑似扮成《怪獸公司》裡面嘅「阿Boo」,頭上紮孖辮,身穿粉紅色長tee加粉紫色褲;而其餘嘅「獎老」們都裝扮成卡通人物角色,包括有《IQ博士》小雲、《七龍珠》等。

曾志偉今集扮成《怪獸公司》嘅「阿Boo」,相信今次嘅打扮主題應該係同卡通角色有關喇!Photo from 《開心無敵獎門人》

獎門人嘅眼妝都非常誇張,令唔少網民覺得好驚人!Photo from 《開心無敵獎門人》

無論係髮型定服裝都真係一模一樣㗎!Photo from 怪獸公司

黃宗澤/陳敏之超投入玩遊戲!

喺《開心無敵燈燈燈》嘅玩法其實同「紅綠燈」十分相似,但就會喺叫嘅時候要求玩家做出特定動作,增加趣味性~獎門人先要求「跳性感舞嘅姿勢」,黃宗澤果斷張開雙腿跪地,場面爆笑。其後喺另一隊玩嘅時候,獎門人再搞怪要求「動物吸引伴侶嘅姿勢」,而咁啱陳敏之及胡渭康都選擇扮小狗,令一班主持人忍唔住大笑!

黃宗澤聽到遊戲要求後,立刻跪地張開雙腿扮跳舞Photo from 《開心無敵獎門人》

而另一隊玩嘅時候都非常投入!Photo from 《開心無敵獎門人》

期間陳敏之同胡渭康因為姿勢相似,令主持人忍唔住講笑!Photo from 《開心無敵獎門人》

即睇更多人氣文章:

蔡思貝講笑叫黃宗澤做「叔叔伯伯」

而蔡思貝同黃宗澤嘅互動亦被網民大讚好搞笑~喺「大電視」環節中,蔡思貝落力做口型及動作令戴著耳機嘅陳瑋估句子,而佢就搞笑咁指住黃宗澤形容「叔叔伯伯」;令對方忍唔住玩嘢咁「怒睥」返佢!

蔡思貝毫不猶豫咁指住黃宗澤,形容佢係「叔叔伯伯」Photo from 《開心無敵獎門人》

令現時41歲嘅黃宗澤忍唔住怒睥佢!Photo from 《開心無敵獎門人》

重提2008年黃宗澤《K歌之王》事件

隨後喺「開心無敵估歌仔」中,黃宗澤多次成功估中歌曲獲隊友大讚係「歌曲庫」~之後其中一首歌曲嘅答案係陳奕迅嘅《K歌之王》,過往黃宗澤曾喺《十大勁歌金曲頒獎典禮》中與陳奕迅合唱呢首歌並意外走音,成為當時熱話!但今次黃宗澤卻未能第一時間聽得出呢首歌,令在場嘅嘉賓都講笑咁話「Bosco~你點解估唔到㗎?」而佢就一臉尷尬咁上前似乎想講嘢,但最終僅回覆「em...都係冇嘢喇!」

2008年,黃宗澤曾喺頒獎典禮中同陳奕迅合唱《K歌之王》,意外走音令事件喺網絡瘋傳!Photo from TVB

各位都忍唔住話Bosco點解估唔到呢首歌~Photo from 《開心無敵獎門人》

黃宗澤尷尬咁好似想講嘢,但最終都選擇「返埋位」~Photo from 《開心無敵獎門人》

蔡思貝太投入不慎曝光,獲獎門人大讚性格爽快!

最後獎門人貫徹一向「打和」嘅作風,俾嘉賓們玩尾段嘅贏取獎金遊戲。蔡思貝作為第一位玩遊戲嘅嘉賓非常投入,喺玩「爆衫」時仲太大力搞到唔小心令底衫曝光!主持人們見到都立刻幫佢擋住,而蔡思貝都立刻整理返好件衫,仲話「唔驚!見得㗎,底衫嚟嘅!」;眼見佢咁豁達嘅回應,曾志偉都驚訝「無得頂啊!你係我哋咁多屆裡面最爽快嘅!」

喺最尾嘅贏獎金遊戲,嘉賓們需要玩「爆衫」Photo from 《開心無敵獎門人》

第一位玩嘅蔡思貝卻唔小心令底衫曝光?!但佢嘅豁達態度獲獎門人大讚!Photo from 《開心無敵獎門人》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

開心無敵獎門人|炎明熹玩遊戲超投入扮豬叫!「獎老」麥美恩奇特打扮,被網民指:真係認唔到!

廣告
廣告

29 Aug , 2022

大台經典遊戲節目《開心無敵獎門人》最近正在熱播中,最新一集就邀請到「聲夢傳奇」嘅學員們及「J2ers」主持人們上節目,嘉賓人數超多!而喺內地人氣飆升嘅Gigi(炎明熹)喺玩遊戲嘅時候都非常投入,仲爆笑咁扮豬叫,引起網民熱議。

獎門人同獎老們以中秋節作為裝扮主題,由曾志偉扮演嫦娥!Photo from 《開心無敵獎門人》

麥美恩為博觀眾一笑 打扮成光頭佬!

《開心無敵獎門人》昨日(28日)播放第5集,邀請咗《聲夢傳奇》嘅學員們及J2嘅節目主持人出演,陣容鼎盛~獎老們一向都會cosplay盛裝打扮,而佢哋今次嘅主題就應該係「嫦娥奔月」,由「獎門人」曾志偉打扮成嫦娥,而新「獎老」麥美恩就以光頭嘅打扮亮相,為博觀眾一笑而放低包袱!

最新一集《開心無敵獎門人》邀請咗聲夢學員以及J2ers做嘉賓!Photo from 《開心無敵獎門人》

獎老麥美恩仲打扮成光頭佬!Photo from 《開心無敵獎門人》

佢仲貼上假嘅毛髮,令其他人都忍唔住大笑~Photo from 《開心無敵獎門人》

Gigi首次體驗經典遊戲!

而節目就首度重現經典環節「開心無敵爆大波」,Gigi(炎明熹)仲成為第一個玩嘅嘉賓;喺佢玩嘅時候心口嘅氣球不停咁漲大,令佢越來愈緊張開始飆高音,直呼「呢個真係好刺激啊!」

Gigi成為第一個試玩「超級無敵爆大波」嘅嘉賓Photo from 《開心無敵獎門人》

而佢就超緊張咁飆高音Photo from 《開心無敵獎門人》

被森美誤會聞汗?!

玩完之後,曾志偉發現Gigi不停流汗,而Gigi就即刻用件衫抹汗,被在旁嘅森美講笑咁話「話你多汗,做咩聞胳肋底啊?!」令在場嘉賓都大笑~

隨後獎門人話Gigi玩完流晒汗!Photo from 《開心無敵獎門人》

而佢就疑似用衫抹汗Photo from 《開心無敵獎門人》

但就被森美誤以為係聞胳肋底!Photo from 《開心無敵獎門人》

C君大膽「抽水」!

之後輪到森美玩嘅時候,好搭檔之一嘅麥美恩就企喺佢身邊,希望令佢嘅壓力指數上升;面對氣球不停漲大,就連擁有豐富遊戲經驗嘅森美都覺得緊張啊!而另一位大台高層「J2台節目創意總監」C君都有出演,仲喺玩嘅時候大膽提及獎門人「我以後會矮過曾志偉」!

森美嘅其中一位好搭檔麥美恩負責幫佢擺氣球,仲不停靠近佢俾壓力佢!Photo from 《開心無敵獎門人》

C君仲超大膽咁喺獎門人面前用佢嘅身高開玩笑~Photo from 《開心無敵獎門人》

森美爆笑準備「私家遮」玩遊戲

其後喺「開心無敵大電視」中,當Gigi負責做動作俾隊友估詞語時,佢就放下偶像包袱扮豬叫,令網民大讚佢玩遊戲超投入!而差唔多包攬晒所有笑點嘅森美同C君喺「開心無敵彈遮遮」,因為不停答錯問題而被迫「淋雨」,而森美就好醒目咁自備「私家遮」,但最終被獎門人沒收咗!

Gigi玩遊戲嘅時候超投入,仲扮豬叫Photo from 《開心無敵獎門人》

森美超醒目咁收埋咗自己把遮喺褲袋!Photo from 《開心無敵獎門人》

成功挽救大台綜藝節目收視?

根據CSM媒介研究以及Adobe Analytics收視資料數據顯示,《獎門人》首集嘅最高收視達24.5點,比過往同時段嘅節目成績好咗;而睇返上星期嘅《獎門人》最高收視都有24.2,能夠同《東張西望》並列,似乎成功用《獎門人》挽回綜藝節目嘅收視!

獎門人嘅首集最高收視達24.5,比過往同時段嘅節目收視好!Photo from 《開心無敵獎門人》

而上星期(第4集)嘅最高收視都超過24點,同《東張西望》睇齊Photo from 《開心無敵獎門人》

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel