《藉著雨點再愛你》孫藝真+蘇志燮主演能超越日版經典？情節搞笑得嚟又會令人想喊 仲埋下伏線有驚喜！

《藉著雨點再愛你》改編自多年前日本電影《藉著雨點說愛你》，對於睇過當年日版都會好難忘，到底孫藝真同蘇志燮可唔可以超越到經典？

Photo from edko films

明知係無結果嘅愛情，對方點都會離開你，你仲會唔會選擇開始？

故事講述秀雅(孫藝眞 飾)病逝前留低親手畫嘅繪本，同老公宇振(蘇志燮 飾)和兒子智昊(金志桓 飾) 約定，會喺雨季返嚟兩人身邊。1年後嘅雨季，仔仔智昊一直記住媽媽呢個約定，而秀雅真係重現眼前但失去記憶。喺朝夕相對下，夫妻再次陷入熱戀，智昊也體會到失而復得嘅母愛。

Photo from edko films

由於多年前睇過日版，而家已經印象模糊，只記得當初睇完好感動。一開始韓版已經同日版有少少唔同，《藉著雨點再愛你》以女主角秀雅(孫藝眞 飾)為阿仔智昊畫嘅繪本，企鵝媽媽喺雲中國與企鵝BB相隔兩地，但有日可以跟住雨水列車返去。而秀雅答應過兒子，會在雨季回來找他們。

一開始係有少少愁雲慘霧，講秀雅嘅喪禮、兩父子無咗秀雅嘅生活，而仔仔一直都記住媽媽嘅承諾，好似好可憐咁等似係無可能發生嘅事。但當喺個荒廢嘅車站搵到秀雅嘅時候，成套電影好似由灰色憂鬱色調，變成咗歡樂嘅感覺。

Photo from edko films

不過《藉著雨點再愛你》係會由搞笑情節講到以宇振回憶中對秀雅有意思，但愈想拉近距離就愈錯開嘅讀書時代，到畢業後點樣聯絡返嘅甜蜜過去。當講述往事，秀雅同宇振嘅距離都一步步拉近，重拾初戀感覺。

Photo from edko films

Photo from edko films

比起日版多咗好多唔同嘅搞笑情節，《藉著雨點再愛你》入面嘅仔仔智昊同宇振好朋友都係幾重要嘅輔助角色，令到成個故事生色不少，會帶住日常生活嘅小幸福，有少少似《鎌倉物語》一開始描述平凡夫妻小幸福，累積大家對佢地嘅感情。

Photo from edko films

同埋會睇住失咗憶嘅秀雅點樣同丈夫、仔仔相處後唔同咗，由一當初好似仲係個有好勝心、唔識點就人、又唔識煮嘢食嘅大細路，慢慢變到一個好識照顧仔仔、會就住仔仔嘅稱職媽媽。

Photo from edko films

到後期嘅時候，大家一定會覺得會估到情節，因為秀雅唔合理嘅出現，最後必定要離開，但睇住智昊年紀小小，想同佢諗到嘅方法阻止雨季結束，將媽媽留喺身邊；宇振用用大量樹枝塞住發現秀雅嘅車站隧道。

Photo from edko films

睇到呢到，個心會不由得心痛起嚟。因為知道唔會扭轉到結局。

不過成套電影神來之筆嘅係最後，之前講述嘅過去都係宇振嘅回憶，而後來就用秀雅角度再講述，為觀眾補回完整故事線。當中認為唔合理嘅地方，都會有返合理解釋。

Photo from edko films

最感動嘅係學藝會中年紀小小嘅智昊講嘅一番話，就會知道佢明白秀雅教佢做家務嘅用心同目的，為咗媽媽唔再擔心，應承媽媽要好好照顧爸爸，唔少觀眾都拎出紙巾。

Photo from edko films

即使你睇過日版《藉著雨點說愛你》，韓版嘅《藉著雨點再愛你》都好值得去戲院睇。

Text: Holiday editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）
*本文章的圖片均經其本人或其公司授權，其他媒體不得轉載