download HolidaySmart 假期日常 app
伍詠薇上節目狂窒娟姐,說教兼串對方身材?網民唔buy:無品到一個點!

伍詠薇上節目狂窒娟姐,說教兼串對方身材?網民唔buy:無品到一個點!

娛樂新聞
By Wing Ws on 18 Jan 2023
Digital Content Writer

ViuTV節目《晚吹-讓我一次買個夠》今個禮拜一(16日)播出嘅第一集請嚟嘉賓伍詠薇,不過節目出街到而家已經有唔少網民「派嬲」,直指嘉賓伍姑娘「無品」又「冇禮貌」,節目中狂窒主持練美娟(娟姐)。同時網民又大讚娟姐表現專業,唔黑面之餘仲可以笑住應對!

ViuTV節目《晚吹-讓我一次買個夠》第一集出街有唔少網民「派嬲」。Photo from ViuTV

開場已經有火藥味

喺節目開頭,伍姑娘先公開佢嘅生活開支分布,兩位主持娟姐同當奴就開支表展開討論,講到伍姑娘嘅住屋佔35%比重最大 ,當奴好奇問:「但係你要夾(錢)㗎咩?你唔使夾㗎應該?」伍姑娘表示:「我平時係唔夾㗎。」娟姐聞言就笑指:「所以呢個(開支分布表)係假㗎,一句到尾。」伍姑娘就話:「有時我會畀吓咁囉。」又斜眼加多句:「呢啲係我家事,唔關你哋事好冇!」講完再反白眼,當奴打圓場表示:「呢個節目就係講家事嘅其實都。」

伍姑娘斜眼講:「呢啲係我家事,唔關你哋事好冇!」Photo from ViuTV

伍姑娘講完再反白眼。Photo from ViuTV

感不滿叫娟姐唔準笑

講到餐費,伍姑娘表示平時鍾意食兩餸飯,娟姐驚訝問:「你都會食㗎?」伍姑娘即不滿直言:「你咩態度呀而家。」娟姐即刻解釋:「我都係(會食兩餸飯),我好開心㗎,我哋3個都係」,伍姑娘就表示:「你開心就唔係令我開心㗎!」之後講到一半又叫娟姐:「你唔準笑!」

伍姑娘不滿娟姐並直言:「你咩態度呀而家。」

「唔好以為身材好過我」

節目中展示伍姑娘於自己家中拍攝睡衣收藏嘅影片,其後,當奴問伍姑娘「有冇(試過着睡衣)影寫真」,伍姑娘就表示後悔冇影到,娟姐就覺得:「可咩惜啫,而家咪着返再影囉。」伍姑娘即背住娟姐、對當奴講:「你唔好以為身材好,佢唔好以為自己身材好過我,講埋啲咁嘅嘢。」娟姐即澄清:「梗係唔係啦,真係可以有心唔怕遲!」當奴再次打圓場表示:「各有各支持者。」又扯耳仔講:「對唔住!我嚟打工㗎!」結束呢個環節。

伍姑娘背對住娟姐講:「你唔好以為身材好,佢唔好以為自己身材好過我,講埋啲咁嘅嘢。」Photo from ViuTV

當奴再次打圓場,結束呢個環節。Photo from ViuTV

教娟姐點收藏衣物?

之後娟姐問到點收藏衣物,伍姑娘就話會用膠袋包住:「好似上鏈錶咁得閒拎出嚟,放下啲臭丸落去,又揈吓佢,同埋啲臭丸如果唔好嘅話放到會變黃㗎啲嘢,你知唔知阿女!阿練美娟!」娟姐於是答:「請教請教。」冇再出聲。

娟姐回應伍姑娘:「請教請教。」Photo from ViuTV

用腰鏈串娟姐身材?

伍姑娘帶咗自己嘅私人物品上節目,其中一個係金色腰鏈,伍姑娘拎出嚟示意當奴試戴:「阿奴你咁瘦,瘦唔瘦㗎你?」又向鏡頭展示:「各位觀眾,你有冇咁幼條腰呀?90年代嘅我104磅,就係咁幼腰㗎啦。」伍姑娘表示自己喺2010年代搵返出嚟又戴得返,仲望向娟姐話:「唔知你戴唔戴到呢?唔答啦,我自己戴啦。」

伍姑娘展示腰鏈。Photo from ViuTV

網民唔buy:無品到一個點

雖然未知當中嘅對話有冇節目效果,不過好多網民睇完之後都唔buy,直指伍詠薇「大枝嘢」:「無品到一個點」、「唔專業」、「冇基本禮貌」、「擺明過嚟踩場、落人面、零尊重」,又認為:「第一集搵佢嚟做嘉賓已經係嚴重趕客」,同時網民大讚娟姐專業,認為:「有幾多人可以做到娟姐咁,忍住道氣唔窒返轉頭都難,仲要唔黑面有笑容」。

網民留言。Photo from ViuTV Facebook

網民批評伍詠薇「無品」Photo from ViuTV Facebook

網民覺得伍詠薇「唔尊重」。Photo from ViuTV Facebook

網民大讚娟姐專業。Photo from ViuTV Facebook

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

更多相關文章

伍詠薇祝黎諾懿兒子生日快樂竟被鬧「關你鬼事」,反擊獲網友力撐

12 Apr 2022

黎諾懿大仔「小春雞」日前迎嚟5歲生日,伍詠薇(伍姑娘)亦有喺黎諾懿Facebook下留言祝賀,但竟被鬧爆「none of your business」,令伍姑娘大感莫名其妙,佢亦親自回覆呢位網友,雙方各不相讓!

黎諾懿大仔「小春雞」日前迎嚟5歲生日Photo from 黎諾懿 Facebook

黎諾懿大仔「小春雞」5歲生日

黎諾懿2014年同李潔瑩結婚,兩人育有2子,其中大仔「小春雞」黎峰睿日前生日,因為疫情關係而選擇喺家中慶祝,黎諾懿亦有喺Facebook公開小春雞同弟弟小冬牛嘅合照:「我五歲大啦!」

黎諾懿喺Facebook公開小春雞同弟弟小冬牛嘅合照:「我五歲大啦!」Photo from 黎諾懿 Facebook

伍詠薇留言祝賀慘被網民斥「關你鬼事」

相片一公開就獲大量網友讚好同送祝福,其中伍詠薇都有留言祝賀:「Happy birthday little spring chicken!」不過竟然被人回覆鬧爆?!

伍詠薇同黎諾懿份屬好友Photo from 伍詠薇 Facebook

有一位網民回覆伍詠薇嘅留言:「none of your business」,伍姑娘十分無奈,但亦不甘示弱反問:「你甚麼意思?你是黎生朋友嗎?一點禮貌也沒有」,有網友勸伍詠薇唔使理會啲無聊人,佢亦回覆指:「我明白」,但佢表示正正係因為小朋友生日係開心事,直言:「講埋呢啲咁冇禮貌嘅說話教壞小朋友。真係莫名其妙」

有一位網民回覆伍詠薇嘅留言:「none of your business」,伍姑娘十分無奈,但亦不甘示弱反問:「你甚麼意思?你是黎生朋友嗎?一點禮貌也沒有」Photo from 黎諾懿 Facebook

有網友勸伍詠薇唔使理會啲無聊人,佢亦回覆指:「我明白」Photo from 伍詠薇 Facebook

伍詠薇回覆反擊獲網友力撐

有網友力撐伍詠薇,佢大表安慰:「多謝你明白事理,你都係唔好插嘴呢件事,否則佢又鬧埋你㗎啦。」伍姑娘更豪言自己「天不怕地不怕」,估唔到件事仲未完,嗰位網民再度留言回應伍姑娘:「一個字粗口都冇,叫冇禮貌說話?你平時唔會講none of your business?」

伍姑娘指自己「天不怕地不怕」Photo from 伍詠薇 Facebook

估唔到件事仲未完,嗰位網民再度留言回應伍姑娘:「一個字粗口都冇,叫冇禮貌說話?你平時唔會講none of your business?」Photo from 黎諾懿 Facebook

伍詠薇終爆seed大反擊:「我同版主都唔識你,我哋互動,你嚟呢度搞事話我做乜Q,我哋同你三唔識七」,霸氣一句獲網民力撐夠晒「真性情」!

伍詠薇終爆seed大反擊Photo from 伍詠薇 Facebook

伍詠薇霸氣一句獲網民力撐夠晒「真性情」!Photo from 黎諾懿 Facebook

一向真性情,曾坦言試過「溝人哋老公」

其實伍詠薇一直以嚟都好敢公開分享私人事,例如之前上節目時就大爆當年參選亞洲小姐,同翁虹不合只係炒作,但就認為萬綺雯「作狀」,又直言年少輕狂曾經「溝人哋老公」!

其實伍詠薇一直以嚟都好敢公開分享私人事Photo from 伍詠薇 Facebook

伍詠薇直言年少輕狂曾經「溝人哋老公」!Photo from 伍詠薇 Facebook

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel