《與神同行》第一、第二部同時拍攝，二部預計今年8月上映，不過車太鉉唔會出現

時事熱話電視電影

By 123testing on 30 Jan 2018

近排聽得最多嘅問題，就係：「你睇咗《與神同行》未呀？有冇喊呀？」
喺睇呢篇文之前，小編要提醒一下咁多位讀者，內有劇透，未睇嘅話自己衡量一下啦～～

Photo from 《與神同行》

《與神同行》由籌備到拍攝歷時6年，一、二部一齊拍，所以睇完正在上映嘅第一部之後，觀眾心裡面都會有好多疑問，加上最後嘅彩蛋，令觀眾好想知道第二部究竟可以交代到幾多嘢？即刻同你預告一下第二部必睇位！

Photo from 《與神同行》

漫畫原著喺韓國已經連載到第三部，今次電影版只係交代到第一部嘅尾聲，好多嘢都未講得曬。第一部主要係交代地獄嘅世界，介紹一下3位陰間使者嘅作用同閻羅王等等，第二部會上返人間，講人間嘅神，主角就係馬東錫飾演嘅家神「成造神」。

必睇位1:馬東錫引領家神三人組力抗陰間使者

「成造神」掌管一個家庭裡面所有家神，基本上等於Big Boss，喺第一部片尾彩蛋部分佢為咗保護拾荒爺孫，唔畀陰間使者帶走爺爺，呢個畫面為第二部埋下伏線，預告續集將會以爺孫為主線，「成造神」之外，「灶神」、「廁所神」同埋「醬缸神」應該會現身一齊守護爺孫，展開一場陰間陽間大對決！

必睇位2:陰間使者三人組前世故事

Photo from 《與神同行》

喺第一部入面，陰間使者李德春話最羨慕亡者有生前嘅回憶，佢哋作為使者，唔知道自己生前做過乜、點解會死，第二部將會講番3個人做陰間使者前一千年前嘅故事。

Photo from 《與神同行》

喺第一部河正宇飾演嘅「江林」有少少憶起過前世係將軍嘅畫面（同漫畫唔同），但「解怨脈」同「李德春」完全零交代，導演話第二部「李德春」嘅戲份會多好多，會詳細交代點解佢細細個就成為陰間使者，同埋點解佢會有「罪惡掃瞄器」嘅功能。

Photo from 《與神同行》

必睇位3:細佬金秀鴻點投胎？

Photo from 《與神同行》

由於車太鉉飾演嘅「金自鴻」已經投胎，續集佢唔會出現，相反本來係惡鬼但最後竟然成為第49位貴人嘅細佬金秀鴻喺結尾同陰間使者三人組繼續進行審判，佢能唔能夠通過審判影響到三人組嘅去留，飾演細佬嘅金東昱自爆第二部嘅戲份有加多咗，暗示佢條線應該都會幾精彩，而且佢點解會特別照顧「關懷兵」D.O，聽講第二部都會講埋！