日本人票選「中港台最帥男星排行榜」！香港藝人排名最高係佢？！

娛樂新聞

By Jennifer on 07 Mar 2023

Digital Editor

日本投票網站「みんなのランキング」近日公佈中港台3地最帥男星排行榜，其中上榜嘅大部分都係內地男星，其中劉德華、梁朝偉、周潤發等亦有上榜，其中一位排名最高嘅香港男藝人更獲日本人激讚「超完美」！

Photo from 謝霆鋒 Facebook

日本人投票選出「中港台最帥男星」

「みんなのランキング」係日本一個投票網站，佢以往曾經有最佳動畫、漫畫等各種投票，網民可以一人一票選出自己嘅心水。近日網站公佈咗「中港台3地最帥男星排行榜」，並列出51名由網友投票選出佢哋認為係最帥嘅華人男星，合共有4,244票。

Photo from 網站「みんなのランキング」

頭10位未有香港藝人，金城武排第8

其中第一至第十位都係內地、台灣男星：第10位許凱、第9位周渝民、第8位金城武、第7位炎亞綸、第6位鄧倫、第5位霍建華、第4位楊洋、第3位宋威龍、第2位王一博、第1位肖戰。

Photo from 《喜歡你》劇照

Photo from 微博

第一位肖戰同第二位王一博因為主演電視劇《陳情令》而喺內地爆紅，睇嚟呢套劇集喺日本都有唔少網民係fans！而爸爸係日本人嘅金城武則排第8，投票嘅日本網民指佢：「酷酷的眼神讓人無法抗拒」。

Photo from 《陳情令》劇照

Photo from 《重慶森林》劇照

許光漢排名第19、第14位係黃曉明

第十一位至第二十位嘅男星終於有來自香港嘅代表：第20位余文樂、第19位許光漢、第18位張藝興、第17位張國榮、第16位尹正、第15位馮紹峰、第14位黃曉明、第13位馬天宇、第12位陳曉、第11位言承旭。

Photo from 余文樂 IG

Photo from 微博

Angelabay前夫黃曉明位列第14名，而新晉「國民男友」許光漢則排名第19。周渝民、言承旭分別排第9、第11位，可能有部分投票嘅日本網民係F4嘅fans，另外有投票嘅網民表示睇過改編自漫畫《花樣男子》嘅台灣電視劇《流星花園》。

Photo from 《想見你》劇照

Photo from 《流星花園》劇照

余文樂成功打入前20名，哥哥張國榮成排名最高香港男星

喺第十一位至第二十位中有2位都係喺香港出道嘅男星——張國榮、余文樂。有投張國榮嘅日本網友大讚哥哥太完美，直言自己小學到依家40幾歲都仲係好中意佢！雖然哥哥離世20年，但呢個投票再次證明咗佢喺亞洲嘅影響力之大，令佢成為呢個投票排名最高嘅香港藝人。排第20位嘅余文樂都相當受歡迎，有投票畀佢嘅日本網民指睇完《無間道2》被余文樂嘅眼睛所吸引。

Photo from 《阿飛正傳》劇照

Photo from 《縱橫四海》劇照

Photo from 《無間道2》劇照

劉德華、梁朝偉、謝霆鋒上榜，陳偉霆獲讚跳唱俱佳

第二十一位至第三十位：第30位成毅、第29位王力宏、第28位陳坤、第27位丁禹兮、第26位謝霆鋒、第25位何潤東、第24位梁朝偉、第23位劉德華、第22位陳偉霆、第21位吳尊。

Photo from 謝霆鋒微博

Photo from 梁朝偉抖音

3位影帝劉德華、梁朝偉、謝霆鋒都上榜，有日本網友讚劉德華係一位多才多藝嘅演員、歌手同電影製作人，又表示佢係一位真正嘅明星。而陳偉霆亦獲盛讚擁有一雙日本人無嘅醒目眼睛，並指佢唱歌跳舞都好出色。

Photo from TVB

Photo from 微博

成龍、古天樂、周潤發都有上榜

之後嘅第三十一位至第五十一位按順序分別為：第31位張震、第32位劉以豪、第33位陳曉東、第34位陳道明、第35位鍾漢良、第36位侯明昊、第37位段奕宏、第38位周潤發、第39位邢昭林、第40位王瑞昌、第41位古天樂、第42位張雨劍、第43位吳秀波、第44位郭富城、第45位吳亦凡、第46位陳靖可、第47位梁正群、第48位李小龍、第49位徐鈞浩、第50位成龍、第51位祖峰。