兒童節目透露你嘅年齡！陪你成長嘅兒童節目又係咩呢？原來第一套兒童節目係...

童年時期大概3:30pm就放學，搭校車返到屋企都4點鬆啲，一開電視就聽到熟悉嘅主題曲～無錯！小編放學最期待就係返去睇呢啲兒童節目㗎喇，唔知大家又係睇咩年代嘅兒童節目大嘅呢？

1.《跳飛機》（1976-1982）

第一代嘅兒童節目，小編都係做返research先知，一直以為《430穿梭機》先係第一套兒童節目。1976首播，由黃汝燊（又稱Sunny哥哥）主持。後尾變成王愛明接棒主持，直至到1982年就被《430穿梭機》取代喇！

2.《430穿梭機》（1982-1989）

1982年開始播映，播咗7年之久。節目好明顯係以穿梭機為主題喇～一班主持人喺太空中執行任務。

廣為人知，一提到兒童節目主持人就一定又佢份嘅譚玉瑛姐姐都係呢個節目出身㗎！而估都估唔到嘅係，原來有好多當紅藝人都喺呢個節目做過主持人㗎！好似有張國榮、鄭伊健、梁朝偉、周星馳等等，係咪估唔到呢？

而節目內容都增加咗播放卡通片嘅時段，而第一套就係耳熟能詳，當時都仲未改名嘅《叮噹》喇！

3.《閃電傳真機》（1989-1999）

1989-1999為期十年，係壽命最長嘅兒童節目黎㗎～不斷有唔同人加入做主持，唯一係譚玉瑛姐姐由頭做到落尾。當中最廣為人知嘅自製節目環節莫過於《Auntie烏卒卒》，配埋首「烏卒卒～好似好似一隻黑蟋蟀～」，絕啊！不過其實小編絕對唔係呢個年代，唔知點解都識得唱哈哈～

4.《至Net小人類》（2000-2004）

2000首播，為期只有4年咋！小編仲記得主題曲係由古巨基唱嘅，「無窮無窮小宇宙～啦啦啦啦啦啦世紀～～」，無錯，每次都唔記得個幾粒歌詞～

5.《蔥蔥闖地球》-->《放學ICU》（2005-2015）

相信係好多90後嘅回憶啊！一開頭播咗《蔥蔥闖地球》 呢套兒童劇先，大概10個月左右，就正式變做《放學ICU》兒童節目喇～用返蔥蔥做類似主角咁喇，每集都會有佢嘅出現。

而令小編最印象深刻嘅就係佢地嘅主題曲喇！做咗十年，一共有3款主題曲。先係《投投籃球》、《放學ICU》、《校鐘響起ICU》，當中以《放學ICU》嘅播放時間最長，為期七年，亦都係最為人熟悉嘅一首呢～「Come and join us～Be Our Friend！放學I！C！U！」

6.《Think big天地》

最新嘅就係呢套全新概念嘅《Think Big天地》喇！有別於以往嘅兒童節目，呢套係比較學術啲，喺試下嘅科目主題度延伸唔同課題，再進行相關嘅講解同活動，亦都有同中小學生互動。而星期一至五都有唔同嘅主題。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載