Do姐教科書級訪問！完美回應「陷阱問題」！網友：幫古生兜埋

By Jennifer on 12 Dec 2023

Digital Editor

Do姐（鄭裕玲）嘅YouTube Channel「The Do Show」榮獲YouTube「年度十大熱門創作者」、「年度十大人氣創作者」第一名，人氣爆燈！Do姐接受訪問時都表示好開心，而佢更展現超強口才，回答咗唔少「陷阱問題」，令網友深感佩服。

Photo from ViuTV

Do姐離巢後開咗YouTube Channel「The Do Show」，7月先開設嘅The Do Show唔使半年就同時獲得「年度十大熱門創作者」、「年度十大人氣創作者」第一名，何超儀嘅訪問更成為「年度十大熱門影片」第五位，成績超好！

Photo from The Do Show

獲得3個大獎嘅Do姐都表示非常開心，佢指本身無諗過開YouTube，係有2位年輕人搵佢先，有咁嘅成績佢都有啲「飄飄然」。Do姐感謝佢嘅同事，以及接受佢訪問嘅所有嘉賓：「佢哋每一位都願意交個心出嚟同我訪問。」

Photo from ViuTV

Do姐稱佢嘅Channel唔係專做訪問，仲會做下旅遊、專題等其他不同方面，希望大家拭目以待。Do姐整個訪問回應滴水不漏，回答到問題之餘又完美避開問題嘅「陷阱」，網友睇完都大讚：「盡顯幾十年撈出黎嘅功力，唔怪得做咁多年都咁top」

Photo from The Do Show

Photo from LIHKG

有記者問Do姐對邊個訪問印象最深刻，Do姐表示每個訪問佢都好中意：「如果我唔想訪問嘅我唔會走出去訪問㗎！所以我話（YouTube）自由度大就係咁！」有人問佢係咪碌盡人情卡，Do姐稱：「唔使！唔使碌人情卡！好多都係自己搵我哋㗎！」Do姐坦言有時嘉賓有電影等作品推出，想做宣傳就搵The Do Show做訪問。

Photo from The Do Show

有記者則指Do姐訪問嘅好多都係天王影帝級人馬：「好多都唔肯講私人嘢㗎嘛！點樣撬開佢㗎把口？」Do姐回答：「我哋唔係好formal嘅訪問喇！都係傾下偈咁！」Do姐表示好多受訪者同佢以前係同事或者合作過，所以都相信佢，願意同佢分享自己嘅事。

Photo from The Do Show

之後記者追問：「好似古生咁，你都話過佢惡㗎嘛！」Do姐即表示：「每個人性格唔同，又唔可以話佢惡嘅！佢嘅方法係一句起兩句止，我都好欣賞，講到main point就得！」記者再問：「咁點樣應付呢？」Do姐：「唔同人有唔同嘅應付方法，依家好難話比你聽，你擺個人喺度我先做到比你睇。」

Photo from The Do Show

該記者則笑言：「教下我哋呀嘛！」Do姐：「so far so good呀你做得！」現場一片笑聲。記者再接：「最開心都係發哥啦！」Do姐即刻指：「唔係！我無咁講，我話個個都咁開心！」

Photo from The Do Show

記者問有無人講講下會叫cut機再嚟過，Do姐稱無：「個個都信得過我嘅！我都無話爆人私隱、或者八卦，我哋唔係咁樣嘅。」Do姐提到希望下年會同嘉賓去拍旅行片，有記者就問佢：「係咪中意同啲靚仔去？」Do姐：「嗱！你又返去呢啲話題喇！你呢個訪問就唔係幾好喇！我要打交叉，唔合格喇！」除咗回應返「so far so good」嘅評語外，亦令現場氣氛輕鬆不少。