東方昇著瑜伽褲遊走街頭為女性平反網民大讚盞鬼又有意義

時事熱話生活熱話

By Moon Lam on 23 Sep 2022

Digital Content Writer

近年多咗女性做瑜伽，更有唔少人會著埋瑜伽褲出街，自然成為網上熱話，而出名敢作敢為嘅毛記「偽人」東方昇，日前就係影片中親身著住瑜伽褲係街上遊走，表示「每個人都有權選擇著自己鍾意著嘅服裝」，引黎網友熱烈討論！

Photo from 《毛記電視》截圖

毛記係最近一集《國家級任務》探討近年先興起嘅瑜伽褲話題！東方昇表示自己支持女性著自己想著嘅衫出街，不過唔少網民就認為著住瑜伽褲或瑜伽套裝出街都唔係咁好，評價都較為負面，例如好地地有褲唔著，又認為瑜伽褲太貼身，稍有不慎就會令私隱部位現形。

Photo from IG@minchen333

東方昇首先訪問咗幾位身穿瑜伽褲嘅港女，佢地都表示著瑜伽褲係為咗方便，通常都係著住去做運動，但著住瑜伽褲出街會承受途人嘅奇異目光，亦表示知道網上有關瑜伽褲嘅討論，不過就唔會理會旁人嘅眼光，自己鍾意同著得舒服就得。

Photo from 《毛記電視》截圖

為咗理解女性們嘅困擾，東方昇就特登去知名瑜伽褲品牌買瑜伽褲，而中途店員更加表示其實瑜伽褲係男女都可以著，東方昇更多次表示著完「勁舒服」，雖然非常貼身，但都無現形嘅情況出現。其後又係銅鑼灣街頭拉筋擺pose展示新褲，的確有唔少人望住！

Photo from 《毛記電視》截圖

其後東方昇決定將行動升級！稱要「模仿孔子咁樣感化世人」，於是以毛筆係褲上寫上「儒家褲」、「非禮勿視、非禮勿?」，令條褲變成藝術品，場面盞鬼得黎又幾有意思！東方昇最後更寫咗首歌去表達自己嘅感受﹐歌詞中提及：「不要用眼睛，非禮我下面」、「我又冇走光，我又冇鐺鐺」、「只係條褲貼身啲，犯法呀？」相當有意義。