【非黃金時段播】 三個女人一個「因」 睇黃智雯演技solo

繼《雜警奇兵》同《性在有情》，無綫再上映新劇《三個女人一個「因」》喺星期六日所謂「倉底」時段播。先前兩套劇反應都一般，不過新劇《三個女人一個「因」》黃智雯的出色表現就令人眼前一亮！

故事講黃智雯飾演的方以因係一個大律師，不過就患咗人格分裂，一個人有三種人格，每個人格都非常唔同。通常無綫人格分裂的劇情都比較沉重，今次就用喜劇形式處理，幾新鮮。

Photo from 黃智雯 Facebok

要喺同一套劇演三個完全唔同的人格雖然唔易但係發揮空間好大，不過佢都輕鬆處理。首先係主人格方以因，冷靜聰明但又好mean，似佢先前一貫的戲路，例如《On Call 36小時》入面的醫生角色。

Photo from TVB

不過小編覺得最正一定係Pina colada呢個狂野人格、我行我素，唔只有動作戲，造型仲好性感超吸精，同律師造型好大對比，演技同戲路都有突破！

Photo from TVB

至於第三個人格愁擘擘就專揀方以因最唔開心的時候出現，智雯載上眼鏡同著衛衣，感覺即刻宅咗唔少。感覺好似回歸到佢啱啱2010年出道時的《搜下留情》鵪鶉妹look，咩都驚一餐，令人覺得更加好笑。

Photo from TVB

Photo from TVB

劇集另外一大賣點就係佢同袁偉豪的對手戲，袁偉豪自從《鐵馬戰車》入面的交通警深入民心，鬼馬形象開始受觀眾歡迎，今次《三個女人一個「因」》再演搞鬼厚面皮的律師徒弟，戲入面佢地兩個做的對手戲都好有火花！

Photo from TVB

Text: Holiday editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）

*本文章的圖片均經其本人或其公司授權，其他媒體不得轉載