同狗狗有關嘅電影真係數之不盡，當中有幾套好多人都怕喊爆唔敢睇！

狗狗係人類嘅好朋友，我哋唔單止鍾意同佢哋相處，狗狗嘅電影我哋都好鍾意睇，適逢2月3號係金毛尋回犬日，小編揀咗幾套讚人熱淚嘅狗狗電影，放假一次過煲曬佢～～

Photo from 導盲犬小Q

1.《導盲犬小Q》

故事講述拉布拉多犬小Q成為導盲犬嘅過程，由小Q出世到進入導盲犬中心訓練、接觸第一位主人、面對主任嘅離世到最後走到自己生命嘅盡頭，雖然輕描淡寫,但睇住貪玩嘅小Q慢慢變得穩重，成為幫到人嘅導盲犬，呢段成長故事窩心得黎，好似睇住自己個小朋友長大咁，唔少人睇佢同渡邊先生嘅相處點滴都睇到眼濕濕！

Photo from 導盲犬小Q

2.《我和尋回犬的10個約定》

Photo from 我和尋回犬的10個約定

女主角明莉12歲嘅時候，媽媽因病入院，所以佢年紀細細就要自己照顧自己，要學會堅強。呢個時候狗狗襪子就出現喺佢孤單嘅人生，而明莉都同佢成為好朋友，襪子嘅存在成為明莉嘅精神支柱。

Photo from 我和尋回犬的10個約定

Photo from 我和尋回犬的10個約定

不過隨住明莉慢慢長大，接觸嘅人越黎越多，佢同襪子相處嘅時間都越黎越少，甚至因為讀書而搬走，後來佢醒起細細個同襪子許下嘅十個約定，當中一項講到襪子嘅壽命只有10-15年，明莉記得呢10個約定嘅時候，已經係第10年，所以電影後半部真係超多洋蔥位，個個都話比《導盲犬小Q》更催淚！

Photo from 我和尋回犬的10個約定

3.《快樂尋回犬》

Photo from 快樂尋回犬

大家記唔記得《愛‧回家》嘅童星男主角俞承豪呀？當年佢拍過唔少催淚電影，而呢套都可以話係TOP3！故事分咗兩大part:俞承豪同妹妹兩個孤兒相依為命嘅故事同埋俞承豪同狗狗小白嘅關係。(PS:妹妹係依家熱爆電影《與神同行》嘅「李德春」金香起~)

Photo from 快樂尋回犬

一開始年紀細細嘅妹妹見到小白無人照顧就要求養小白，佢哋「一家三口」本來都好開心，點知有次小白同妹妹喺結咗冰嘅湖面玩嗰陣，小白跌咗落水，妹妹為咗救小白跳落水最後不幸浸死！自此哥哥就覺得小白害死妹妹，所以唔要小白仲離開家鄉去第二度做嘢，但小白竟然穿州過省跟住哥哥，哥哥最後都唔捨得小白，兩個人再次重逢，成套戲由頭喊到尾，眼淺嘅朋友真係準備多幾包紙巾呀～

Photo from 快樂尋回犬

4.《馬利與我》

Photo from 馬利與我

呢套戲係講狗狗馬利陪住男主角一齊經歷唔同人生階段嘅故事。本來只係男人與狗，到男主角同女友結婚、建立家庭、有幾個小朋友、然後搬屋等等，無論發生咩事馬利都會陪住主角一家人，亦都會保護佢哋，成個故事就好似一本日記咁。

Photo from 馬利與我

Photo from 馬利與我

最後嘅高潮位就係馬利知道自己就黎死，漏夜跑咗去森林度唔畀主人搵到自己，但主角一家最後都搵到佢仲陪佢走最後一段路，真係好感動呀！！

Photo from 馬利與我

5.《再見亦是狗朋友》

咁多套電影入面，呢套係最近期嘅作品，整體節奏同感覺都輕快過之前幾套，特別嘅位係佢主要以狗嘅視覺去交代故事，講狗狗貝利係由男主角細個嗰陣救番黎收養嘅金毛尋回犬，之後佢經過咗四次輪迴，變成唔同品種嘅狗，經歷唔同嘅故事。

Photo from 再見亦是狗朋友

雖然同過咁多唔同嘅主人相處，但佢點都忘記唔到最初嘅男主角，最後佢當然係有機會搵番長大成人嘅男主角，仲撮合咗主角同愛人，本來男主角都唔認得貝利（變咗第二隻狗嘛），但最後佢使出招牌動作，令主角感應到係當初嘅金毛尋回犬，呢個大團圓結局絕對係笑中有淚。

Photo from 再見亦是狗朋友

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載