機管局首推「上門行李託運」！10分鐘即可在家check-in，僅限一間航空公司

旅遊攻略旅遊新聞時事熱話

By Jennifer on 24 Jul 2023

Digital Editor

有時搭飛機要早啲出門口，因為要預返時間託運行李，如果行李多嘅話仲麻煩。近日香港機管局就推出咗「上門行李託運服務」，喺屋企就可以行李託運，直接喺目的地攞返行李，超方便！

Photo from 《大叔的愛》劇照

香港機管局首推「上門行李託運」服務

重到旅遊旺季，機場都會有好多外出旅遊嘅人，check-in託運行李要預多啲時間，一家大細出行帶住大喼細喼咁，分分鐘要早4、5個鐘出門口！雖然現時可以網上預辦登機，但就算唔去機場託運行李，都只能到指定地點—香港西九龍站託運，一樣要排隊。

Photo from 《太陽的後裔》劇照

Photo from 《我可能不會愛你》劇照

最近香港機管局首推「上門行李託運」服務，喺屋企就可以完成check-in手續，全程約10分鐘左右，十分方便。地點由旅客自選，可以揀喺屋企、或者辦公室都得。

Photo from 《你是我的命中注定》劇照

Photo from TVB

在家check-in，全程約10分鐘

託運完行李後去到機場就可以直接過關入禁區，到咗目的地再拎返行李，慳返好多時間，唔使「趕頭趕命」。目前「上門行李託運」服務覆蓋範圍除咗大嶼山（東涌除外）、馬灣、愉景灣、離島及禁區範圍外已覆蓋全香港。

Photo from TVB

Photo from 《輪到你了劇場版》劇照

有關服務由順豐速運負責，最早可以喺航班起飛前14日或最遲於航班起飛前12小時預約服務，每日收取行李時間為8:00～21:00，最遲收取行李時間為航班起飛前5小時。

Photo from TVB

僅限一間航空公司，上門行李託運收費公開

暫時只有乘搭國泰航空嘅旅客先可以享用上門託運行李服務，不過機管局表示之後會同其他航空公司合作。收費方面，首件行李將收取$370港元，第二件起每件行李則會收取$180港元。每件行李不可超過30kg，旅客可以實時追蹤行李位置。

Photo from 香港國際機場

Photo from SF Express

其實機管局仲有行李送遞服務，去旅行shopping多咗行李就可以用呢個服務，有專人將行李從機場直接送到香港嘅住所或者酒店。

Photo from 香港國際機場

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

港男遊日搭飛機怒斥港人行為失禮帶超額物品塞爆行李架網民:自私又貪小便宜

28 Feb 2023

日本向來是港人最愛的旅遊勝地，隨著疫情減退，旅遊業逐漸復常，不少港人都開始「報復性遊日」，即使早前日本政府限制香港飛日本的航班，仍然無阻一眾港人「回鄉」血拼的決心，有報道指出日本開關數個月期間，香港旅客在日消費額達745億日圓（約45億港元），相當誇張！不過最近有網民遊日後發文，表示回程時看到很多港人做出失禮行為，將大量手信塞滿飛機行李架，導致其他乘客延遲登機，貼文一出即時引起熱論！

Photo from 《緊急迫降》

怒斥港人搭飛機行為失禮影響他人

日前有網民在連登討論區以「坐日本回程機返香港有感」為題，分享遊日後乘回程機返港的所見所聞，事主表示眼見不少人為節省寄倉行李的費用，手提「大包細包」物品上機，包括士多啤梨及手信等，情況就如八十年代跟家人回大陸探親，帶超多物品接濟親戚。事主直言他們的手提行李體積龐大，根本無法放在座椅下，未知有否超重違規。同時他又看到一行港人上機後，即時把自己的物品塞滿一列行李架，導致附近守規矩的乘客要將手提行李放去遠處，有人上機看見此情形，驚訝表示：「我哋個位俾人擺滿晒」，不過依然有港人將物品「左塞右塞」放滿行李架，最後致導致延遲登機，事主直指這些港人自私的行為嚴重影響其他乘客，怒斥他們「食相真係好難睇」。

Photo from 《特務搞飛機》

地勸執法寛鬆導致乘客帶超重物品上機

事件引起不少網民共嗚「真，尋晚先搭完啲人夠膽死，Hand carry勁大個喼」、「我今日都係日本回程，真係好誇張一個人拎勁多行李，啲背囊勁大個都算，可以再拎一個細箱加長方形袋，唔係有限制㗎咩」有人指出地勤執法寛鬆，所以經常有乘機帶超額行李上機的情況出現「地勤執得唔嚴可以點。十個有八個都超」、「試過係兩喼共46kg返香港外加響身上嘅13kg, 凌晨機無人check」不過有網民又指出若地勤登機前嚴正執法，隨時又會被乘客投訴，導致check in程序變慢，又增加工作量：「地勤一執得嚴，啲人check in就要左塞右塞先過到，又要投訴，1個check in check成3個字」

Photo from 《我可能不會愛你》

網民直指港人貪小便宜兼自私

有網民指出港人遊日通常會瘋狂購物，直言這是港人遊日回港的日常，特別乘搭廉航，情況更為普遍「香港人去完日本返港日常」、「廉航係咁，成班人往死裡塞」同時有人批評港人自私又愛貪小便宜「香港人貪小便宜既習慣一直都有，果少少錢都唔肯付出咪搞到咁」、「有錢買嘢冇錢加寄艙行李」、「有時班香港人食相仲肉酸過班大陸人」、「香港人就係因為自覺得識太多野，乜都計到盡，比$10就想拎到$100既野，見到人地做自己就唔執輸」此外，有人直言「香港人搭飛機不嬲要考牌」，指出許多港人搭飛機時經常會做出影響他人私行為，例如落機等待行李時，很多人即使看不到自己的行李，都會圍著行李輸送帶守候，阻礙了其他人拿取行李，直指這些港人都自私自利，不會顧及他人感受。

Photo from 《歸去來》

有人認為帶手信上機是人之常情

對於旅客帶超額行李上機，有人指出這個自私舉動「無分國界」，不少外國人都會這樣做「度度都差唔多啦，又唔係淨係香港」有人則認為航空公司沒有做好規管，才導致這些情況出現「咁係Airline問題，Hand carry有限重同size」不過亦有網民指出行李架是全機乘客共用，認為事主的批評無理「其實overhead個位唔係係你上面就屬於你，大家都用得」、「飛機坐位上面嘅行李箱，不嬲都唔係跟座位，第一次坐飛機？」

Photo from 《特務搞飛機》

不為人知！盤點飛機上5大冷知識飛機上點解只有救生衣/窗口點解要係橢圓形？

2 Feb 2023

隨著疫情開始成為風土病，大家想衝出本土去外地度假嘅意識更加強烈，雖然每次上機都會滿心歡喜期待到達目的地嘅一刻，心目中對於機上嘅知識依然有好多疑問，實際上關於飛機上嘅航空規矩大家又識得幾多呢？今次就整理好五種飛機上面嘅冷知識俾大家！一齊嚟學吓嘢啦！

Photo from shutterstock

1）飛機窗口點解要係橢圓形？

鍾意坐窗口位嘅乘客都必定會留意到，每個機窗設計都是橢圓形而唔係正常會起角嘅方形，其實係因為橢圓形嘅角可以分散壓力點，避免窗邊造成裂縫，可以避免影響飛機安全問題。而過去其實都曾經嘗試過方形嘅設計，但係每次飛機降落嘅壓力都會增加，而方形嘅窗口好容易令到四角形邊邊造成裂縫，亦都好容易產生金屬疲勞，而於1954年，一架飛機由羅馬起飛20分鐘後就解體墜入地中海，機上35 人全部喪生，事故嘅原因就係因為集中於窗戶角嘅壓力過高而形成裂痕，喺飛行過程中增長而令到解體，所以話機窗是方形係相當危險嘅一件事！

Photo from GettyImages

2）飛機餐其實係由邊個做嘅？

其實每間航空公司都會根據起飛嘅地點、航線同當地主打嘅菜色，再去選擇合適嘅航膳公司合作，而航膳公司就會再根據航空公司嘅要求，例如食材選用、餐點風格以及預算等等，再去開創出覺得適合嘅飛機餐，而餐單嘅內容，就會每3個月至半年左加更換一次，視乎不同航空公司而定。而且為咗確保餐點嘅品質，航空公司仲會根據飛機起飛嘅地點，去選擇比較近嘅航膳公司。而飛機餐通常會喺起飛前嘅1-2小時前就會送上飛機，仲會以乾冰去保存溫度，避免食物變質或者滋生細菌。

Photo from shutterstock

3）機師同副機師要食唔一樣嘅餐點？

一般嚟講正、副機師係唔可以食同款餐點嘅，因為要避免正副飛機師同時間食物中毒，影響飛行安全。好多航空公司都規定機師唔可以選擇同款飛機餐，以分散風險去保障乘客安全。但係對於空中服務員嚟講就無呢個限制，而且好多航空公司為咗空中服務員嘅健康著想，都會特別為空中服務員設計出健康、少鹽同少油嘅餐點。

Photo from shutterstock

4）飛機上到底係咪唔可以開手機？

唔少人上飛機時都可能會習慣將電話熄機，其實目前有好多研究都顯示，無直接嘅證據可以證明手機電池波會影響到飛機嘅航行。而事實上，現今飛機嘅建造技術，其實已經克服咗呢一項潛在嘅危險性，當然大家為咗安全問題一般都會乖乖熄機！同過往相比，而家只需要起飛前開啟飛航模式去阻斷通話功能，就可以全程於飛機上使用手提電話，但正所謂「唔怕一萬，只怕萬一」，大家上飛機時都係乖乖轉換去飛行模式好了。

Photo from shutterstock

5）飛機上點解往往只有救生衣而無降落傘？

於飛行中嘅飛機一般係屬於增壓嘅，即係話飛機嘅艙門外面會被10噸左右嘅壓力出盡力去壓住，喺正常情況下根本係無可能打得開，就算可以於空中打開，外界嘅超低壓、低氧、低溫環境都唔係人體可以承受得住嘅！而降落傘對於無受過專業訓練嘅普通乘客嚟講，99%人係無可能會安然無恙咁喺危機下完成操作，所以如果想令數百名無受過訓練嘅乘客由空中一萬米嘅高度下跳落來，基本上就等同於天方夜譚。