兒時零食一覽 好懷念啊！細細個一定食過 超有回憶嘅零食sss 食過曬俾個讚你

依家啲零食款式多籮籮，真係咩花款都有，雖然係咁，有時都好懷念細細個嘅味道～記得中學嗰陣，小息一定會走落小食部買零食，雖然得幾款揀，但係已經夠填滿小編返學無聊嘅心～放學又會去超市買其他零食食。一齊睇下呢啲零食你又食過未？有無邊啲係你當年至愛？

1.魚仔餅

小編私心講魚仔餅先！真係超好食！又脆，同普通薯片唔同嘅佢係好薄，同埋造型係一隻隻海洋生物嘅造型。因為係「3D」立體，所以咬落去嗰種脆嘅口感更加出。小編細細個就最鍾意食綠色包裝嘅紫菜味，食完仲唔會放過手上面嘅紫菜，吮埋佢～

近排仲新出咗蜂蜜牛奶味添～有機會小編都想試試！

2.愉快動物餅

大家細細個嗰陣，屋企人有無買過俾你地食住學生字呢？桃紅色盒嘅係濃濃嘅牛油味，綠色就係小編最愛嘅紫菜味喇！不過其實小編有時覺得有啲動物整得比較含蓄，唔知個英文係咩嘅時候，都真係唔係好睇得出係咩黎～

3.恐龍谷

恐龍谷係小編中學時期，口痕嗰陣一定會落小食部買黎食嘅！佢隻脆並唔似魚仔餅嗰款脆，比較似印尼蝦片。講起印尼蝦片，小編細細個都好鍾意食㗎～一隻隻恐龍造型，味道比較濃，啱啲重口味嘅朋友仔～仲有，真係唔search唔知道，原來佢係黎自泰國㗎！

4.牛仔片

珍珍牌嘅牛仔片，一格格好似格仔餅咁。一樣係比較重口味，食落比恐龍谷仲鹹。

5.漢堡糖

黎到糖果嘅世界喇～啊！係漢堡包糖糖啊..唔好打我！重點係我99%肯定你地都係拆開黎一層層咁食囉。超煙韌，好好咬口㗎！

6.戒指糖

戒指糖係細個去花市會「lur」阿爸阿媽買俾自己玩～戴住喺手指，又可以滿足小朋友扮靚靚嘅心願，又可以有糖食，有糖嘅深深處係小朋友最愛嘅閃閃燈黎㗎。依家大咗真係覺得呢啲閃閃下嘅嘢好煩囉...

7.乳酸糖

又係小編中學小食部有得買，一包好似$2.5定$3左右，甜甜酸酸，細細粒好方便上堂偷食～

8.肚臍餅

肚臍餅黎講，要摸索到我阿婆個年代喇。細個婆婆去街市都會買一袋袋透明袋嘅肚臍餅。一定要咬咗上面嗰粒糖霜先，或者食咗下面舊餅乾先，總之一定要分開食～再白痴啲係，成日迎住唔同色係唔同味...

9.唧唧冰

唧唧冰都有幾款嘅，唔知你地係食邊款呢？小編食得最多就係阿波羅嘅提子味喇。

10.孖條

又係阿波羅嘅～一包入面有兩條痴埋嘅雪條，可以同人一人一條～不過依家諗返其實嗰都係貪得意，所以先會成日想買黎食～因為都唔係話特別好食哈哈～

11.吹波糖

一盒盒細細嘅四方形，一盒四粒，唔同水果味。因為係細細粒，所以通常一粒唔夠喉，食夠四粒小編都試過哈哈～

12.芝士波波

一罐裝嘅芝士波波，個罐有粒花生人係度嘅呢～之前有段時間停產咗，sad到小編死。次次食完啲手指都痴曬芝士，橙曬。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載