布偉傑宣布與太太離婚，透露近年經濟不穩，太太提出做回朋友

By Wing Ws on 21 Feb 2023

Digital Content Writer

現年50歲嘅TVB「御用外國人」布偉傑（一哥），日前喺抖音宣布與結婚5年化妝師太太Celia離婚，影片中，企喺維港海旁嘅一哥對住鏡頭講述兩人離婚嘅經過及過去數年發生嘅事。

Photo from 布偉傑 IG

唔清楚兩人離婚嘅真正原因

一哥講起與太太辦理離婚手續嘅情況，表示自己亦唔清楚兩人離婚嘅真正原因：「啱啱係正式離咗婚，其實真正背後原因我自己都未搞清楚。我哋去申請離婚嘅時候，嗰日朝早搞掂咗啲手續，去食早餐、食完早餐去睇場戲，跟住食午餐，跟住一齊做義工，食晚餐，跟住就講拜拜，各自返自己屋企。」

Photo from 布偉傑抖音

透露近年經濟不穩：司儀、拍戲停晒

一哥透露指，近年自己面臨經濟壓力，更因為疫情導致幕前工作需暫停：「呢3年，我嘅經濟開始唔穩定，做司儀嘅活動、拍戲完全停晒，所以我就認為係因為呢個壓力，生活模式變咗，佢（前妻）先提出：不如我哋做返好朋友啦。開頭我都唔接受，我知道有問題，但係我好想解決問題，佢講嗰晚我喊咗成晚。」意識到婚姻面臨危機嘅一哥希望解決，但最終兩人還是決定分開。

Photo from 布偉傑 IG

稱真心希望前妻開心

雖然兩人已分開，但一哥仍希望前妻能幸福：「（如果）有一日我知道一嫂（前妻）係有返男朋友想再結婚，我冇問題，我想佢開心，我會祝福佢，呢個真心。」

Photo from 布偉傑 IG

網民：有錢就夫妻，無錢就好朋友

對於一哥離婚嘅消息，網民表示同情，有網民認為：「提離婚那個，其實大多數基本都找好下家或者目標了」，但唔少網民表示唔認同，認為兩人會離婚嘅核心原因係因為「錢」：「有錢就夫妻，無錢就好朋友」、「貧窮考驗女人，富貴考驗男人」、「大難臨頭各自飛」。

Photo from 抖音

近年淡出幕前

布偉傑喺2018年約滿TVB，喺經理人兼化妝師太太嘅介紹下，一哥識咗電影公司華誼兄弟嘅朋友，仲接咗兩套電影，一度進軍荷李活。一哥嗰陣仲話，想賺多啲錢畀太太有更好嘅生活。不過近年就逐漸淡出幕前，改為進駐抖音，當時定位顯示喺中山，似乎有意欲北上發展。

Photo from 布偉傑 IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

御用洋鬼子布偉傑效力TVB17年將離開無線進軍荷李活「福爾摩師奶」成告別作

27 Feb 2019

TVB有御用奸人鄭子誠、御用師奶盧宛茵，亦都有御用洋鬼子！布偉傑由2001年開始接河國榮棒，喺TVB飾演御用外國人。佢同河國榮嘅共通點就係兩個人都擁有外國人嘅面孔，但能夠講流利嘅廣東話，係令佢哋喺TVB能夠屹立不倒嘅原因。不過同時，正正係呢個原因，搞到佢哋發揮嘅空間甚少，可以飾演嘅角色畀人定晒型！每每有外國人嘅角色都會見到佢嘅蹤影！