歷年最佳劇集 有無邊套真係你心水？滄海遺珠大公開 當年民選最佳劇集～

大台頒獎禮嘅結果就一向都驚喜連連，一時就大熱一時就爆冷，真係估佢唔到㗎！小編就覺得今年頒獎禮賽果就爆冷居多囉，其中愕然嘅一刻就係頒發最佳劇集嗰陣，今年頒最佳劇集嗰陣全部藝人都出曬去台中間，所以可以話睇到唔少藝人錯愕或者驚喜嘅一刻。

唔好話小編，連有份主演嘅陳豪同田蕊妮都O咗嘴啊！依家就等小編同大家盤點下過往嘅最佳劇集，到底有邊啲大熱變咗遺珠呢？

跨世代（2017）

Photo from TVB

由今年講起，跨世代爆冷勝出。本身大熱都係《踩過界》同《降魔的》之爭，雖然小編係私心支持《降魔的》（並不代表本page立場），但係就真心無諗過會係《跨時代》。因為口碑同收視都一般，有人話劇情有啲拖，有成五十集太長咁話。係就係卡司都幾勁，出動曬人脈，主演客串都正，不過就真係唔得民心囉。

相反，本身無諗住熱捧，宣傳時仲被認為係膠劇嘅《降魔的》就被網民激讚係大台難得嘅大膽作風得黎又sell到溫情嘅神劇，大家都知一般特效多嘅劇集都無好收視。不過，雖然贏唔到大獎，但贏到民心，都有番個「全球網民最喜愛劇集」，係豬肉定雞肉大家自己諗喇～

Photo from TVB

另一套大熱《踩過界》，無論劇情定演員，都備受好評。王浩信飾演盲俠一角，令好多網民大贊佢神演技。Ali同張振朗都大有進步，而一向係網民公敵，今次扮演醜女嘅蔡思貝難得被網民讚，仲奪得「我最喜愛電視女角色」添！

Photo from TVB

而《同盟》其實都好高收視，每個演員都演得淋漓盡致，當紅Kent & Kate，易先生 & 令熊都受到好多網民愛戴，只可惜話題性較少。

Photo from TVB

城寨英雄（2016）

Photo from TVB

上年嘅得獎劇集就唔會意外喇，一樣係大熱嘅《城寨英雄》，收視相當好嘅同時無論愛情線定打鬥戲都一律大獲好評。當中刁蘭同拳佬呢pair仲超受歡迎添！

不過呢年嘅候選劇集都有好多大熱遺珠㗎，好似《EU超時任務》咁，又一套穿越x警匪戲，劇情新鮮緊湊。王浩信做圍頭仔亦都準備充足，特地學下圍頭話。

Photo from TVB

有個「有Bobby就有收視」嘅傳言，又好似真係播！sell溫情嘅《一屋老友記》，催淚得黎又搞鬼，贏得口碑同收視，係當年嘅大熱黎㗎！

Photo from TVB

演戲實力一向受肯定嘅廖啟智回流TVB喺《律政強人》入面飾演KC一角，亦引黎好多呼聲。

Photo from TVB

梟雄（2015）

Photo from TVB

由黃秋生領導主演，以民國初年上海三大亨為藍本，講述民間紛爭，有人背信棄義，有人抱緊希望。卡司亦出動多位平時擔正嘅男女主角，馬國明、黎耀祥、胡杏兒等等。

當年嘅陳豪、胡定欣、田蕊妮主演嘅《鬼同你OT》都好受歡迎，兩位女主角嘅神同步當時都係城中熱話㗎！

Photo from TVB

使徒行者（2014）

Photo from TVB

無論專業投票定全民投票都係第一嘅《使徒行者》，收視爆紅，全城討論呢套臥底、警察同黑警之間嘅遊戲。再加上林峯、佘詩曼、苗僑偉、許紹雄嘅組合，每個人都完美演繹角色，小編記得嗰陣係晚晚趕返屋企追㗎！其實唔止最佳劇集，連角色、歌曲都有獎，一共包攬五個獎項。當中釘姐、爆seed同歡喜哥呢三個角色都好得民心，名正言順嘅最佳劇集，相信係少有合民意嘅最佳劇集喇！

衝上雲霄II（2013）

Photo from TVB

好多人都話不及第一輯好睇，先不論劇情，班底雖然好多都係舊班底，但始終未能完全複製。不過同時，新角色由張智霖飾演嘅captain cool就受盡少女、師奶嘅支持。雖然被網民評劇本麻麻，但係收視就好好，最高有成41點，平均31點，結局38點，喺當年收視冠軍！

大遺珠非《巨輪》莫屬喇！被捧為神劇，無論劇本定卡司都被大贊！劇情以兩兄弟蕭正楠、陳展鵬為主線。

Photo from TVB

Anyways～唔同劇集都有唔同嘅支持者，未必每套最佳劇集都係你嘅最愛，但相信公道自在人心，贏到民心已經係最大嘅鼓勵喇～

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載