ERROR拍節目遲到，193向杜琪峯耍冧！4子被杜sir狂寸？！

By Jennifer on 28 Aug 2023

Digital Editor

ViuTV節目《ERROR暑期自作業》最後一集請到導演杜琪峯見證肥仔、阿Dee、保錡、193係咪真係好似被傳媒所寫咁例牌遲到。節目中人稱杜SIR嘅杜琪峯直言唔識ERROR，更忍唔住狂寸4子！

Photo from ViuTV

ERROR 4位成員都有唔少負面新聞，之前與佢哋合作拍劇嘅宣萱公開踢爆193開工遲到，另外阿Dee亦曾因為遲到而被黃子華寸爆。ERROR「例遲」形象深入民心，ERROR團體綜藝節目《ERROR暑期自作業》最後一集其中一個環節就測試4子係咪真係習慣遲到。

Photo from ViuTV

節目組同佢哋講嘅拍攝時間係下晝2點半，4人都表示一定會準時到，不過其實節目組早就瞞住佢哋請咗導演杜琪峯做嘉賓喺目的地等佢哋。杜琪峯坦言做演員修養中準時係必須，被問到演員準時但被傳媒誣蔑係咪好冤枉，杜琪峯坦言：「無得屈嘅！傳出嚟嘅嘢都堅堅哋㗎喇！」

Photo from ViuTV

節目組問杜sir識唔識ERROR，一開始杜sir似未反應過嚟，當工作人員講4位成員時佢就表示識阿Dee，但唔識ERROR：「ERROR係咩？唔識呢啲嘢喎！新㗎？」被問到ERROR遲到幾多可以接受，杜sir直言：「叫佢哋走啦！遲到仲喺度做咩啫」

Photo from ViuTV

第一個到達嘅係保錡，不過佢到場後唔知餐廳內食客係杜sir，超時5分鐘後阿Dee同肥仔同時到達，一見到杜sir在場即時嚇親！最遲嘅係193，佢遲到6分鐘，但因為見到前面嘅阿Dee、肥仔鞠晒躬，佢估到有重量級嘉賓，一到達即握緊杜sir隻手獻上一吻，搞到杜sir哭笑不得。

Photo from ViuTV

人齊後開始傾偈，杜sir提到自己踢完波就會嚟呢間餐廳，劉青雲、山度士都嚟過，此時保錡就表示細個山度士教過佢踢波，杜sir直言：「不過依家好肥」，保錡：「唔好咁講！」杜sir即爆seed：「咁肥就肥！咩唔好咁講，你個人老實啲先得！」引全場大笑。

Photo from ViuTV

193表示驚講得太多老實說話會成日被傳媒炒作，杜sir即指：「炒你你就多謝佢啦！唔係都無人識你！」

Photo from ViuTV

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

193收騷擾訊息宣布以後唔謝票因工作繁忙身心疲累缺席謝票場令粉絲失望

15 Aug 2023

ERROR成員193(郭嘉駿)出名直率敢言，多次因出位言論而惹是非。上星期四(10日)，由ERROR四子肥仔、阿Dee、193及保錡主演的電影《陰目偵信》正式公映，一眾演員亦順應近年興起的電影謝票熱潮，到戲院與觀眾見面互動，力谷電影票房，不過日前193表示因謝票時遇上不快，宣布不會再為電影謝票！

Photo from 《陰目偵信》IG

收騷擾訊息感不滿直言：謝票唔係義務

昨晚(14日)193透過官方telegram 群組發文，表示因出席謝票活動而收到「好騷擾嘅訊息」，決定今後不再謝票，他直言謝票並不是義務，從來沒有承諾過任何東西，又指自己已在戲劇上做足配角的本分。他透露近月自己身體狀況好差，加上工作繁忙，不但要排舞台劇，又要飛外地拍節目，餘下時間則趕工製作新歌，他坦言若不是有粉絲包場，自己也不會抽空謝票，寧願多花時間休息、養聲及做歌。雖然他之後都不再謝票，但亦希望大家入場大力支持《陰目偵訊》。

Photo from 193 IG

Photo from 193 官方TG

粉絲與網民意見兩極：保重身體 VS 大牌

193宣布不再謝票後，不少粉絲即在官方telegram留言叫193保重身體，又表示很期待他推出新歌。另一方面，有網民則批評193態度囂張兼大牌「自己班粉絲包場支持你，講到去親身謝票好皇恩浩蕩咁」、「人地真金白銀去撐你，謝票唔多唔少都係你嘅職責之一嚟」、「大牌過發哥，發哥唔舒服都謝票」、「佢唔想去其實可以唔去冇必要去左又咁發脾氣」

Photo from 193 IG

Photo from 《陰目偵信》IG 網民留言

上周六電影謝票 193 阿Dee缺席幾場令粉絲失望

據指電影公映後，其首周票房表現相當重要，因為會直接影響往後的上映場次，因此不少電影公司都會在這段時間搞謝票場推廣電影，據《陰目偵信》FB及IG專頁可見，電影於上周六舉行10場謝票場，會有193、阿Dee、女演員郭思及導演梁國輝出席，不過事後有粉絲留言指193與阿Dee在第一場謝票場即缺席，其後有幾場都沒有出現，令專誠買謝票場戲飛一心想見偶像的粉絲失望，更有人要求官方解釋原因：「可唔可以解釋下193同Dee失場原因？好多fans為佢哋買飛入場睇戲，感覺不被尊重，好失望」雖然官方謝票場宣傳貼文有註明：「以上謝票安排出席名單隨時更新，或因交通或突發狀況作出臨時調整，恕不另行通知」不過仍有粉絲感到不滿:「真心差到爆，得我哋着緊佢哋票房，佢哋唔着緊不特只，仲要無視買飛入場支持嘅人」