歐倩怡爆郭晉安袖手旁觀被狠批！急讚前夫係筍盤！幫手兜：佢好好的

By Jennifer on 17 Jun 2024

Digital Editor

歐倩怡與郭晉安早前宣布離婚，結束18年婚姻。回復單身嘅Cindy近日就上《絲打圍爐》大爆自己有玩交友App，並結識6位男士，佢又回憶指4年前突然夜晚呼吸困難，嘔吐兼失禁，但枕邊人卻漠不關心。節目播出後佢同郭晉安都被網民狠批：「睇完知佢兩個點解離婚」，Cindy亦於IG回覆網民留言，幫前夫「撲火」。

歐倩怡同郭晉安結婚後育有一子一女，一直十分恩愛，但兩人於5月突然宣布已分居兩年，現時正式離婚，令不少網民感到驚訝。離婚後Cindy首度公開露面，由連詩雅、蝦頭主持嘅《絲打圍爐》邀請佢做嘉賓，Cindy亦大方透露感情事。

佢坦言自己有玩交友App，更認識咗6位男士！Cindy自稱：「女仔讀太多書，啲男仔會驚咗你」，又大爆4年前曾生大病，不但嘔吐﹑呼吸困難，更嚴重到失禁，最終暈倒，但當時枕邊人「上網睇吓係咪call白車，跟住搵到個片糖沖熱水畀我飲。」但並未照顧Cindy，只係畀個痰罐佢嘔，Cindy醒返時發現自己仲係成個頭塞喺痰罐入面，令主持人蝦頭都十分吃驚：「無call白車咩？」

不過片段出街後，歐倩怡同郭晉安都被網民狠批，Cindy IG留言有人指：「咁嘅學歴叫勁得滯，真係笑大人個口，fyy讀埋碩士都未講得出呢番說話。」Cindy回覆：「多謝提醒😊其實我都知我好渣㗎咋，好多野都唔識，同無記性。嗰個純粹係節目效果。學海無涯啊📚」有網友指：「離婚唔知有冇3個月就玩交友app，仲係度講自己前夫點衰點衰」，Cindy回：「都兩年啦～～同埋搵人傾下偈唓，無做壞事。我而家都同你傾偈啦😅😅😅」

有網民則質疑佢公開講前夫郭晉安嘅嘢：「真係戥郭晉安慘!!你真係太over了。」佢回應：「beli bala 作風🤣只限鏡頭前」有網民稱：「人地郭晉安一句聲都冇出，你就咁多野講，向前看啦歐倩怡！」歐倩怡表示：「係🫡 thanks」有人狠批：「忘本。。。學費何來？」Cindy就指：「係呀，我有好好多謝佢。感情事係咁，無得計嘅。大家依然係屋企人。多謝你支持啊」

不過亦有唔少網民認為郭晉安當時太冷漠，見到老婆嘔吐﹑失禁都唔call白車，直言根本係「見死不救」，Cindy都有為前夫解釋：「太驚啦，唔知發生咩事，比着我都會驚，唔知應該點做」、「佢當時係驚，唔知發生咩事」、「我真係斷片式暈咗，發生咩事都唔知」

有網友則指：「多謝你放過郭晉安，地球又多一個筍盤🙌」歐倩怡都大讚前夫：「係呀，佢好好的👍🏻」Cindy表示自己玩咗交友App一個月左右，覺得悶就無再玩。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

郭晉安被揭將草姬股份轉予胞姐！與歐倩怡分居時間相近！

29 May 2024

今個月初，郭晉安同歐倩怡突然宣佈離婚，引起了不少人嘅關注。佢哋透露，兩人已經分居咗兩年，呢個消息令好多粉絲感到驚訝。近日郭晉安與胞姐郭致因創立嘅草姬集團向港交所（388）申請上市，揭郭晉安2022年就將股份轉讓胞姐，同與歐倩怡分居嘅時間差唔多，惹市場揣測。

郭晉安同歐倩怡結婚18年，婚後二人育有一子一女，但5月初兩人突然宣布離婚，更表示已經分開生活咗兩年。早年佢哋曾透露兩人陷入婚姻危機，但後來成功修補關係，可惜最後仍然離婚收場。

郭晉安同歐倩怡未有提及離婚嘅原因，因而引起唔少猜測，有指郭晉安曾持有9,000萬物業，包括西貢匡湖居、紅磡駿昇中心、旺角中僑商業大廈、太古城、荃運中心等。但全部都無加到老婆歐倩怡同一對仔女嘅名，當時歐倩怡稱怕麻煩，而唔加仔女名則係因為郭晉安認為自己離世前應應該要將賺到資產回饋社會，而歐倩怡都十分贊同。

近日郭晉安與姐姐郭致因於1999年創辦生產「草姬靈芝孢子」保健品及美容與護膚品嘅供應商草姬集團最近向港交所遞交上市申請，呢個舉動亦都吸引咗唔少投資者嘅眼球。其實早於2022年，郭晉安已經將持有股份轉讓畀佢胞姐郭致因，呢個決定當時並無引起太多注意。但依家回望，市場開始揣測呢個舉動可能係為咗離婚財產安排而做嘅準備。