超震撼火坑奇觀 連續燃燒47年地獄之門 土庫曼嘅天然氣田

土庫曼係一個神秘嘅國家，遊客需要持簽證入境，但每年仍然有唔少旅客到訪土庫曼，其中一個原因就係為咗一睹「地獄之門」。

「地獄之門」位於土庫曼卡拉庫姆沙漠之中，絕大部分遊客到土庫曼都會去睇呢個地獄之門，「地獄之門」係一個大型坑洞，入面有熊熊烈火燃燒，至今47年，從未熄滅過。

Photo from 維基百科

地獄之門本來係一處天然氣田，1971年地質學家喺開採嘅時候發生意外，令開採嘅洞崩塌變得直徑超過100米嘅大洞，洞口不斷咁湧出天然氣同埋到啲有毒氣體，為咗減低對人體嘅傷害，所以就決定燃燒呢個洞，結果一燒就燒咗47年。

地獄之門嘅總面積達到5350平方米，相當於一個美式足球場咁大，吸引唔少旅客專程到訪，一睹呢個壯觀奇景，感受一下熾熱嘅火焰。

Photo from shutterstock

Photo from shutterstock

喺地獄之門附近有三個天氣坑，但最火光熊熊嘅都係地獄之門，入面有過千個火種燃燒。地獄之門有成20米深，直徑有超過100米，就算用廣角鏡都未必可以影到地獄之門嘅全貌。

Photo from shutterstock

睇地獄之門嘅最佳時刻係夜晚，因為朝早坑洞入面嘅火焰並唔顯眼，一到夜晚就會見到坑入面嘅金黃色火光喺夜色中雄雄燃燒。

Photo from shutterstock

Photo from shutterstock

Photo from shutterstock

所以有好多人會選擇喺地獄之門附近露營，等到夜晚嘅時候到地獄之門觀賞奇景，洞入面不時傳出霹靂啪啦嘅燃爆聲，好似來自地獄嘅哀嗚，「地獄之門」真係改得非常貼切。

除咗地獄之門外，卡拉庫姆沙漠亦都係觀星嘅好地方，夜晚嘅時候，成個夜空都係星星，都係另一個美景。

由於地獄之門位於沙漠入面，所以要乘坐越野車前往，拉庫姆沙漠非常之大，又無指示牌，要搵到地獄之門唔係咁易，建議搵當地旅遊公司租車同導遊前往，或者參加導賞團。

地獄之門真係非常壯觀，唔知洞入面嘅天然氣仲會燃燒多幾多年呢？

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）