3unshine「最醜女團」成員Cindy瘦身大改形象！退團改名仍未能成功翻盤？

內地組合3unshine出道8年期間，因樣貌及風格等因素引起唔少爭議。不過，近日有網民就發現其中一位成員Cindy瘦咗之餘，仲改埋名，同原本嘅公司解約兼退出3unshine，似乎係打算翻盤。

Photo from 3unshine 微博

相信大家對3unshine呢個組合名有啲印象，呢隊2015年成立嘅內地女團由成員Abby（吉星月）、Cindy（范麗娜）及Dora（王小蝶）組成，當時呢隊女隊一開波即引起熱議，原因係網民認為成員嘅顏值有別於以往大眾對偶像審美，更戲稱為「最醜女團」。除咗樣貌，3人出道至今嘅音樂曲風都備受爭議，2018年參加偶像女團真人秀《創造101》，兩成員淘汰、一人退賽更一度令成員實力受到質疑。直至去年，有網民發現其中一名成員Cindy變瘦，社交平台上不時貼出健身照，又練出小蠻腰及腹肌。