雯雯斥張致恒婚後拈花惹草！批對方無畀家用全家險瞓街

娛樂新聞

By Jennifer on 10 Aug 2023

Digital Editor

雯雯開設新IG分享家事，不過每月要向followers收取$50元。近日雯雯情緒爆煲喺IG Story發長文，表示自己承受唔到外界壓力，又直斥老公張致恒婚後對佢不忠又周圍「數老婆」，指自己諗出IG會員制係無奈之舉！

雯雯新IG發長文

雯雯喺新IG分享腹大便便嘅照片，陀住巨肚嘅佢睇落即將臨盆，自推出IG會員制，雯雯嘅做法惹起爭議，不過佢的確吸引到超過200人課金follow佢。平時雯雯亦會喺新IG晒出近照。

近日張致恒外出打工，一家人嘅生活似乎回到正軌，但雯雯喺IG Story突然發佈長文，直言自己情緒爆煲，雯雯表示：「的確我係好失敗，我承受唔到外界嘅打擊，甚至壓力。」

雯雯解釋IG設會員制只為賺錢交租

雯雯指新聞一出佢就被指「借張致恒出位，如果唔係邊有人識」，佢解釋自己諗唔到其他地方發洩，所以先會喺網上發洩自己嘅不滿同委屈。佢坦言從來無諗過後果，只係當下好辛苦先會打字發洩。

雯雯表示之所以會選擇將IG轉成收費模式一嚟係唔想有啲「黑心」嘅人喺佢IG出現，二嚟亦係希望賺到少少錢交租同生活：「唔係偷唔係搶唔係犯法」，佢稱：「試問有邊個會鍾意畀人笑做小丑，甚至不停畀人鬧。但係我冇辦法，我搵唔到呢筆錢，我成個屋企就會瞓街。」

直斥老公張致恒唔畀生活費，又怪雯雯製造負面新聞

雯雯喺長文中亦控訴老公張致恒，佢表示自己受到嘅傷害已經去到極限，而承受嘅委屈亦無法再隱藏：「你要怪我去製造負面新聞倒你米，影響你事業」，似乎張致恒對雯雯經常喺網上分享心情嘅做法頗有微言。雯雯反駁：「點解你唔諗下五年裏面，你有冇真真正正改變過安守本分? 我喺屋企捱生捱死，大住肚照顧小朋友，你有畀任何嘅金錢我哋去食飯買奶粉尿片睇醫生，我都係靠自己」，直斥老公無畀生活費，全靠自己搵朋友接濟。

雯雯大爆老公婚後「溝女」，宣佈取消會員制

雯雯更大爆老公婚後仍然繼續「溝女」：「我換來嘅係乜嘢？你溝女對住啲女仔去數自己老婆嘅時候，你又有冇諗過我？」、「我一次又一次咁原諒你畀機會你，甚至再一次懷孕，但你從來你悔疚心，只係怪我點解要公開」

之後佢又暗示產後會開始新生活：「我依家無能力，一定要人幫手，但我相信我生完一定會有出路，我唔需要再停留喺度」，最後雯雯宣佈取消IG會員制，佢表示承受唔到外界嘅評論同壓力，會退返錢畀會員：「希望從此之後所有人都可以放過我」

相關文章：張致恒被目擊小食店打工，網上發文保護雯雯！網友：終於似返個男人

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

雯雯IG會員制月賺1.2萬！再出新招力保收入：希望大家唔好介意

7 Aug 2023

張致恒老婆雯雯懷上第四胎，但家中面臨經濟困難，日前雯雯就宣佈另開IG account，並開放會員制度，需要先支付每月$50嘅「會費」才可以follow佢。近日雯雯喺Story再宣佈新「會員制度」，希望可以維持到收入幫補家計。

雯雯開IG會員制

雯雯之前喺IG發長文暗示自己再度懷孕，掀起網民熱議。雯雯表示屋企有經濟困難，租金要靠網民代為支付，兩個兒子嘅書簿費都畀唔出，連學校都問過係咪會退學。雖然老公張致恒有去小食店打工，但家中即將迎來新生兒，要養一家六口，小食店嘅工資只係杯水車薪。

雯雯即將臨盆，不過佢都諗咗個辦法幫補家計，就係將新IG開設會員制，一個月畀$50「會費」先可以follow佢，雯雯表示一嚟可以幫補下家中面臨嘅經濟困難，二嚟亦阻止到啲用意不良嘅人。

雯雯IG會員制月賺1.2萬

雯雯新IG開咗超過半個月，新ac現時有243個followers，按照每人每月$50計算，雯雯一個月可以收到$12,150嘅「會費」，不過一個月過去，follow咗嘅網民未必會再支付會費，為此雯雯亦有所考慮。

雯雯宣佈收費新規，確保followers付費

雯雯喺IG Story問followers：「就嚟一個月，想知道大家係會繼續支持，定係只會支持一個月？」為咗維持返會員制嘅收入，雯雯亦諗好咗方法，佢再喺IG Story出post，宣佈：「如果大家仲想繼續follow，就每個月15號前過數，因為我暫時身體唔許可，唔能夠睇番你哋每個人嘅日子去問你哋，如果15號都見唔到大家過數，咁我就自動delete，希望大家唔好介意。」確保會員都支付咗「會費」先可以繼續睇到佢喺IG發佈嘅內容。