入晒屋嘅電視劇螢幕情侶你又識幾多Pair？

By Ivory on 07 Aug 2018

Digital Editor

一套好嘅劇集，係因為有好嘅劇本、描寫得好貼切嘅角色性格，仲有好演技嘅演員。因為演員們嘅演技太好，搞到網民們都會以為佢地假戲真做，現實中都係排緊拖！甚至抽離唔到，經常覺得佢地先係一Pair，即使佢地分別同唔同人拍拖，都會覺得佢地先係最襯!基本上，一講其中一個人嘅名，就會令人即刻聯想起另一個。排名不分先後：

1.古天樂+宣萱 《寵物情緣》、《刑事偵緝檔案IV》、《尋秦記》
最近凌晨重播《刑事偵緝檔案IV》，見到徐飛為咗武俏君，放棄一直執著要等梁芊芊，同埋佢地之間嘅互動，真係睇到觀眾都覺得sweet！仲有！喺《尋秦記》，古天樂飾演嘅項少龍同宣萱飾演嘅烏廷芳，真係好襯，男嘅聰明、英俊瀟灑；女嘅本身同項少龍係冤家，但之後因為佢警惡懲戒，無懼權貴嘅性格，成為咗項少龍嘅好拍檔，最後仲動咗情添！遲下仲會開拍《尋秦記》電影版，我哋又可以再見到古天樂同宣萱呢對CP嘅演出喇！

Photo from 《尋秦記》

Photo from 《刑事偵輯檔案IV》

2.陶大宇+郭可盈《刑事偵緝檔案》系列《心花放》《青出於藍》
《刑事偵緝檔案》入面張大勇成個情聖咁，成日用深情眼光望住Jessie;仲為咗救Jessie，自己不惜犯險！佢哋一齊拍嘅劇都好經典，所以成日覺得佢哋先係一對！

Photo from 《刑事偵輯檔案I-III》

3.鍾嘉欣+林峰《溏心風暴》
鍾嘉欣同林峰嘅外型係勁襯，男才女貌，再加上喺《溏心風暴》入面飾演情侶，常在心個樣sweet 到傻，完全係蜜運中嘅甜絲絲樣；程亮又做咗好多野氹佢開心，網民們甚至覺得佢哋現實中都係情侶！佢哋喺劇入面鬧交、分手嗰陣，真係睇到心好痛。直到依家，好多網民都覺得佢哋好襯，知道鍾嘉欣同醫生結婚，大家都唔想相信係真！

Photo from 《溏心風暴》

4.鄭嘉穎+周麗淇《翡翠戀曲》《天幕下的戀人》《最美麗的第七天》
佢哋喺呢三套劇入面都飾演情侶，網民們都覺得佢哋好襯，一個有型，一個靚女。知道咗佢哋拍拖之後，好多人都大叫登對！可惜，最後都分左手～好多人都好唔捨得！

Photo from 《最美麗的第七天》

5.宣萱+郭晉安《戇夫成龍》、《阿旺新傳》
仲好記得以前睇阿旺，飾演老婆仔嘅宣萱開頭好憎阿旺，但係慢慢比佢嘅單純融化咗。有時老婆仔因為關心而鬧阿旺嘅時候，小編都會覺得好肉赤！

Photo from 《阿旺新傳》

6.羅蘭+胡楓《一屋老友記》《老表，你好野！》
老演員入面嘅最強CP非佢哋莫屬啦！有默契到，有人將佢哋嘅關係寫咗首歌添～

7.歐陽震華+關詠荷《醉打金枝》《陀槍師姐》系列《美味天王》《情逆三世緣》
喺Google搜尋器打「歐陽震華」四字，隨即連「關詠荷」都自動彈出，可見歐陽震華（Bobby）同關詠荷（Esther）嘅最佳情侶拍檔形象非常深入民心。

Photo from 《情逆三世緣》

Photo from 《陀槍師姐》

8.黃翠如+洪永城《愛我請留言》《走過浮華大地》
佢哋唔洗拍劇都覺得佢哋襯，成日打情罵俏咁，好鬼抵死！佢哋好朋友到成日比人誤會，當知道大家都有另一半嘅時候，網民們都好驚訝，覺得佢地應該一齊！

Photo from 黃翠如Instagram

9.黃子華+鄭裕玲《男親女愛》
之前重播番《藍天白雲》，兩個互窒，又有愛嘅畫面，即刻喺個腦入面浮現！

Photo from 《男親女愛》

10.陳豪+廖碧兒《心花放》
佢哋兩個都係鬼妹／鬼仔，外型上都好登對～現實上，佢哋都有拍過拖！

Photo from 《心花放》

11.魏駿傑+滕麗名《陀槍師姐》《陀槍師姐2》《陀槍師姐3》《御用閒人》
一喺Google打魏駿傑就有滕麗名個名，雖然佢哋曾經真喺情侶，但《陀槍師姐》嘅呢一Pair真係令人難以忘記！

Photo from 《陀槍師姐》

12.楊怡+馬國明《On Call36小時》
一件頭同范子妤都係經典嘅一對。醫生情侶，又型又有錢！

Photo from 《Oncall 36小時》

13.朱千雪+黃浩信《EU超時任務》《踩過界》
每次睇親都會喊！雖然TVB成日都有呢啲穿越時空嘅劇集，但唔少網民都覺得《EU超時任務》好高質。渠頭同凌晨風本身係冤家，成日互相針鋒相對，渠頭仲叫凌晨風做死八婆！去到後尾，佢哋互生情愫。可惜，最尾渠頭為咗凌晨風，寧願自己承受愛佢但佢唔知嘅痛苦，都要要番晨風條命。呢個位，真係搞喊好多人。仲有《踩過界》，雖然朱千雪喺嗰套劇唔算主角，但佢哋嘅愛情，好似承接番《EU超時任務》咁。佢哋呢一Pair真係好經典！

Photo from 《踩過界》

Photo from 《EU超時任務》

愛回家篇
之前嗰輯愛回家，佢哋呢兩Pair真係冇得輸！
1.黎諾懿+朱慧敏（馬壯+尹德如）
大結局嗰陣，好多網民都想「壯如戀」重燃，點知最後竟然係分手，去英國讀書！網民嬲到開左個Facebook page，叫「強烈反對馬壯尹德如分手群組」添！

Photo from 《愛回家》

Photo from Facebook

2.張達倫+楊卓娜
嚴謹同霞姐一段穩穩定定嘅感情，個個觀眾都話sweet，結局仲生埋龍鳳胎！

Photo from 《愛回家》

3.曹總+呂慧儀
大家都好想熊若水接受曹總！

Photo from 曹總Instagram

唔知點解，硬係覺得熊心如同池子孝+安仔同Bonnie呢兩Pair好襯，之前佢哋呢兩pair仲一齊拍情侶手指舞！兩個女仔都好冧咁～如果真係一齊就好～

Photo from 蘇韻姿instagram

4.蘇韻姿+阮政峰

Photo from 蘇韻姿instagram

傳說中的情侶舞，你們覺得我們跳得如何呢？@yuenchingfung 我想挑戰安仔-你不會不夠膽跳嗎？@iris_lammm @kalok_ ??? #到你哋啦 #孝心版 #網上挑戰 #開心速遞 #池子孝 #熊心如 #手勢舞 #情侶舞

Andrea So 蘇韻姿（@andreaso_）分享的貼文於 PST 2017 年 12月月 22 日上午 3:25 張貼

5.吳嘉豪+周嘉洛+林凱恩
雖然安仔同Bonnie好合拍，但小編覺得朱凌凌同安仔先係最登對！

Photo from 林凱恩Instagram

Happy Boxing Day?♥️金城安，我是你最大的禮物嗎？我要挑戰博思Mandy檔！ @maboboma @jan.tse #愛的手勢舞 #安bon版 #開心速遞 #網上挑戰 #數已找 #幸福就好

lamiris 林凱恩（@iris_lammm）分享的貼文於 PST 2017 年 12月月 26 日上午 4:24 張貼