《解風東京》杜如風帶行下北澤！直擊新開美食街！古著／黑膠唱片／玩具店尋寶！（第10集精選）

旅遊攻略

By Wing Ws on 22 Mar 2023

Digital Content Writer

有「古著天堂」之稱嘅下北澤係東京近10年嘅新興地區，有唔少古著、二手店，係文藝青年必到嘅朝聖地，疫情期間，下北澤都新開咗唔少地方，一齊睇吓杜如風有咩推介啦！

Photo from 《解風東京》節目截圖

直擊新開橋底美食街

呢條喺下北澤車站高架橋下嘅美食街喺2022年開業，街上，有麵包店、越南菜、台灣菜、泰國菜等，主打世界各地美食，食客會好似食街邊攤檔咁，坐喺吧檯食。大家行街行到攰不妨入去醫肚！

Photo from 《解風東京》節目截圖

下北澤橋底美食街
地址：東京都世田谷区北沢2丁目11

文青服飾百貨店

除咗美食街，下北澤橋底仲有漫畫店、cafe、酒吧及古著屋，受年輕人歡迎，杜如風首先帶大家嚟到一間服飾百貨店，呢間新開喺下北澤嘅分店有潮流服飾、古著、飾物等，應有盡有！不過，杜如風建議大家可以睇埋呢間鋪嘅本館再買衫！

Photo from 《解風東京》節目截圖

東洋百貨店別館
地址：東京都世田谷区北沢２丁目１０
營業時間：11:00-21:00

抵買古著百貨店

呢間古著百貨店由22間小店組成，當中，有賣660円（約港幣39元）嘅潮牌hoodie，有樂隊Tee一件售價1900円（約港幣113元），亦有低至330円（約港幣20元）就買到嘅衫，杜如風就搵到一件770円（約港幣46元）嘅皮草。當然，相信鐘意古著嘅朋友都深知，行古著店嘅驚喜就在於「尋寶」！杜如風就搵到一件770円（約港幣46元）嘅名牌大褸，非常抵買！除咗衣物，仲有大大間嘅飾物「格仔鋪」，可以順便揀埋配飾襯衫！

Photo from 《解風東京》節目截圖

東洋百貨店
地址：東京都世田谷区北沢2丁目25−8
營業時間：11:00-20:00

黑膠迷必去二手黑膠唱片行

講到日本嘅唱片行，相信唔少人都會諗起TOWER RECORDS、TSUTAYA呢類鋪頭。而下北澤就有一間二手黑膠唱片行，所售唱片保存得好、分類清楚兼價錢便宜，最平300円（約港幣18元）有一隻，大家可以搵到少年隊、西田敏行、Morning娘等日本歌手，除此之外，亦有售價1800円（約港幣107元）嘅THE BEATLES唱碟及800円（約港幣47元）貓王Elvis Presley唱片呢類值得收藏嘅唱片！

Photo from 《解風東京》節目截圖

Flash Disc Ranch
地址：東京都世田谷区北沢2-12-16
營業時間：12:00-20:00

十足玩具博物館！中古玩具店

下北澤車站隔離有間中古玩具店，店內有大量美國中古玩具，當中嘅產品、玩具有10多年歷史，如snoopy、藍精靈、加菲貓、McDonald，有標示美國製造嘅花生先生杯，售價2900円（約港幣172元），另外，較罕有嘅產品如50至70年代嘅McDonald杯、60年代阿波羅升空時嘅snoopy官方紀念物，十足一個玩具博物館！另外，亦有搞怪嘅玩具，作為手信送畀朋友，相信都非常特別！

Photo from 《解風東京》節目截圖

SOUNDSGOOD
地址：東京都世田谷区北沢２丁目２３−６
營業時間：13:00–20:00（星期一至五），12:00–20:00（星期六），12:00–19:00（星期日）

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

《解風東京》杜如風抵玩／食推薦！120蚊有找掃街美食／肉類大滿足拉麵店！（7-8集精選）《解風東京》杜如風抵玩／食推薦！120蚊有找掃街美食／肉類大滿足拉麵店！（7-8集精選）

16 Mar 2023

TVB今個月播出由杜如風主持嘅《解風東京》介紹唔少疫情3年間新開嘅景點，除此之外，相信大家都發現，杜如風一改以往大買奢侈品嘅風格，多咗唔少平價嘅餐廳／景點，以下就為大家編選咗4個節目中嘅抵玩抵食之地，等大家「返鄉下」有多個行程選擇！

Photo from 《解風東京》節目截圖

押上新開平價迴轉壽司

呢間兩層高嘅迴轉壽司店喺2022年3月開業，店舖以「無接觸」設計，攞壽司嘅時候唔使接觸到個盤，連調味料、餐具都係收埋喺餐枱，店內嘅壽司有唔少款式，淨係壽司都有百幾款，加埋麵、飲品、甜品等，總共有150種餐點，除咗大家食日式料理會嗌到嘅刺身，仲有粟米、漢堡扒等選擇，大人細路都啱！而店內嘅壽司大多係132円（約港幣6元）起，連海膽都係290円（約港幣17元），非常抵食！杜如風覺得激拖羅、三文魚子呢兩款味道唔錯，納豆則較一般。食飽飯，大家要將碟投放到餐枱上嘅回收口作埋單，每5隻碟就可獲得一次抽獎機會，中獎後用手機掃平板上嘅QRcord，就可以玩餐廳出面1樓嘅扭蛋機及2樓嘅射擊遊戲，以獲得扭蛋！

Photo from 《解風東京》節目截圖

グローバル旗艦店押上
地址：東京都墨田區押上1-8-23 1F
營業時間：11:00 - 23:00

人情街120蚊有找掃街美食

杜如風帶大家嚟到下町人情街，挑戰以2000円（約港幣118元）「掃街」！呢條充滿古早味嘅商店街鄰近晴空塔，當中有好多價廉物美嘅街頭美食，杜如風先品嘗咗300円（約港幣17元）6粒「可樂餅球」，「可樂餅球」比起塊狀嘅「可樂餅」更方便進食，不過商店街上大多炸物都唔係即整，未必可以食到熱焫焫嘅炸魚、炸蝦。另外，仲有大過塊面嘅麵包，杜如風以180円（約港幣10元）買咗個栗子包，又平又抵食！而商店街內嘅飲品自動販賣機都係平過市價，全部只需100円（約港幣6元）。日本嘅生果出名貴，杜如風就喺商店街發現600円（約港幣35元）1公斤嘅柑賣，甜度十足！另有串燒店賣90円（約港幣5元）一條串燒，醬汁鹹甜結合，杜如風大讚雞肝串燒好味，最後仲吸引到幕後人員一齊食，味道獲得認可！喺人情街有一間長期有人排隊嘅章魚燒店，店內有各種特殊口味，如醬油、咖哩、pizza、辣pizza、明太子燒、梅子等，杜如風試咗350円（約港幣20元）咖哩味章魚燒，熱辣辣兼有大大粒章魚。最尾，食飽都仲有錢淨，真係勁抵！

Photo from 《解風東京》節目截圖

下町人情KIRAKIRA橘商店街
地址：東京都墨田區京島3丁目

直擊隅田川情人橋

墨田區有唔少新地方畀大家chill吓，隅田川喺2020年6月新開咗一條情人橋，方便大家直接橫渡隅田川，來往淺草同晴空塔。步道橋沿路景色優美，夜晚條橋仲可以見到燈飾，夠晒浪漫！杜如風建議大家喺黃昏嘅時候過嚟，呢個時間嘅景色係最靚！如果大家想加入行程嘅話，不妨行完淺草過嚟，過橋後再去情空塔～

Photo from 《解風東京》節目截圖

すみだリバーウォーク(SUMIDA RIVER WALK)
地址：東京都墨田區向島一丁目1番地 - 台東區花川戸1丁目1番地
交通：東武伊勢崎線「淺草站」北出口歩行約３分鐘或東京Metro銀座線「淺草站」５號出口歩行４分鐘

目黑區肉類大滿足拉麵店

呢間位於目黑區嘅拉麵店，附近幾乎冇乜商店，雖然位置唔顯眼，但間鋪係十間東京市內評分最高嘅拉麵店之一！醬油及鹽味拉麵都係售價1500円（約港幣91元），其中，醬油湯拉麵更被形容為一碗「優雅」嘅拉麵，當中有豬肉、鴨肉、雞胸肉、雲吞、雞蛋等多種配料，極之豐富！濃郁湯底配以吸收醬油湯香味嘅細麵，令杜如風舉手指大讚好味！不過呢間拉麵店每日限量100碗，約下午3點就會賣完，而客人更需提早到場登記，由朝早9:45起分成各個時間段，一般寫到10點半就滿額。所以大家有興趣嘅話，要早啲起身喇！

Photo from 《解風東京》節目截圖