細數多位入型入格臥底～Laughing哥必勝？

而家9半無線做緊網劇《無間道》，收視唔算太好，但就引起唔少網民熱烈討論，亦都引起唔少人回想當年三部好經典嘅臥底電影，《無間道》三部曲。

除左臥底電影多人鍾意睇，其實咁多年黎都有唔少好出色同令人好難忘嘅臥底電視劇架，當中仲有唔少係做到入型入格嘅臥底添！咁究竟以下5位又係唔係你心水呢？

Photo from TVB
第五名：《學警狙擊》- 鍾立文（吳卓羲）
Photo from TVB

吳卓羲名正言順做警察就做得多，不過佢都有做過卧底，劇入面仲同黑幫江世孝嘅女拍拖，當時佢都好型仔架，亦都好有情有義。係Laughing哥死果幕亦係一個好重要嘅角色去鋪墊Laughing哥死有幾慘，有幾唔願意向佢開最後一槍，睇到一班觀眾都好心痛。

第四名：《使徒行者2》- 天堂哥（袁偉豪）
Photo from TVB
如果講到最有情有義、最感性、最溫暖嘅卧底，就一定非天堂哥莫屬。佢除左係一個小心僅傎嘅人，亦係一個為左演繹好自己身份，而改變自己成為一個花花公子。

Photo from TVB
但更重要嘅係佢教識左觀眾，廣大嘅民眾一句說話「陪伴，從來也是最長情的告白。我在，從來都比我愛你更珍貴」，一直都知道正妹嘅心從來都唔係自己度，但卻一直陪伴係佢身邊，係正妹最失意時守護住佢，完全冇乘虛而入，反而去打醒樂少叫佢回頭，唔希望眼白白見住佢辜負自己心愛嘅人。如果你人生能夠遇上一個天堂哥，一定要好好珍惜！

第三名：《使徒行者》- 爆seed（林峰）
Photo from TVB
雖然好多人都唔係咁鍾意林峰，但確實唔可以抹殺佢係《使徒行者》入面嘅演技。仲記得有一場佢佢為左唔想個買家唔要貨，自己吸食毒品，吸到差D死。果場真係睇到觀眾心都離一離。仲有好多場好令人睇到心痛，好似佢以為釘姐死左，喊到非常可憐。
Photo from TVB

第二名：《使徒行者》&《使徒行者2》- 歡喜哥（許紹雄）
Photo from TVB
同劇都係有血有肉嘅卧底歡喜哥，簡直係比網民捧上天，剩係笑，你都會睇到有好多演繹方法。你絕對可以係歡喜哥身上睇到佢笑住嬲、笑住喊。當中最經典一幕一定係佢個仔死左，佢知道之後，自己一個坐係度笑住喊，雖然佢笑，但你都感覺到有D心寒，又有D心酸，真係好演技！
Photo from TVB

第一名：《學警狙擊》- Laughing哥（謝天華）
Photo from TVB
講到最正嘅卧底，真係非Laughing哥莫屬。明明係配角，但就演活左成部《學警狙擊》。而當中最高潮位就係叫鍾立文（吳卓羲）幫自己補一槍，比觀眾一直睇住佢做卧底嘅心路歷程依一段，真係睇到淚奔！
Photo from TVB

佢最後比自己同袍誤會而槍殺，係最後一段話入面，佢冇怪責，仲同鍾立文講「如果用我條命，可以鋪路給你去到工場，我下去見到Wendy，這九年來辜負了她，這樣都哪有個交代啊」、「九年了，我都不記得了，怎樣真心對待朋友」聽到依度觀眾們都有幾感受到卧底嘅心酸。佢死個集，多個論壇都同時出現唔少「追悼」Laughing哥嘅文章，就睇到佢幾受網民歡迎。謝天華直情將Laughing哥嘅角色變成自己，謝天華就係Laughing哥，Laughing哥就係謝天華，換第二個演，就唔會存在！

Text: Holiday editorial

Photos Source：TVB and Facebook

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載