TVB與淘寶合作直播帶貨6小時！陳豪陳敏之狂sell，被內地網民笑

娛樂新聞

By Jennifer on 09 Mar 2023

Digital Editor

近年唔少香港藝人都北上直播帶貨賺人仔，TVB就選擇同淘寶合作開直播，首站就搵咗陳敏之主持、陳豪做嘉賓，兩人狂sell各種產品，陳豪更重現《溏心風暴》，落力sell鮑魚，成功創下超過2,600萬銷售額。

Photo from TVB

TVB與淘寶合作直播帶貨，陳敏之做主持

依家北上賺人民幣未必係拍劇，有好多藝人會選擇直播帶貨，連向太陳嵐都加入直播行列，而「細細粒」陳嘉佳更憑直播帶貨開海味店做老闆娘！直播帶貨咁流行，近年越嚟越多人都加入呢個行列。

Photo from 直播

TVB近年都發展網購平台「Big Big Shop」，最近更同內地網購網站淘寶合作，開直播間「TVB識貨」，第一集就搵咗《識貨2》總冠軍陳敏之帶貨，由6點直播到12點。

Photo from TVB

視帝陳豪化身《溏心風暴》「得得地」狂sell鮑魚、佛跳牆、海參

9點視帝陳豪更擔任嘉賓加入，佢重現《溏心風暴》經典角色「得得地」，力sell鮑魚、佛跳牆、海參、花膠雞煲等各式美食，而直播帶貨當然唔可以齋講，佢同陳敏之親自試食，落足力帶貨。

Photo from 淘寶

Photo from TVB

陳豪只係加入直播間咗一個鐘，但期間已sell咗咖啡機、曲奇、蛋卷等，向來對咖啡好有研究嘅陳豪，當然都親自沖返杯咖啡，陳敏之飲完都大讚。由於喺淘寶直播，唔擅長普通話嘅陳豪更大晒「港普」力sell產品。

Photo from 淘寶

銷售額超過2,600萬！TVB於淘寶天貓設官方旗艦店

最終6小時直播累計觀看人數逾320萬，最高線上人數超過3萬，更成為淘寶直播間即時排行榜Top 2！全場銷售額亦都超過2,350萬人民幣（約$2,646萬港元）。TVB喺淘寶天貓都有官方旗艦店，暫時只售買3款產品：2款蛋卷、護手霜。總銷量由200～1,000多不等。

Photo from 微博

Photo from 淘寶

網民直言2350萬銷售額其實唔算多

作為主持嘅陳敏之表示自己本身好中意做直播，但之前最多都係直播3個半鐘，中間更有唱歌、玩下遊戲咁，未試過全程直播咁多個鐘，佢亦睇咗好多內地直播「做功課」，又話之前同細細粒傾偈時都請教過對方一啲帶貨技巧。

Photo from TVB

「TVB淘寶首播帶貨2350萬」更衝上微博熱搜，但有內地網民直言2350萬其實唔算好多，又有人指：「tvb現在的演員我都不認識幾個」、「這年頭還有看TVB的？」有內地網民表示TVB的直播帶貨之路已落後太多，「TVB識貨」淘寶直播間僅150幾萬觀看，而「淘寶一哥」李佳琦嘅直播間觀看量超過1,000萬。