郭晉安再被指個樣整過？開抖音被質疑唔係本人，網民：唔同咗樣

By Wing Ws on 08 May 2023

Digital Content Writer

郭晉安近日開抖音帳號，拍片搞笑玩gag，引起網民熱烈討論，不過就有人覺得郭晉安個樣唔同咗樣，認為係做咗「醫美」，更有人因此質疑唔係郭晉安本人！

Photo from 郭晉安抖音

現年58歲嘅郭晉安近年除咗喺TVB拍劇，亦不時於內地拍劇，早前與演員張丹峰主演嘅劇集《勇者無懼》於內地熱播，觀眾反應亦相當熱烈。近日，郭晉安更開設抖音帳號，與內地網民互動，又提到，自己因為「唔記得抖音嘅account密碼」，先會重新開多個帳號。

Photo from 郭晉安抖音

經典台詞串網民

帳號開設約一個禮拜，影片已經更上傳咗5條，郭晉安更玩gag，講返自己多年前電視劇角色嘅經典對白：「《美麗在望》都播咗廿年喇，你連七萬蚊都儲唔到，你邊有地方用錢啫？你食又cheap着又cheap全身都cheap，我都唔明你啲理財能力點解咁差㗎」、「七萬塊錢都存不到，你理財能力差」，更hashtag「#七萬塊都存不到」，雖然係串緊網民，不過大家都非常受落，笑指廿年後要俾同一個人再鬧多次。

Photo from 郭晉安抖音

再被指個樣整過？

不過，當中卻有唔少留言質疑郭晉安做過「醫美」，搞到唔同咗樣：「站真的是本人嗎，不太像」、「覺得整咗容咁，好似臉都僵硬晒」、「醫美做多，樣子變了，不是自然地老去」、「不要打玻尿酸啊」、「我也看着他感覺怪怪的，估計被醫美毁容了」，更有人覺得之前拍《白色強人2》已經唔同樣：「好膠，你睇白色強人2就知道」。另有網民認為只係濾鏡開得太重手：「美顏呀」、「美顏成這樣子」。

Photo from 郭晉安抖音

早前被指面容僵硬、表情唔自然

事實上，郭晉安喺2020年拍劇集《白色強人2》時，已有指片中佢面容僵硬、表情唔自然，訪問中甚至出現「膠樣」，同上一部《白色強人》時差好遠！郭晉安事後於媒體訪問時回應指：「我相信演員一定有保護自己的樣子，比方說我們去做facial，會做很多保護皮膚的美容，可能我對藥物有時候會敏感、會很容易水腫，所以很難保持每一次狀態都是一樣」。