大小姐雖然失落最佳女配角，但佢咁多年嚟嘅表現有目共睹！
晚晚返屋企睇《愛·回家之開心速遞》已經成為大家嘅指定動作，小編其中一個最鍾意睇嘅角色，就係野蠻到死但經常小鹿亂撞嘅大小姐！林淑敏可以話係完美演活咗呢個角色，第二個都未必做得咁好！
雖然林淑敏做大小姐經常好勞氣，又碌到隻眼大一大咁，其實私底下佢係一個好溫柔嘅女人，仲勁謙虛，同大小姐完全係相反！
Mandy當年參選港姐之後就正式加入TVB，不過頭幾年佢多數都係做D負面又戲份少嘅角色，去到10年先嶄露頭角，可惜同年佢患上第二期乳癌。
Photo from TVB
經過年幾嘅抗癌療程，佢終於抗癌成功，講番當時情況，佢話自己一夜之間甩曬D頭髮，真係嚇死佢，佢仲叫拍咗好多年拖嘅男友離開自己，當然對方梗係無咁做，宜家仲結咗婚，真係sweet到爆！
經歷過大病，Mandy更加珍惜生命，愛心爆棚嘅佢成日會帶藝人朋友去探病友為佢哋打打氣，事業方面，佢多勞多得，只要有角色畀佢，佢都會落力演出，戲路更加廣，好似喺幸福摩天輪裡面飾演「靚媽」，全心全意照顧養女，大家都讚佢做得好到位。
Photo from TVB
不過大家似乎鍾意睇Mandy演繹惡D壞D嘅角色，好似喺《On Call 36小時II》入面佢做超自私嘅媽媽，寧願係乙型肝炎帶菌者都唔肯捐肝畀個仔，真係好衰呀！！
Photo from TVB
喺「大小姐」之前，網民最愛都係《真相》裡面嘅「Emily」，潑辣又成日發癲，演技差少少都會畀人嫌太浮誇，不過由佢演就剛剛好，外型似足闊太，但「癲」起上嚟真係嚇親人，難怪張圖可以畀網民狂Loop，萬能Key呀～
Photo from TVB
Photo from TVB
《愛·回家之開心速遞》裡面嘅大小姐龍力蓮，雖然有少少「Emily」嘅影子，都係有錢就要惡曬，但觀眾點解咁鍾意睇佢出場，全因呢個角色依然有sweet嘅一面，特別係大小姐情迷「送水輝」許家傑呢條線，成日見到人前霸氣到極點、私底下少女心爆發嘅大小姐，觀眾都會會心微笑，日日等睇佢哋感情發展。
Photo from TVB
Photo from TVB
Photo from TVB
其實Mandy都估唔到自己會咁受網民愛戴，知道個個都希望佢得獎，佢都好謙虛咁話係團隊嘅功勞、劇本寫得好，佢只係做好本份。不過小編覺得呢D都係佢多年演戲經驗加埋人生歷練所累積返嚟嘅成果，你估做一個霸道又巴辣之餘同時要好有觀眾緣嘅角色容易呀？
Text: Holiday editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）
*本文章的圖片均經其本人或其公司授權，其他媒體不得轉載
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
